സൽമാൻ നിസാർ ചെന്നൈ സൂപ്പർ കിങ്സിലേക്ക്? മിഡ് സീസൺ ട്രയൽസിന് വിളിച്ച് ധോണിയുടെ ടീം; ട്വിസ്റ്റ് നടക്കുമോ

Curated byഗോകുൽ എസ് | Samayam Malayalam | Updated: 2 May 2025, 3:34 pm

2025 സീസൺ ഇന്ത്യൻ പ്രീമിയർ ലീഗിൽ ദയനീയ ഫോമിൽ കളിക്കുന്ന ടീമാണ് മഹേന്ദ്ര സിങ് ധോണിയുടെ ചെന്നൈ സൂപ്പർ കിങ്സ്. ആദ്യ 10 കളികളിൽ രണ്ട് വിജയങ്ങൾ മാത്രം നേടാനായ അവർ പ്ലേ ഓഫിലെത്താതെ പുറത്താകുന്ന ആദ്യ ടീം കൂടിയായിരുന്നു‌. ഇത്തവണ പ്രതീക്ഷകളെല്ലാം അവസാനിച്ചു കഴിഞ്ഞ ചെന്നൈ അടുത്ത സീസണിനായുള്ള മുന്നൊരുക്കങ്ങൾ ആരംഭിച്ചുകഴിഞ്ഞു. ഇപ്പോളിതാ ഫ്രാഞ്ചൈസി കഴിഞ്ഞയാഴ്ച മിഡ് സീസൺ ട്രയൽസ് നടത്തിയതായും മലയാളി താരം സൽമാൻ നിസാർ ഇതിൽ പങ്കെടുത്തതായും റിപ്പോർട്ടുകൾ വന്നിരിക്കുന്നു‌. മൊത്തം മൂന്ന് കളിക്കാരെയാണ് ചെന്നൈ സൂപ്പർ കിങ്സ് മിഡ് സീസൺ ട്രയൽസിന് വിളിപ്പിച്ചത്‌. സൽമാൻ നിസാറിന് പുറമെ, ഗുജറാത്തിന്റെ വെടിക്കെട്ട് ബാറ്റർ ഉർവിൽ പട്ടേൽ, മുംബൈ ഓൾ റൗണ്ടർ അമൻ ഖാൻ എന്നിവരാണ് ട്രയൽസിൽ പങ്കെടുത്തത്.


കഴിഞ്ഞ സീസണിൽ കേരളത്തിന് വേണ്ടി ഉജ്ജ്വല പ്രകടനം കാഴ്ച വെച്ച താരമാണ് 27 കാരനായ സൽമാൻ നിസാർ. സയ്യിദ് മുഷ്താഖ് അലി ടി20 ട്രോഫിയിൽ ആറ് കളികളിൽ നിന്ന് 169 റൺസായിരുന്നു ഈ ഇടം കൈയ്യൻ ബാറ്റർ നേടിയത്. ഇതിൽ മുംബൈക്ക് എതിരെ 49 പന്തുകളിൽ നിന്ന് 99 റൺസ് നേടിയ ഇന്നിങ്സ് ഏറെ ശ്രദ്ധിക്കപ്പെട്ടു. വിജയ് ഹസാരെ ട്രോഫിയിൽ ആറ് കളികളിൽ നിന്ന് 200 റൺസായിരുന്നു താരം നേടിയത്.

വൈഭവിൻ്റെ പുറത്താകൽ; നിരാശ മറയ്ക്കാനാകാതെ രാഹുൽ ദ്രാവിഡ്; ഹോം വർക്ക് ചെയുന്ന കോച്ചിനെ ഇനി ഡഗ്‌ ഔട്ടിൽ കാണാനാകില്ലെന്ന് സോഷ്യൽ മീഡിയ
കേരളം ചരിത്രത്തിൽ ആദ്യമായി ഫൈനലിൽ എത്തിയ ഇത്തവണത്തെ രഞ്ജി ട്രോഫിയിലും സ്വപ്ന പ്രകടനമായിരുന്നു സൽമാൻ നിസാർ കാഴ്ച വെച്ചത്. 12 കളികളിൽ 628 റൺസാണ് രഞ്ജിയിൽ താരം നേടിയത്. പ്രഥമ കേരള ക്രിക്കറ്റ് ലീഗിലും താരത്തിൽ നിന്ന് മികച്ച പ്രകടനം പിറന്നിരുന്നു.

അതേ സമയം ഇന്ത്യൻ ക്രിക്കറ്റിലെ ഏറ്റവും വേഗതയേറിയ സെഞ്ചൂറിയനാണ് സൽമാൻ നിസാറിന് ഒപ്പം സിഎസ്കെ ട്രയൽസിന് വിളിപ്പിച്ച ഉർവിൽ പട്ടേൽ. സയ്യിദ് മുഷ്താഖ് അലി ട്രോഫിയിൽ ത്രിപുരക്ക് എതിരെ 28 പന്തിലാണ് താരം സെഞ്ചുറി നേടിയത്. വെടിക്കെട്ട് ബാറ്റിങ്ങിന് പേരുകേട്ട ഉർവിൽ പട്ടേൽ വിക്കറ്റ് കീപ്പർ കൂടിയാണ്. ട്രയൽസിൽ കളിച്ച ആദ്യ ഇ‌ന്നിങ്സിൽ 20 പന്തിൽ നിന്ന് 41 റൺസ് ഉർവിൽ പട്ടേൽ നേടിയെന്നാണ് വിവരം. രണ്ട് സിക്സറുകളും താരം പറത്തി‌.

ചെന്നൈ സൂപ്പർ കിങ്സ് ആ രണ്ട് സൂപ്പർ താരങ്ങളെ ഒഴിവാക്കും? ടീമിൽ വമ്പൻ മാറ്റങ്ങൾ വന്നേക്കാം, സൂചന നൽകി ബംഗാറും
ട്രയൽസിലെ രണ്ടാമിന്നിങ്സിൽ 20 പന്തിൽ 50 റൺസാണ് താരം സ്കോർ ചെയ്തത്. മൂന്ന് സിക്സറുകളും ഈ സമയം താരം നേടി. ചെന്നൈ സൂപ്പർ കിങ്സ് ഇതിന് മുൻപ് നടത്തിയ ട്രയൽസിലും ഉർവിൽ പട്ടേൽ പങ്കെടുത്തിരുന്നു. അന്ന് മുംബൈയിൽ നിന്നുള്ള ആയുഷ് മാത്രെക്കായിരുന്നു സിഎസ്കെ കരാർ നൽകിയത്.