വിഗ്നേഷ് പുത്തൂരിന് തിരിച്ചടി, ഈ സീസണിൽ ഇനി കളിക്കില്ല; പകരക്കാരനെ സൈൻ ചെയ്ത് മുംബൈ ഇന്ത്യൻസ്

Curated byഗോകുൽ എസ് | Samayam Malayalam | Updated: 1 May 2025, 2:19 pm

മുംബൈ ഇന്ത്യൻസിന്റെ മലയാളി യുവ സ്പിന്നർ വിഗ്നേഷ് പുത്തൂർ പരിക്കിനെത്തുടർന്ന് 2025 സീസൺ ഇന്ത്യൻ പ്രീമിയർ ലീഗിലെ ശേഷിക്കുന്ന മത്സരങ്ങളിൽ നിന്ന് പുറത്ത്‌. അരങ്ങേറ്റ സീസണിൽ മികച്ച പ്രകടനം കാഴ്ച വെച്ച് മുന്നേറുന്നതിനിടെയാണ് പരിക്ക് താരത്തിന് മുന്നിൽ വില്ലനായത്. മുംബൈ ഇന്ത്യൻസ് തന്നെയാണ് താരം ടൂർണമെന്റിൽ നിന്ന് പുറത്തായ വിവരം ഔദ്യോഗികമായി പങ്കുവെച്ചത്‌‌. പരിക്കേറ്റ് പുറത്തായ വിഗ്നേഷിന് പകരക്കാരനെയും മുംബൈ ഇന്ത്യൻസ് പ്രഖ്യാപിച്ചിട്ടുണ്ട്. നെറ്റ്സ് ബൗളറായി ടീമിനൊപ്പമുണ്ടായിരുന്ന ഇന്ത്യൻ ലെഗ് സ്പിന്നർ രഘു ശർമയാണ് വിഗ്നേഷിന് പകരം ടീമിലേക്ക് എത്തിയത്. അടിസ്ഥാന‌ വിലയായ 30 ലക്ഷം രൂപക്കാണ് രഘു മുംബൈ ഇന്ത്യൻസിൽ ചേർന്നിരിക്കുന്നത്‌‌. വിഗ്നേഷിനെ പോലെ രഘുവിന്റെയും ക‌ന്നി ഐപിഎൽ സീസണാണ് ഇത്തവണത്തേത്.


മിന്നും തുടക്കമായിരുന്നു ഐപിഎൽ കരിയറിൽ വിഗ്നേഷ് പുത്തൂരിന് ലഭിച്ചത്. 2025 സീസണിലെ ആദ്യ കളിയിൽ ചെന്നൈ സൂപ്പർ കിങ്സിന് എതിരെ മൂന്ന് വിക്കറ്റുകൾ വീഴ്ത്തി താരം അമ്പരപ്പിച്ചു. ഈ മത്സരത്തോടെ താരം ഇന്ത്യൻ ക്രിക്കറ്റിലും ശ്രദ്ധിക്കപ്പെട്ടു. ഈ സീസണിൽ ആകെ അഞ്ച് മത്സരങ്ങൾ കളിച്ച വിഗ്നേഷ് ആറ് വിക്കറ്റുകളാണ് മൊത്തം നേടിയത്. 9.08 ആണ് എക്കോണമി.

സഞ്ജുവിന്റെ കാര്യത്തിൽ സുപ്രധാന അപ്ഡേറ്റ് പുറത്തുവിട്ട് രാഹുൽ ദ്രാവിഡ്; രാജസ്ഥാൻ റോയൽസ് ആരാധകർക്ക് നിരാശ
വിഗ്നേഷ് പുത്തൂരിന് പകരം മുംബൈ ഇന്ത്യൻസ് സൈൻ ചെയ്ത രഘു ശർമ, അഭ്യന്തര ക്രിക്കറ്റിൽ പഞ്ചാബിനായും പുതുച്ചേരിക്കായും കളിച്ചിട്ടുള്ള താരമാണ്. 11 ഫസ്റ്റ് ക്ലാസ് മത്സരങ്ങളിൽ നിന്ന് 19.59 ശരാശരിയിൽ 57 വിക്കറ്റുകളാ‌ണ് അദ്ദേഹത്തിന്റെ സമ്പാദ്യം. ഒ‌ൻപത് ലിസ്റ്റ് എ മത്സരങ്ങളിൽ 14 വിക്കറ്റുകളും, മൂന്ന് ടി20 മത്സരങ്ങളിൽ അത്ര തന്നെ വിക്കറ്റുകളുമാണ് അദ്ദേഹം നേടിയിട്ടുള്ളത്.

ആദ്യ ഏഴിൽ രണ്ട് ഇന്ത്യൻ താരങ്ങൾ, ‌2025 സീസൺ ഐപിഎല്ലിലെ ഏറ്റവും വലിയ‌ സിക്സറുകൾ പറത്തിയത് ഇവർ
അതേ സമയം ഇത്തവണ കളിച്ച ആദ്യ അഞ്ച് മത്സരങ്ങളിൽ ഒരെണ്ണം മാത്രം വിജയിച്ച് ദയനീയ തുടക്കമായിരു‌ന്നു മുംബൈ ഇന്ത്യൻസിന്റേത്‌. എന്നാൽ പിന്നീട് കളിച്ച അഞ്ച് മത്സരങ്ങളിലും വിജയം നേടാൻ അവർക്കായി. ഇതോടെ പോയിന്റ് പട്ടികയിൽ വൻ കുതിപ്പും ടീം നടത്തി. നിലവിൽ 10 കളികളിൽ 12 പോയിന്റുമായി ലീഗിൽ മൂന്നാം സ്ഥാനത്താണ് മുംബൈ. ഇന്ന് രാജസ്ഥാൻ റോയൽസിന് എതിരെയാണ് ടീമിന്റെ അടുത്ത മത്സരം. ഈ കളിയിൽ വിജയിക്കാനായാൽ അവർക്ക് പോയിന്റ് പട്ടികയിൽ ഒന്നാം സ്ഥാനത്തെത്താം.