സൺറൈസേഴ്സ് ഹൈദരാബാദിന് തലവേദന നൽകി സൂപ്പർ താരത്തിന്റെ ഫോമൗട്ട്; അടുത്ത കളിയിൽ മാറ്റം വരുമെന്ന പ്രതീക്ഷയിൽ ആരാധകർ

Curated byഗോകുൽ എസ് | Samayam Malayalam | Updated: 3 Apr 2025, 3:07 pm

Samayam Malayalamസൺ റൈസേഴ്സ് ഹൈദരാബാദ്

2025 സീസൺ ഐപിഎല്ലിൽ ഉജ്ജ്വല ഫോമിൽ കളിച്ചു തുടങ്ങിയ ടീമാണ് സൺ റൈസേഴ്സ് ഹൈദരാബാദ്. ആദ്യ കളിയിൽ രാജസ്ഥാൻ റോയൽസിന് എതിരെ 286 റൺസ് അടിച്ചുകൂട്ടിയ ടീം 44 റൺസിന്റെ ഗംഭീര ജയവും നേടി. എന്നാൽ ഇതിന് ശേഷമുള്ള രണ്ട് മത്സരങ്ങളിലും അവർ പരാജയപ്പെട്ടു. ഇത് ടീമിന്റെ ആത്മവിശ്വാസത്തെ ബാധിച്ചിട്ടുമുണ്ട്. വ്യാഴാഴ്ച സീസണിലെ നാലാം മത്സരത്തിന് ഇറങ്ങുകയാ‌ണ് ഹൈദരാബാദ്. നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സാണ് ഈ കളിയിൽ ഓറഞ്ച് ആർമിയുടെ എതിരാളികൾ. ഏത് വിധേനയും വിജയവഴിയിലേക്ക് തിരിച്ചെത്തുകയാണ് ഇന്ന് പാറ്റ് കമ്മിൻസിന്റെയും സംഘത്തിന്റെയും ലക്ഷ്യം.


അതേ സമയം സീസണിലെ നാലാം മത്സരത്തിന് ഇറങ്ങുമ്പോൾ ഹൈദരാബാദിന്റെ ഏറ്റവും വലിയ തലവേദനകളിൽ ഒന്ന് സൂപ്പർ താരം അഭിഷേക് ശർമയുടെ ഫോമൗട്ടാണ്. ആദ്യ മൂന്ന് കളികളിൽ നിന്ന് ആകെ 31 റ‌ൺസ് മാത്രമാണ് താരത്തിന് നേടാനായത്. രാജസ്ഥാൻ റോയൽസിന് എതിരായ ആദ്യ കളിയിൽ 24 റൺസ് നേടിയ അഭിഷേക് ശർമ, ലക്നൗ സൂപ്പർ ജയന്റ്സിനെതിരെ ആറ് റൺസിലും, ഡെൽഹി ക്യാപിറ്റൽസിന് എതിരെ ഒരു റൺസിലുമാണ് പുറത്തായത്.

Also Read: രാജസ്ഥാൻ റോയൽസ് കാണിച്ച ഏറ്റവും വലിയ മണ്ടത്തരം, നേട്ടമായത് ഗുജറാത്ത് ടൈറ്റൻസിന്; ഇത്തവണ മിന്നും ഫോമിൽ ജോസ് ബട്ലർ

കഴിഞ്ഞ സീസണിൽ ഹൈദരാബാദിന്റെ ഫൈനലിലേക്കുള്ള കുതിപ്പിൽ നിർണായക പങ്ക് വഹിച്ച താരമായിരുന്നു അഭിഷേക് ശർമ. ട്രാവിസ് ഹെഡിന് ഒപ്പം ഓപ്പണിങ്ങിൽ വെടിക്കെട്ട് തീർത്ത താരം 16 കളികളിൽ 484 റൺസാണ് നേടിയത്. ഇത്തവണ അഭിഷേകിന്റെ ബാറ്റിൽ നിന്ന് റൺസ് വരാത്തത് ഹൈദരാബാദിന്റെ പ്രകടനങ്ങളെയും ബാധിച്ചിട്ടുണ്ട്‌. കൊൽക്കത്തക്ക് എതിരായ കളിയിൽ അഭിഷേകിന്റെ ഫോമിലേക്കുള്ള തിരിച്ചുവരവ് ആരാധകർ വല്ലാതെ ആഗ്രഹിക്കുന്നുണ്ട്.

Also Read: രാജസ്ഥാൻ റോയൽസിന്റെ വമ്പൻ റെക്കോഡ് തകർത്ത് ഗുജറാത്ത് ടൈറ്റൻസ്; ഐപിഎല്ലിൽ കുറിച്ചത് പുതുചരിത്രം

വ്യാഴാഴ്ചത്തെ മത്സരത്തിൽ സൺ റൈസേഴ്സ് ഹൈദരാബാദിന്റെ എതിരാളിയായ കൊൽക്കത്ത നൈറ്റ് റൈഡേഴ്സും ഈ സീസണിൽ അത്ര ഫോമിലല്ല എന്നതാണ് ശ്രദ്ധേയം. കളിച്ച മൂന്ന് മത്സരങ്ങളിൽ ഒന്നിൽ മാത്രമാണ് അവർക്കും ജയിക്കാനായത്. ആർസിബിയോടും, മുംബൈ ഇന്ത്യൻസിനോടും തോറ്റ കെകെആർ, രാജസ്ഥാ‌ൻ റോയൽസിന് എതിരെയാണ് ജയം നേടിയത്.