വജ്രായുധത്തെ ഇറക്കി ടേബിൾ ടോപിലെത്താൻ ആർസിബി; ഓസ്‌ട്രേലിയൻ സൂപ്പർ താരവും ഉണ്ടാകും ആർസിബിയുടെ അടുത്ത മത്സരത്തിൽ

Authored by: അനുഷ ഗംഗാധരൻ|Samayam Malayalam•25 May 2025, 12:20 pm

പടിക്കലിൽ ചെന്ന് കലം ഉടച്ച പ്രതീതിയോടെയാണ് സൺറൈസേഴ്‌സ് ഹൈദരാബാദിനോടുള്ള റോയൽ ചലഞ്ചേഴ്‌സ് ബംഗളൂരുവിന്റെ തോൽവിയെ ഏവരും നോക്കി കണ്ടത്. ഈ മത്സരത്തിലെ തോൽവിയുടെ മൂന്നാം സ്ഥാനത്തേക്ക് ആർസിബി തഴയപ്പെടുകയും ചെയ്‌തു. സീസണിൽ ഇതുവരെ ശക്തരായി കളിച്ച ആർസിബി താരങ്ങളുടെ കാലിടറുന്ന കാഴ്ചയാണ് കഴിഞ്ഞ മത്സരത്തിൽ കണ്ടത്. ഇത് ആവർത്തിച്ചാൽ ഇത്തവണയും കപ്പ് ആർസിബിയ്ക്ക് അന്യമാകും.
ആ ഗോൾഡൻ ചാൻസിനായി ഇനി വാശിയേറിയ പോരാട്ടം; ജയിച്ചാൽ മാത്രം പോര; മറ്റു ചില കാര്യങ്ങളും നിർണായകം
ഐപിഎൽ 2025 പോയിന്റ് ടേബിളിലെ ആദ്യ രണ്ട് സ്ഥാനങ്ങളിൽ ഒരു സ്ഥാനം ഉറപ്പിക്കുക എന്നതാണ് ഇനി ആർസിബിയുടെ ലക്ഷ്യം. അതിനായി ആർസിബി ഈ സീസണിലെ തങ്ങളുടെ ഗ്രൂപ്പ് ഘട്ടത്തിലെ ഏറ്റവും അവസാനത്തെ മത്സരത്തിൽ ഉയർന്ന റൺ റേറ്റിൽ വിജയിക്കേണ്ടതുണ്ട്. ഇപ്പോഴിതാ മെയ് 27 ന് നടക്കുന്ന നിർണായക മത്സരത്തിൽ ആർസിബിയുടെ വജ്രായുധം ടീമിൽ തിരിച്ചെത്തിയിരിക്കുകയാണ്.

ആർസിബി ആരാധകരുടെ കാത്തിരിപ്പിന് വിരാമം കുറിച്ച് ഓസ്ട്രേലിയൻ പേസർ ജോഷ് ഹേസൽവുഡ് ടീമിനൊപ്പം ചേർന്നു. 2025 പ്ലേ ഓഫുകളുടെ മുന്നോടിയായി ലക്‌നൗവിൽ വെച്ച് ഞായറാഴ്ചയാണ് താരം ടീമിനൊപ്പം ചേർന്നത്. അതുകൊണ്ടുതന്നെ ലക്‌നൗവുമായി നടക്കുന്ന സീസണിലെ ഗ്രൂപ്പ് ഘട്ടത്തിലെ അവസാന മത്സരത്തിൽ ആർസിബി തങ്ങളുടെ വജ്രായുധത്തെ ഇറക്കുമെന്ന് ഏറെ കുറെ ഉറപ്പായി കഴിഞ്ഞു. ഐപിഎൽ 2025 സീസൺ മേയ് 17ന് പുനരാരംഭിച്ചതുമുതൽ ജോഷ് ഹേസൽവുഡിന്റെ ടീം പ്രവേശനത്തിനായി ആരാധകർ ഏറെ പ്രതീക്ഷയോടെ കാത്തിരിക്കുകയായിരുന്നു. ഹേസൽവുഡിന്റെ സാനിധ്യം ടീമിൻ്റെ പേസ് ബൗളിങിനെ ഏറെ ശക്തിപ്പെടുത്തുമെന്നാണ് പ്രതീക്ഷ.

