വൈഭവ് സൂര്യവംശി പത്തില്‍ തോറ്റോ? ഐപിഎല്‍ 'കളിച്ചുനടന്ന്'പരീക്ഷ തോറ്റാല്‍ ഡിആര്‍എസ് പ്രകാരം ജയിപ്പിക്കണമെന്ന് ആരാധകര്‍

Authored by: നിഷാദ് അമീന്‍|Samayam Malayalam•16 May 2025, 3:15 pm

ഐപിഎല്‍ ചരിത്രത്തിലെ ഏറ്റവും പ്രായം കുറഞ്ഞ താരം... ഐപിഎല്‍ സെഞ്ചുറി നേടിയ പ്രായം കുറഞ്ഞ താരം.. തുടങ്ങി നിരവധി റെക്കോഡുകള്‍ കൊയ്ത് 'ഇന്ത്യന്‍ ക്രിക്കറ്റിലെ അത്ഭുത ബാലന്‍' എന്ന വിശേഷണം എടുത്തണിഞ്ഞ 14കാരന്‍ വൈഭവ് സൂര്യവംശി (Vaibhav Suryavanshi) പത്തില്‍ തോറ്റോ? സിബിഎസ്ഇ 10ാം ക്ലാസ് പരീക്ഷയുടെ ഫലം വന്നതോടെ 'കളിച്ചുനടന്ന' വൈഭവിന്റെ റിസള്‍ട്ട് സോഷ്യല്‍ മീഡിയയില്‍ വലിയ ചര്‍ച്ചയായി മാറി. വൈഭവ് 10ല്‍ തന്നെയാണോ പഠിക്കുന്നത്? വൈഭവ് പരീക്ഷ എഴുതിയിരുന്നോ?

രാജസ്ഥാന്‍ റോയല്‍സ് (Rajasthan Royals) ഐപിഎല്‍ 2025ന് (IPL 2025) വേണ്ടി 1.10 കോടി രൂപയ്ക്ക് ലേലത്തില്‍ പിടിക്കുമ്പോള്‍ വൈഭവ് സൂര്യവംശി സ്‌കൂളില്‍ പഠിക്കുകയായിരുന്നു. അതും എട്ടാം ക്ലാസില്‍. 13 വയസ്സായിരുന്നു പ്രായം. ഈ കരാറിന് മുമ്പ് തന്നെ തന്റെ വൈഭവം തെളിയിച്ച് വാര്‍ത്തകളില്‍ ഇടംപിടിച്ചിരുന്നു. ചെന്നൈ സൂപ്പര്‍ കിങ്സിനെതിരെ 35 പന്തില്‍ 100 തികച്ചതോടെ ക്രിക്കറ്റ് ലോകം വീണ്ടും തരിച്ചുനിന്നു.

പത്താം ക്ലാസ് ബോര്‍ഡ് പരീക്ഷയില്‍ തോറ്റതിനെക്കുറിച്ചുള്ള അഭ്യൂഹങ്ങള്‍ പരന്നതോടെ പഠനവും കളിയും ഒരുമിച്ച് കൊണ്ടുപോവുക പ്രയാസമാണെന്ന തരത്തില്‍ ചര്‍ച്ചകള്‍ തുടങ്ങി. മഴ മൂലം കളി തടസ്സപ്പെട്ടാല്‍ വിജയികളെ കണ്ടെത്താന്‍ ഉപയോഗിക്കുന്ന ഡക്ക്‌വര്‍ത്ത് ലൂയിസ് നിയമം (ഡിഎല്‍എസ് മെത്തേഡ്) ഉപയോഗിച്ച് 'പാവത്തിനെ ജയിപ്പിക്കണം' എന്ന് ചില ആരാധകര്‍ തമാശ പങ്കിട്ടു.

https://www.instagram.com/p/DJllGM1JHW9/?utm_source=ig_web_copy_link&igsh=MzRlODBiNWFlZA==https://www.instagram.com/p/DJllGM1JHW9/?utm_source=ig_web_copy_link&igsh=MzRlODBiNWFlZA==
മൂല്യനിര്‍ണയത്തില്‍ പിശകുണ്ടെന്ന് ചൂണ്ടിക്കാട്ടി ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ) വൈഭവിന്റെ ഉത്തരക്കടലാസുകള്‍ ഡിആര്‍എസ് ശൈലിയില്‍ പുനഃപരിശോധിക്കാന്‍ സിബിഎസ്ഇയോട്‌ ഔദ്യോഗികമായി അഭ്യര്‍ത്ഥിച്ചു എന്നും ചിലര്‍ തമാശയായി വച്ചുകാച്ചി. ബിസിസിഐയുടെ അസാധാരണ നീക്കമെന്നും ചിലര്‍ അഭിപ്രായപ്പെട്ടു.

