വാട്ട്‌സ്ആപ്പിൽ ഇനി മൂന്നാം കക്ഷി എഐ ഏജന്റുമാരുമായി നേരിട്ട് ചാറ്റ് ചെയ്യാം; പുതിയ ഫീച്ചർ പരീക്ഷിക്കുന്നു

ജനപ്രിയ മെസേജിംഗ് ആപ്പായ വാട്ട്‌സ്ആപ്പ് ഉപയോക്താക്കൾക്കായി പുതിയ സവിശേഷത പരീക്ഷിക്കുന്നു. ആപ്പിൽ നിന്ന് പുറത്തുപോകാതെ തന്നെ മൂന്നാം കക്ഷി ആർട്ടിഫിഷ്യൽ ഇന്റലിജൻസ് (AI) ഏജന്റുമാരുമായി നേരിട്ട് ചാറ്റ് ചെയ്യാൻ അനുവദിക്കുന്ന ഫീച്ചറാണ് പരീക്ഷിക്കുന്നത്. ആൻഡ്രോയിഡ് ബീറ്റ പതിപ്പ് ഉപയോഗിക്കുന്ന തിരഞ്ഞെടുത്ത ഉപയോക്താക്കൾക്ക് ഘട്ടംഘട്ടമായി ഈ സൗകര്യം ലഭ്യമാക്കിത്തുടങ്ങി.

പുതിയ സംവിധാനത്തിലൂടെ ഉപയോക്താക്കൾക്ക് തങ്ങൾക്ക് ഇഷ്ടമുള്ള മൂന്നാം കക്ഷി എഐ സേവനങ്ങൾ വാട്ട്‌സ്ആപ്പിൽ നിന്ന് നേരിട്ട് ഉപയോഗിക്കാനാകും. എന്നാൽ, ഈ എഐ ഏജന്റുകളെ വികസിപ്പിക്കുകയും നിയന്ത്രിക്കുകയും ചെയ്യുന്നത് വാട്ട്‌സ്ആപ്പിന് പുറത്തുള്ള കമ്പനികളും ഡെവലപ്പർമാരുമാണ്. ഇവരെ ഉപയോക്താക്കളുമായി ബന്ധിപ്പിക്കുന്ന പ്ലാറ്റ്‌ഫോമായി മാത്രമാണ് വാട്ട്‌സ്ആപ്പ് പ്രവർത്തിക്കുക.

ഒരു സമയം പരമാവധി അഞ്ച് മൂന്നാം കക്ഷി എഐ ഏജന്റുമാരെ വാട്ട്‌സ്ആപ്പ് അക്കൗണ്ടുമായി ബന്ധിപ്പിക്കാനാകും. പുതിയ ഏജന്റിനെ ചേർക്കണമെങ്കിൽ നിലവിലുള്ളവയിൽ ഒന്നിനെ നീക്കം ചെയ്യേണ്ടിവരും.

പുതിയ ഫീച്ചർ ഉപയോഗിക്കുന്നവർ സ്വകാര്യത സംബന്ധിച്ച കാര്യങ്ങളിൽ പ്രത്യേകം ശ്രദ്ധിക്കണമെന്നാണ് മുന്നറിയിപ്പ്. സാധാരണ വാട്ട്‌സ്ആപ്പ് സന്ദേശങ്ങൾക്കും കോളുകൾക്കും ലഭിക്കുന്ന എൻഡ്-ടു-എൻഡ് എൻക്രിപ്ഷൻ മൂന്നാം കക്ഷി എഐ ഏജന്റുകളുമായുള്ള സംഭാഷണങ്ങൾക്ക് ബാധകമല്ല.

അതായത്, ഉപയോക്താക്കൾ എഐ ഏജന്റുകൾക്ക് അയയ്ക്കുന്ന വിവരങ്ങൾ ബന്ധപ്പെട്ട കമ്പനികളുടെ സ്വന്തം ഡാറ്റാ നയങ്ങൾക്കനുസരിച്ച് പ്രോസസ്സ് ചെയ്യുകയോ സംഭരിക്കുകയോ ചെയ്യാം. ഈ ഏജന്റുകളുടെ പ്രവർത്തനത്തിലും ഡാറ്റാ കൈകാര്യം ചെയ്യുന്നതിലും വാട്ട്‌സ്ആപ്പിന് നേരിട്ടുള്ള നിയന്ത്രണമുണ്ടാകില്ല. അതിനാൽ ഒരു എഐ ഏജന്റിനെ ഉപയോഗിക്കുന്നതിന് മുമ്പ് അതിന്റെ സേവന നിബന്ധനകളും സ്വകാര്യതാ നയവും പരിശോധിക്കേണ്ടത് പ്രധാനമാണ്.

ആപ്പുകളിൽ തന്നെ എഐ സേവനങ്ങൾ കൂടുതൽ വ്യാപകമായി ലഭ്യമാക്കാനുള്ള മെറ്റയുടെ പദ്ധതിയുടെ ഭാഗമായാണ് പുതിയ ഫീച്ചർ അവതരിപ്പിക്കുന്നത്. ഭാവിയിൽ വാട്ട്‌സ്ആപ്പിൽ നിന്ന് പുറത്തുകടക്കാതെ വിവിധ എഐ സേവനങ്ങൾ നേരിട്ട് ഉപയോഗിക്കാൻ ഉപയോക്താക്കൾക്ക് സാധിക്കുന്ന തരത്തിൽ സംവിധാനം വിപുലീകരിക്കാനാണ് ലക്ഷ്യമിടുന്നത്.