നിലവിൽ ഈ സീസണിൽ ഏറ്റവും കൂടുതൽ വിക്കറ്റ് എടുത്ത താരങ്ങളിൽ നാലാം സ്ഥാനത്താണ് ജോഷ് ഹേസൽവുഡ് ഉള്ളത്. പരിക്കിനെ തുടർന്ന് ചില മത്സരങ്ങൾ നഷ്ടമായതോടെയാണ് വിക്കറ്റ് വേട്ടയിൽ ഹേസൽവുഡ് നാലാം സ്ഥാനത്തേക്ക് വീണത്. ഷോൾഡറിന് ഏറ്റ പരിക്കിനെ തുടർന്ന് വിശ്രമത്തിലായ താരം ഐപിഎൽ 2025 സീസൺ ഇന്ത്യ പാക് അതിർത്ഥിസംഘർഷത്തെ തുടർന്ന് താത്കാലികമായി നിർത്തിവെച്ചതോടെയാണ് ഓസ്‌ട്രേലിയയിലേക്ക് തിരിച്ചു പോയത്. എന്നാൽ സീസൺ പുനരാരംഭിച്ചു എങ്കിലും താരത്തിന്റെ തിരിച്ചുവരവ് സംശയത്തിലായി.

ഷോൾഡറിനേറ്റ പരിക്കും ലോക ടെസ്റ്റ് ചാമ്പ്യൻഷിപ്പ് ഫൈനൽ അടുത്തത്തോടെയുമാണ് ഈ സംശയം ശക്തമായത്. ലോർഡ്സ് ക്രിക്കറ്റ് ഗ്രൌണ്ടിൽ നടക്കാനിരിക്കുന്ന ലോക ടെസ്റ്റ് ചാമ്പ്യൻഷിപ്പ് ഫൈനലിൽ ജോഷ് പങ്കെടുക്കാൻ തയ്യാറെടുക്കുന്നതിനാൽ ഈ സീസണിലെ ശേഷിക്കുന്ന മത്സരങ്ങൾക്കായി താരം ഇന്ത്യയിലേക്ക് മടങ്ങില്ലെന്ന് നേരത്തെ നിരവധി റിപ്പോർട്ടുകളുണ്ടായിരുന്നു. ഓസ്ട്രേലിയയും ദക്ഷിണാഫ്രിക്കയും തമ്മിലാണ് ലോക ടെസ്റ്റ് ചാമ്പ്യൻഷിപ്പ് ഫൈനൽ നടക്കുന്നത്.

എന്നാൽ പരിക്കിൽ നിന്ന് മുക്തനായാൽ താരം തിരിച്ചെത്തുമെന്ന് റിപ്പോർട്ട് എത്തിയതിയോടെ ആണ് ആർസിബി ആരാധകർ കാത്തിരിക്കാൻ തുടങ്ങി. ബെംഗളുരുവിന്റെ പ്ലേ ഓഫ് മത്സരത്തിൽ ഹേസൽവുഡ് ഉണ്ടാകും എന്നായിരുന്നു ഇതുവരെ സൂചന ഉണ്ടായിരുന്നത്. എന്നാൽ ടേബിളിലെ ആദ്യ രണ്ട് സ്ഥാനങ്ങൾ അനിവാര്യമായത് കൊണ്ട് ലക്‌നൗ സൂപ്പർ ജെയ്ന്റ്സ് - റോയൽ ചലഞ്ചേഴ്‌സ് ബെംഗളൂരു മത്സരത്തിൽ ഹേസൽവുഡും ഉണ്ടാകാനുള്ള സാധ്യത ഏറുകയാണ്.

അതേസമയം ലക്‌നൗവിനെതിരെ നടക്കുന്ന മത്സരത്തിൽ ജയിച്ചാൽ മാത്രം ആർസിബി ടേബിളിൽ രണ്ടാം സ്ഥാനത്ത് എത്തുകയില്ല. ഗുജറാത്ത് ടൈറ്റൻസും പഞ്ചാബ് കിങ്‌സും അടുത്ത കളിയിൽ തോൽക്കുക കൂടി ചെയ്‌താലേ ആർസിബിയുടെ വഴി എളുപ്പമാവുകയുള്ളു. മെയ് 27ന് ഏകന ക്രിക്കറ്റ് സ്റ്റേഡിയത്തിൽ വെച്ചാണ് റോയൽ ചലഞ്ചേഴ്‌സ് ബെംഗളൂരുവും ലക്‌നൗ സൂപ്പർ ജെയ്ന്റ്‌സും ഏറ്റുമുട്ടുന്നത്.