2 months ago
4
Authored by: ഋതു നായർ|Samayam Malayalam•26 Oct 2025, 5:57 pm
പരാജയങ്ങൾക്ക് വിട, ആയുഷ് ശർമ്മ പുതിയ പാതയിൽ. ഇന്ത്യയിലെ ശ്രദ്ധേയരായ നിർമാണ കമ്പനിക്കൊപ്പം ആയുഷ് എത്തുമ്പോൾ പ്രതീക്ഷയിലാണ് ആരാധകർ
(ഫോട്ടോസ്- Samayam Malayalam)2018 ൽ സൽമാൻ ഖാൻ നിർമിച്ച ലവ് യാത്രി എന്ന ചിത്രത്തിലൂടെ ബോളിവുഡിൽ അരങ്ങേറ്റം കുറിച്ച ആയുഷിന് പക്ഷേ ഇൻഡസ്ട്രി ഭരിക്കുന്ന അളിയന്റെ വിലാസം കൊണ്ട് അല്പം പോലും ഗുണമുണ്ടായില്ല. 2021 ൽ സൽമാൻ ഖാൻ തന്നെ ആയുഷിനു വേണ്ടി രണ്ടാമതും പണം മുടക്കിയെങ്കിലും നിരാശയായിരുന്നു ഫലം. ആന്റിം എന്ന രണ്ടാമത്തെ ചിത്രവും പരാജയപ്പെട്ടു. 2024 ൽ റുസ്ലാൻ എന്ന സിനിമയിലൂടെ താരത്തിന് മൂന്നാമതൊരു ശ്രമത്തിനവസരം നൽകിയത് രുദ്രപതി രമണ റാവു ആയിരുന്നെങ്കിലും ഫലം മറ്റൊന്നായിരുന്നില്ല.
പിറന്നാൾ ദിനമായ ഇന്ന് പീപ്പിൾ മീഡിയ ഫാക്ടറിയുമായി സഹകരിച്ച് ഒരു പാൻ ഇന്ത്യ ചലച്ചിത്രത്തിൽ താൻ നായകനാകാൻ പോകുന്നു എന്ന് ആയുഷ് ശർമ്മ വെളിപ്പെടുത്തി. മിറായ്, ഗൂഡാചാരി എന്നീ ചിത്രങ്ങൾ നിർമ്മിക്കുക വഴി ദേശീയതലത്തിൽ ശ്രദ്ധിക്കപ്പെട്ട പീപ്പിൾ മീഡിയ ഫാക്ടറി; പ്രഭാസിന്റെ പാൻ ഇന്ത്യ ചിത്രം രാജാ സാഹിബ് നിർമാതാക്കൾ കൂടിയാണ്. തന്റെ ജീവിതത്തിലെ പുതിയ അധ്യായത്തിലേയ്ക്കുള്ള ചുവടു വെയ്പ്പാകും ഈ പാൻ ഇന്ത്യ ചിത്രമെന്നും താരം അഭിപ്രായപ്പെട്ടു.
"സ്വപ്നതുല്യമായ ഒരു പദ്ധതിക്കായി പീപ്പിൾ മീഡിയ ഫാക്ടറിയുമായി സഹകരിക്കുന്നത് എന്നെ സംബന്ധിച്ച്, ഒരു വലിയ ബഹുമതിയാണ്. കഴിഞ്ഞ കുറച്ച് വർഷങ്ങളായി ഞാൻ അവർ നിർമ്മിക്കുന്ന സിനിമകൾ കാണുന്നുണ്ട്, അവയെല്ലാം എനിക്ക് നൽകിയത് ഒരു സിനിമാറ്റിക് ട്രീറ്റാണ്." ആയുഷ് പറഞ്ഞു.
"ഇന്ത്യൻ സിനിമയിൽ അതിരുകളില്ലാതാക്കി തീർക്കുന്ന നിർമാണ കമ്പനികളിൽ ഒന്നാണ് പീപ്പിൾ മീഡിയ ഫാക്ടറി എന്ന് ഞാൻ വിശ്വസിക്കുന്നു. ഞാൻ ഈ യാത്രയിൽ ആവേശഭരിതനാണ്." അദ്ദേഹം കൂട്ടിച്ചേർത്തു. 2019 മുതൽ മാറ്റിവച്ച ആക്ഷൻ ചിത്രമായ ഇസബെൽ കൈഫിനൊപ്പം ക്വാത എന്ന ചിത്രവും റിലീസ് ആകുമെന്ന് വാർത്തകൾ സൂചിപ്പിക്കുന്നുണ്ട്. കഴിഞ്ഞ അഞ്ചു പതിറ്റാണ്ടിലേറെയായി ഹിമാചൽ രാഷ്ട്രീയത്തിലെ ശക്തമായ സാന്നിധ്യമാണ് ആയുഷിന്റെ കുടുംബം. ഇന്ത്യയിലെ ശ്രദ്ധേയരായ നിർമാണ കമ്പനിക്കൊപ്പം സഹകരിക്കുന്നത് വഴി വെള്ളിത്തിരയിൽ വിജയിക്കാൻ താരത്തിന് സാധിക്കുമോ എന്നതാണ് നിരൂപകർ ഉറ്റു നോക്കുന്ന കാര്യം
English (US) ·