സഞ്ജു ഇല്ലാതെ നിർണായക ടീം ചർച്ച; സൂപ്പർ ഓവറിലെ വീഴ്ചയ്ക്ക് കാരണം ദ്രാവിഡോ? വൈറലായി വീഡിയോ

Edited byഅനുഷ ഗംഗാധരൻ | Samayam Malayalam | Updated: 18 Apr 2025, 5:48 pm

ജയ്പൂർ : ഐപിഎൽ 2025ൽ ദയനീയ പ്രകടനം കാഴ്ചവെക്കുന്ന ടീമാണ് രാജസ്ഥാൻ റോയൽസ്. കഴിഞ്ഞ സീസണുകളിൽ എല്ലാംതന്നെ സഞ്ജുവിന്റെ പ്രകടനത്തിലും ക്യാപ്റ്റൻസിയിലും മനം നിറഞ്ഞ ആരാധകർ ഇപ്പോൾ ടീമിനെ വിമർശിച്ചുകൊണ്ട് രംഗത്തെത്തുകയാണ്. സൂപ്പർ ഓവറിലേക്ക് കടന്ന രാജസ്ഥാൻ റോയൽസ് - ഡൽഹി ക്യാപിറ്റൽസ് മത്സരത്തിൽ സഞ്ജുവിന്റെ ടീം പരാജയപ്പെട്ടതിന്റെ പ്രധാനകാരണം തീരുമാനങ്ങൾ എടുത്തതിലെ വീഴ്ചകളാണ്. ഈ വീഴ്ചകൾ ചൂണ്ടിക്കാണിച്ച് ആരാധകർ തന്നെ രംഗത്തെത്തുന്നു. സഞ്ജു അറിഞ്ഞിട്ട് തന്നെയാണോ ഈ തീരുമാനങ്ങൾ റോയൽസ് എടുത്തത് എന്ന ചോദ്യവും അന്ന് ആരാധകർ ചോദിച്ചിരുന്നു. ടി20യിൽ പുതു റെക്കോഡിട്ട് അഭിഷേക് ശർമ; പിന്നിലുള്ളത് തിലക് വർമയും സായി സുദർശനും
ഇപ്പോഴിതാ അന്ന് സൂപ്പർ ഓവറിനു തൊട്ടുമുൻപ് റോയൽസ് നടത്തിയ നിർണായക ടീം ചർച്ചയിൽ നിന്ന് മാറി നിൽക്കുന്ന സഞ്ജുവിന്റെ വീഡിയോ വൈറലാവുകയാണ്. ടീമിന്റെ പുതിയ കോച്ച് ആയ രാഹുൽ ദ്രാവിഡിന് സഞ്ജുവിനോട് അതൃപ്തിയുണ്ടെന്ന തരത്തിലുള്ള അഭ്യൂഹങ്ങൾ സമൂഹമാധ്യമങ്ങളിൽ ഉയർന്നിരുന്നു. അതിന് ആക്കം കൂട്ടുന്ന തരത്തിലുള്ള വീഡിയോ ആണ് ഇപ്പോൾ പുറത്തുവന്നത്. മത്സരം ടൈ ആകുകയും ഇരു ടീമുകളും പെട്ടന്ന് തന്നെ ഗ്രൂപ്പ് ചർച്ച ആരംഭിക്കുകയും ചെയ്‌തു.
രാജസ്ഥാൻ റോയൽസ് താരങ്ങൾ കോച്ച് രാഹുൽ ദ്രാവിഡിന് അരികിലേക്ക് പോവുകയും ചർച്ച ചെയുകയും ചെയ്തു. ക്യാപ്റ്റൻ എന്ന നിലയിൽ സഞ്ജു സാംസൺ നിർണായക തീരുമാനങ്ങൾ എടുക്കേണ്ട ഗ്രൂപ്പ് ചർച്ച തന്നെയായിരുന്നു അത്. എന്നാൽ ടീം ചർച്ചയിൽ ഉൾപ്പെടാതെ മാറി നടക്കുന്ന സഞ്ജുവിനെയാണ് കാണാൻ സാധിച്ചത്. ടീം ചർച്ചയിലേക് വരാൻ സഹതാരം കൈകൊണ്ട് ആംഗ്യം കാണിക്കുന്നതും തിരിച്ച് വരുന്നില്ല എന്ന് സഞ്ജു ആംഗ്യം കാണിക്കുന്നതും വിഡിയോയിൽ വ്യക്തമായി കാണാം. ഈ വീഡിയോ ആണ് സമൂഹ മാധ്യമങ്ങളിൽ വൈറലാകുന്നത്.

രാഹുൽ ദ്രാവിഡ് കഴിഞ്ഞ വർഷം നടന്ന മെഗാ താരലേലം നടക്കുന്നതിന് മാസങ്ങൾക്ക് മുൻപാണ് രാജസ്ഥാൻ ക്യാമ്പിലെത്തുന്നത്. താരങ്ങളെ റിടെയിൻ ചെയ്യുന്നതിൽ വരെ പരിശീലകൻ രാഹുൽ ദ്രാവിഡിന് നിർണായക പങ്കുണ്ടായിരുന്നു. എന്നാൽ റിടെയിൻ ചെയ്ത ലിസ്റ്റിൽ സഞ്ജുവിന്റെ വിശ്വാസികൾ ഇല്ല എന്നത് അന്നേ ചർച്ചയായിരുന്നു. ജോസ് ബട്ലറും ചഹലും ആർ അശ്വിനും എല്ലാം താരലേലത്തിലൂടെ മറ്റ് ടീമുകളിലേക്ക് എത്തി.

അതേസമയം സൂപ്പർ ഓവറിൽ രാജസ്ഥാൻ എടുത്ത തീരുമാനങ്ങൾ ആരാധകരെ വരെ ചൊടിപ്പിച്ചിരുന്നു. ഹെറ്റ്മയറെ തന്നെ എന്തിന് സൂപ്പർ ഓവറിലും പറഞ്ഞയച്ചു അതിന് പകരം ജയ്‌സ്വാളിനെ ആയിരുന്നില്ലേ പറഞ്ഞയക്കേണ്ടത് തുടങ്ങി വിമർശങ്ങൾ ഒന്നിന് പുറകെ ഒന്നായി വന്നു. സഞ്ജു ഇതൊന്നും അറിഞ്ഞില്ലേ എന്നും അന്ന് ചോദ്യം ഉയർന്നു. ആ ചോദ്യത്തിനുള്ള ഉത്തരം എന്ന വിധമാണ് ഇപ്പോൾ ഈ വീഡിയോ പ്രചരിക്കുന്നത്.