മെസ്സി തിരിച്ചെത്തുന്നു; ലോകകപ്പ് യോഗ്യതാ മല്‍സരങ്ങളില്‍ അര്‍ജന്റീനയെ നയിക്കും
സത്യത്തില്‍ വൈഭവ് എട്ടാം ക്ലാസ് വിദ്യാര്‍ത്ഥിയാണ്. അതിനാല്‍, പത്താം ക്ലാസ് ബോര്‍ഡ് പരീക്ഷയില്‍ അദ്ദേഹം പരാജയപ്പെട്ടോ എന്ന ചോദ്യം ഉദിക്കുന്നില്ല. ബിഹാറിലെ സമസ്തിപുര്‍ ജില്ലയിലെ താജ്പൂരില്‍ മോഡസ്റ്റി സ്‌കൂളില്‍ എട്ടാം ക്ലാസ് വിദ്യാര്‍ത്ഥിയാണ് വൈഭവ് എന്ന് ഇന്ത്യന്‍ എക്‌സ്പ്രസ് റിപോര്‍ട്ട് ചെയ്തു.

'സാറ്ററോളജി' എന്ന അക്കൗണ്ടാണ് വൈഭവ് പത്താം ക്ലാസ് ബോര്‍ഡ് പരീക്ഷയില്‍ തോറ്റതിനെക്കുറിച്ചുള്ള ഒരു പോസ്റ്റ് പങ്കുവെച്ചത്. എന്നാല്‍, ഈ ആക്ഷേപഹാസ്യം പലരും ഗൗരവമായി എടുക്കുകയും അത് ഉടന്‍ തന്നെ സോഷ്യല്‍ മീഡിയയില്‍ വലിയ ചര്‍ച്ചയായി മാറുകയുമായിരുന്നു. അതേ പോസ്റ്റില്‍, 'ഇത് യഥാര്‍ത്ഥ വാര്‍ത്തയല്ല. ഈ പോസ്റ്റും പേജും പൂര്‍ണമായും ആക്ഷേപഹാസ്യമാണ്. ഈ പോസ്റ്റ് വിനോദ ആവശ്യങ്ങള്‍ക്ക് മാത്രമുള്ളതാണ്' എന്ന് വ്യക്തമാക്കുന്നുണ്ട്.

ലാ ലിഗ 2024-25 കിരീടം ചൂടി ബാഴ്സലോണ; എസ്പാന്യോളിനെ ഇരട്ട ഗോളിന് കീഴടക്കി
പരിക്ക് കാരണം സഞ്ജു സാംസണ്‍ പുറത്തിരുന്ന മല്‍സരങ്ങളില്‍ രാജസ്ഥാന്‍ റോയല്‍സിനായി ഓപണ്‍ ചെയ്തത് വൈഭവ് ആയിരുന്നു. മെയ് 17ന് ഐപിഎല്‍ 2025 സീസണ്‍ പുനരാരംഭിക്കുന്നതോടെ വൈഭവ് വീണ്ടും ശ്രദ്ധാകേന്ദ്രമാകും. രാജസ്ഥാന്‍ റോയല്‍സ് പ്ലേഓഫ് മത്സരത്തില്‍ നിന്ന് ഇതിനകം പുറത്തായെങ്കിലും രണ്ട് മല്‍സരങ്ങള്‍ കൂടി ശേഷിക്കുന്നു. ഈ മാച്ചുകളില്‍ സഞ്ജു തിരിച്ചെത്തുമെന്നതിനാല്‍ പ്ലെയിങ് ഇലവനില്‍ വൈഭവ് ഉണ്ടാവാനിടയില്ല.