സഞ്ജു ചെന്നൈയിലേക്കും പകരം അശ്വിൻ രാജസ്ഥാനിലേക്കും എത്തുമോ? താരങ്ങളുടെ വീഡിയോ ചർച്ചയാക്കി ആരാധകർ

Authored by: ലിജിൻ കടുക്കാരം|Samayam Malayalam•9 Aug 2025, 11:57 am

ക്രിക്കറ്റ് ലോകത്ത് ഇപ്പോഴത്തെ പ്രധാന ചർച്ച സഞ്ജു സാംസൺ ഐപിഎൽ ടീം മാറുമോ എന്നതാണ്. രാജസ്ഥാന്‍ റോയല്‍സില്‍ നിന്ന് മാറാനും പുതിയ ടീമിനുവേണ്ടി കളിക്കാനും സഞ്ജു ആഗ്രഹം പ്രകടിപ്പിച്ചെന്ന റിപ്പോർട്ടുകൾ പുറത്തുവന്നതോടെ ആ ടീം ഏതാകുമെന്ന ചർച്ചകളിലാണ് ആരാധകർ. അതിനിടെ മുൻ ഇന്ത്യൻ താരം ആർ അശ്വിനും ടീം മാറുകയാണെന്ന റിപ്പോർട്ടുകൾ പുറത്തുവന്നു. ഇതോടെ സഞ്ജുവിന് പകരം അശ്വിൻ വീണ്ടും രാജസ്ഥാനിലേക്ക് മടങ്ങിയെത്തുമോ എന്നായി ചർച്ചകൾ. അശ്വിനും സഞ്ജു സാംസണും തമ്മിലുള്ള അഭിമുഖത്തിൻ്റെ ടീസർ പുറത്തുവന്നതോടെ ഈ അഭ്യൂഹങ്ങൾക്കെല്ലാം പുതിയമാനം വന്നിരിക്കുകയാണ്. ഞാൻ കേരളത്തിൽ നിൽക്കുകയാണെങ്കിൽ നിനക്ക് ചെന്നൈയിലേക്ക് പോകാം എന്ന അശ്വിൻ്റെ വാക്കുകൾ ഐപിഎൽ ട്രേഡുമായി ബന്ധപ്പെട്ടാണെന്നാണ് ആരാധകർ പറയുന്നത്. കേരളം എന്നത് രാജസ്ഥാൻ റോയൽസിനെയാണോ അശ്വിൻ ഉദ്ദേശിക്കുന്നത് എന്ന് ചൂണ്ടിക്കാട്ടിയാണ് ഈ പരാമർശം.
അശ്വിന്‍ സിഎസ്‌കെ വിടുന്നു, ഡയറക്ടര്‍ സ്ഥാനമൊഴിയുമെന്നും റിപോര്‍ട്ട്; സ്പിന്നറുടെ മനസ്സിലിരിപ്പ് ഇങ്ങനെ
എനിക്ക് ഒരുപാട് ചോദ്യങ്ങൾ ചോദിക്കാനുണ്ട്. എന്നാൽ അതിന് മുമ്പ് ഞാൻ ഇപ്പോൾ തന്നെ ട്രേഡ് ചെയ്യാമെന്ന് കരുതുന്നു. എനിക്ക് കേരളത്തിൽ നിൽക്കുന്നതിൽ സന്തോഷം മാത്രമേയുള്ളൂ. ഒരുപാട് അഭ്യൂഹങ്ങൾ പുറത്ത് നടക്കുന്നുണ്ട്, എനിക്കും ഒന്നും അറിയില്ല. എന്നാൽ ഞാൻ കേരളത്തിൽ നിൽക്കുകയാണെങ്കിൽ നിനക്ക് ചെന്നൈയിലേക്ക് യാത്ര ചെയ്യാം. എന്നാണ് അശ്വിൻ പറയുന്നത്.

തൻ്റെ യൂട്യൂബ് ചാനലിലെ കുട്ടി സ്‌റ്റോറി എന്ന പ്രോഗ്രാമിൽ നടത്തിയ അഭിമുഖത്തിൻ്റെ ടീസറിലാണ് ആർ അശ്വിൻ ഇക്കാര്യങ്ങൾ പറയുന്നത്. ഇതോടെ മുൻ രാജസ്ഥാൻ റോയൽസ് താരമായ അശ്വിൻ ടീമിലേക്ക് മടങ്ങിയെത്തുമെന്നും സഞ്ജു ചെന്നൈയിലേക്ക് പോകും എന്നുള്ള അഭ്യൂഹം ശക്തമായിരിക്കുകയാണ്. സഞ്ജുവിനെ ചെന്നൈക്ക് കൈമാറണമെങ്കിൽ പകരം താരങ്ങളെ വേണമെന്നാണ് രാജസ്ഥാൻ്റെ നിലപാടെന്ന് നേരത്തെ റിപ്പോർട്ടുകളുണ്ടായിരുന്നു. ഇതുമായി ബന്ധപ്പെടുത്തിയാണ് സോഷ്യൽ മീഡിയയിലെ ചർച്ചകൾ.
സഞ്ജുവിന് വേണ്ടി സിഎസ്‌കെയുടെ നീക്കം; പകരം രണ്ട് താരങ്ങളെ വേണമെന്ന് രാജസ്ഥാന്‍ റോയല്‍സ്, ഇല്ലെങ്കില്‍ ലേലം
അശ്വിന്‍ ചെന്നൈ സൂപ്പര്‍ കിങ്‌സുമായി വേര്‍പിരിയുകയാണെന്ന റിപ്പോർട്ട് കഴിഞ്ഞദിവസമാണ് പുറത്തുവന്നത്. സിഎസ്‌കെ അക്കാദമിയിലെ ഡയറക്ടര്‍ ഓഫ് ഓപറേഷന്‍സ് സ്ഥാനവും അദ്ദേഹം ഒഴിയുമെന്നാണ് വാർത്തകൾ. പുതിയ സീസണിലെ തൻ്റെ പദ്ധതികള്‍ അശ്വിൻ ഫ്രാഞ്ചൈസിയെ അറിയിച്ചതായി ക്രിക്ക്ബസാണ് റിപ്പോര്‍ട്ട് ചെയ്തത്. കഴിഞ്ഞ വര്‍ഷത്തെ മെഗാ ലേലത്തിലാണ് രാജസ്ഥാനിൽ നിന്നും അശ്വിൻ വീണ്ടും സിഎസ്‌കെയില്‍ എത്തുന്നത്. 9.75 കോടി രൂപയ്ക്കാണ് അശ്വിനെ ചെന്നൈ വാങ്ങിയത്.