സുപ്രധാന നാഴികക്കലിനരികെ കെഎൽ രാഹുൽ; 79 റൺസ് കൂടി സ്വന്തമാക്കിയാൽ ചരിത്ര നേട്ടം

Edited byഅനുഷ ഗംഗാധരൻ | Samayam Malayalam | Updated: 18 Apr 2025, 1:54 pm

ഡൽഹി: 2025 ഇന്ത്യൻ പ്രീമിയർ ലീഗിൽ മികച്ച ഫോമിലുള്ള താരങ്ങളുടെ പട്ടികയിൽ മുൻപന്തിയിൽ തുടരുന്ന താരമാണ് വിക്കറ്റ് കീപ്പർ ബാറ്റർ കെ എൽ രാഹുൽ. ഐപിഎൽ മെഗാ താരലേലത്തിലൂടെ ഡൽഹി ക്യാപിറ്റൽസിൽ എത്തിയ താരം ഒരു മത്സരത്തിൽ ഏറ്റവും കൂടുതൽ റൺസ് നേടിയ പട്ടികയിൽ ആറാമതുണ്ട്. 93 റൺസാണ് ഈ സീസണിൽ താരം നേടിയ ഏറ്റവും ഉയർന്ന സ്കോർ. ഇപ്പോഴിതാ താരത്തിനെ തേടി മറ്റൊരു റെക്കോഡ് കൂടി എത്തുകയാണ്. 79 റൺസ് കൂടി നേടിയാൽ ഐപിഎല്ലിൽ ആ നിർണായക നേട്ടം രാഹുലിന് സ്വന്തമാകും.
സഞ്ജു ഇല്ലാതെ നിർണായക ടീം ചർച്ച; സൂപ്പർ ഓവറിലെ വീഴ്ചയ്ക്ക് കാരണം ദ്രാവിഡോ? വൈറലായി വീഡിയോ
2013 ൽ റോയൽ ചലഞ്ചേഴ്‌സ് ബാംഗ്ലൂരിന് (ആർസിബി) വേണ്ടി ബാറ്റ് വീശിയാണ് താരം തന്റെ ഐപിഎൽ അരങ്ങേറ്റം കുറിക്കുന്നത്. 2014 ൽ സൺറൈസേഴ്‌സ് ഹൈദരാബാദിൽ എത്തിയെങ്കിലും 2016 ൽ താരം വീണ്ടും ആർസിബിയിലേക്ക് തിരിച്ചെത്തി. ശേഷം 2018 സീസണ് മുന്നോടിയായി നടന്ന മെഗാ താരലേലത്തിലൂടെ രാഹുലിനെ പഞ്ചാബ് സ്വന്തമാക്കി. ശേഷം ലക്‌നൗ താരത്തെ സ്വന്തമാക്കുകയും ഏറ്റവും അവസാനം നടന്ന മെഗാ താരലേലത്തിലൂടെ ഡൽഹിയിലേക്ക് ചേക്കേറുകയും ചെയ്ത രാഹുൽ ഇന്നിപ്പോൾ ഐപിഎല്ലിൽ മറ്റൊരു സുവർണ നേട്ടം സ്വന്തമാക്കാനുള്ള യാത്രയിലാണ്.
ഐപിഎല്ലിൽ ഇതുവരെ 4921 റൺസാണ് കെ എൽ രാഹുൽ നേടിയത്. അതും വെറും 128 ഇന്നിങ്‌സുകളിൽ നിന്ന്. ഇനി 79 റൺസ് കൂടി നേടിയാൽ ഏറ്റവും വേഗത്തിൽ ഐപിഎല്ലിൽ 5000 റൺസ് നേടുന്ന താരമെന്ന റെക്കോഡ് കെഎൽ രാഹുലിന് സ്വന്തമാക്കാം. നിലവിൽ എക്കാലത്തെയും മികച്ച ബാറ്റ്സ്മാൻ ആയ ഡേവിഡ് വാർണറിന്റെ പേരിലാണ് ഈ നേട്ടം ഉള്ളത്. 135 ഇന്നിങ്‌സുകളിൽ നിന്നാണ് ഡേവിഡ് വാർണർ 5000 റൺസ് സ്വന്തമാക്കുന്നത്. 157 ഇന്നിങ്‌സുകളിൽ നിന്ന് 5000 റൺസ് സ്വന്തമാക്കി വിരാട് കോഹ്ലിയാണ് വാർണറിന്‌ തൊട്ടുപിന്നിലുള്ളത്. കെഎൽ രാഹുൽ 79 റൺസ് കൂടി നേടിയാൽ ഈ രണ്ടുപേരെയും മറികടന്ന് ഒന്നാമനാകും. ഡൽഹിയുടെ അടുത്ത മത്സരം ഗുജറാത്ത് ടൈറ്റൻസുമായിയാണ്. ഈ മത്സരത്തിൽ 79 റൺസ് നേടാനായാൽ ഐപിഎല്ലിൽ കെ എൽ രാഹുൽ ചരിത്രം കുറിക്കും. ഏപ്രിൽ 19 രാത്രി 3.30 നാണ് മത്സരം. ഗുജറാത്തിന്റെ ഹോം ഗ്രൗണ്ടായ നരേന്ദ്ര മോഡി സ്റ്റേഡിയത്തിൽ വെച്ചാണ് മത്സരം നടക്കുന്നത്.