വിജയുടെ മകനും ജ്യോതികയുടെ മകളും ഒന്നിക്കുന്നു, കുഷി 2 വരാൻ സാധ്യതയുണ്ടോ എന്ന ചോദ്യത്തിന് എസ്ജെ സൂര്യയുടെ മറുപടി

Authored by: അശ്വിനി പി|Samayam Malayalam•27 Sept 2025, 1:33 pm

ജ്യോതികയെയും വിജയ് യെയും കേന്ദ്ര കഥാപാത്രങ്ങളാക്കി എസ് ജെ സൂര്യ സംവിധാനം ചെയ്ത തമിഴ് ചിത്രമാണ് കുഷി. 2000 ൽ പുറത്തിറങ്ങിയ ചിത്രത്തിന് വൻ സ്വീകരണമാണ് ലഭിച്ചത്. ഇന്നും ആഘോഷിക്കപ്പെടുന്ന തമിഴ് ചിത്രങ്ങളിലൊന്നാണ് ഖുഷി. ചിത്രത്തിലെ പാട്ടും വൻ ഹിറ്റായിരുന്നു.

നടൻ കൂടെയായ എസ്കെ സൂര്യയാണ് ചിത്രം സംവിധാനം ചെയ്തത് എന്നതും മലയാളികൾക്ക് കൗതുകമായി തോന്നിയ ഒന്നാണ്. വാലി എന്ന അജിത്ത് ചിത്രത്തിന് ശേഷം എസ് ജെ സൂര്യ സംവിധാനം ചെയ്ത രണ്ടാമത്തെ ചിത്രമായിരുന്നു കുഷി. ചിത്രം പിന്നീട് തെലുങ്കിലും ഹിന്ദിയിലും എല്ലാം റീമേക്ക് ചെയ്തിട്ടുണ്ട്.

Also Read: വാക്കേറ്റമില്ല, കണ്ണീരില്ല; കോടതിയിൽ പരസ്പരം ബൈ പറഞ്ഞ് പിരി‍ഞ്ഞ് ജിവി പ്രകാശും സൈന്ധവിയും, 23 വർഷത്തെ ബന്ധം അവസാനിച്ചു!

കുഷിയുടെ രണ്ടാം ഭാഗം വരുന്നു എന്ന തരത്തിൽ അടുത്തിടെ പല ഗോസിപ്പുകളും വന്നിരുന്നു. ജ്യോതിക അഭിനയത്തിലേക്ക് തിരിച്ചു വന്ന സ്ഥിതിയ്ക്ക് ഖുഷിയുടെ രണ്ടാം ഭാഗം എടുക്കാനുള്ള സാധ്യത ചിലരൊക്കെ നിരീക്ഷിച്ചു. എന്നാൽ വിജയ് ജനനായകൻ എന്ന ചിത്രത്തിലൂടെ അഭിനയം നിർത്തുന്നതിനാൽ കുഷിയുടെ രണ്ടാം ഭാഗം വരാനുള്ള സാധ്യത പൂർണമായും ബ്ലോക്ക് ആയ നിലയിലായിരുന്നു.

എന്നാൽ ഇപ്പോൾ അതിന് മറ്റൊരു കാസ്റ്റിങ് തന്നെ ആരാധകർക്കിടയിലുണ്ട്, ആ കാസ്റ്റിങിനെ കുറിച്ച് എസ് ജെ സൂര്യയോട് നേരിട്ട് ചോദിച്ചപ്പോൾ അദ്ദേഹം നൽകിയ മറുപടിയാണ് വൈറലാവുന്നത്. എന്തുകൊണ്ട് വിജയ് യുടെ മകൻ സഞ്ജയ് ജെയ്സണിനെയും ജ്യോതികയുടെ മകൾ ദിയയെയും വച്ച് കുഷിയുടെ രണ്ടാം ഭാഗം ചെയ്തു കൂടാ എന്നായിരുന്നു ഒരു വാർത്താ സമ്മേളനത്തിന് എസ്ജെ സൂര്യയോട് ഉണ്ടായിരുന്ന ചോദ്യം.

Also Read: സറോഗേഷനും അഡോപ്‌ഷനും മുതൽ ആശിച്ചുകിട്ടിയ ആദ്യകണ്മണികൾ! കുഞ്ഞിക്കാൽ കാണാൻ ഉള്ള ആഗ്രഹത്തിൽ അമ്മമാരായ താരങ്ങൾ

ഇതിപ്പോൾ സിനിമയുടെ ഫുൾ കാസ്റ്റും നിങ്ങൾ തന്നല്ലോ എന്ന് ചോദിച്ച് സംവിധായകൻ മനോഹരമായി ഒന്ന് ചിരിച്ചു. അതിന് ശേഷം അങ്ങനെ സംഭവിക്കാനുള്ള സാധ്യതയും തള്ളിക്കളയാതെ മറുപടി നൽകി, ഇങ്ങനെ ഒരു സിനിമ സംഭവിക്കേണ്ടതാണ് എന്നുണ്ടെങ്കിൽ അത് സംഭവിക്കുക തന്നെ ചെയ്യും എന്നായിരുന്നു എസ് ജെ സൂര്യയുടെ മറുപടി.


അച്ഛന്റെയും മുത്തശ്ശന്റെയും സിനിമ പാരമ്പര്യം പിൻതുടർന്ന് സിനിമയിലേക്ക് എത്തിയ സഞ്ജയ് ജെയ്സൺ പക്ഷേ അഭിനയത്തിലല്ല ശ്രദ്ധ കേന്ദ്രീകരിച്ചിരിയ്ക്കുന്നത്. ആദ്യമായി സംവിധാനം ചെയ്യുന്ന ചിത്രത്തിന്റെ ഷൂട്ടിങ് അണിയറയിൽ നടന്നുകൊണ്ടിരിക്കുകയാണ്. അതേ സമയം അടുത്തിടെ സൂര്യ - ജ്യോതിക ദമ്പതികളുടെ മകൾ ദിയയുടെ അതി മനോഹരമായ ചിത്രങ്ങൾ സോഷ്യൽ മീഡിയയിൽ വൈറലായിരുന്നു. 17 കാരിയായ താരപുത്രി അഭിനയത്തിലേക്ക് വരുമോ എന്ന ചോദ്യവും ചർച്ചയായി നിൽക്കുന്ന സാഹചര്യത്തിലാണ് ഇപ്പോൾ ഖുഷിയുടെ രണ്ടാം ഭാഗത്തെ കുറിച്ചുള്ള ചർച്ചകൾ വരുന്നത്.