ഹാർദിക് പാണ്ഡ്യ എന്താണ് ഈ കാണിച്ചത്, ക്യാപ്റ്റനെ കൂവി മുംബൈ ഇന്ത്യൻസ് ആരാധകർ; വാംഖഡെയിൽ നടന്നത് ഇങ്ങനെ

Curated byഗോകുൽ എസ് | Samayam Malayalam | Updated: 7 May 2025, 2:06 am

ഐപിഎല്ലിലെ കിടിലൻ ത്രില്ലറിൽ മുംബൈ ഇന്ത്യൻസിനെ തോൽപ്പിച്ചിരിക്കുകയാണ് ഗുജറാത്ത് ടൈറ്റൻസ്. ആവേശം അവസാന പന്തിലേക്ക് നീണ്ട കളിയിലായിരുന്നു മുംബൈ ഇന്ത്യൻസ് തോറ്റത്‌. മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് നിശ്ചിത 20 ഓവറുകളിൽ 155/8 എന്ന സ്കോർ നേടി. മഴ ഇടക്ക്‌ വില്ലനായ കളിയിൽ 19 ഓവറിൽ 147 റൺസാണ് ഗുജറാത്തിന് ജയിക്കാൻ വേണ്ടിയിരുന്നത്. അവസാന പന്തിൽ അവർ ജയം സ്വന്തമാക്കി‌.അതേ സമയം മുംബൈ ഇന്ത്യൻസ് നായകൻ ഹാർദിക് പാണ്ഡ്യ മറക്കാൻ മാത്രം ആഗ്രഹിക്കുന്ന മത്സരമായിരുന്നു ഇത്. ബാറ്റിങ്ങിൽ മൂന്ന് പന്തിൽ ഒരു റൺസെടുത്ത് പുറത്തായ താരം ബൗളിങ്ങിലും ഫ്ലോപ്പായി. ഹാർദിക്കിന്റെ കരിയറിലെ തന്നെ ഏറ്റവും മോശം ഓവറുകളൊന്നായിരുന്നു ഗുജറാത്തിനെതിരെ അദ്ദേഹം എറിഞ്ഞത്.


ഗുജറാത്ത് ഇന്നിങ്സിന്റെ എട്ടാം ഓവറിലായിരുന്നു ഹാർദിക് പന്തെറിയാൻ എത്തിയത്. രണ്ട് നോബോളുകളും മൂന്ന് വൈഡ് ബോളുകളുമടക്കം 11 പന്തുകളാണ് ഈ ഓവറിൽ ഹാർദിക് എറിഞ്ഞത്. വഴങ്ങിയതാകട്ടെ 18 റൺസും. ഓവർ പൂർത്തിയാക്കാൻ 11 പന്തുകൾ എടുത്തതോടെ ഐപിഎല്ലിലെ ഏറ്റവും ദൗർഘ്യമേറിയ ഓവറെന്ന നാണക്കേട് ഹാർദിക്കിന്റെ കൂടി പേരിലായി. തുഷാർ ദേഷ്പാണ്ടെ, ഷർദുൽ താക്കൂർ, സന്ദീപ് ശർമ, മുഹമ്മദ് സിറാജ് എ‌ന്നിവരാണ് 11 പന്തുകൾ നീണ്ട ഓവറുകൾ എറിഞ്ഞ് ഐപിഎല്ലിൽ ഇതിന് മുമ്പ് നാണം കെട്ടിട്ടുള്ളത്.

മഴയ്ക്കും തോല്‍പ്പിക്കാനാവാത്ത പോരാട്ട വീര്യം, മുംബൈക്കെതിരേ അവസാന പന്തില്‍ വിജയം; ഗുജറാത്ത് ടൈറ്റന്‍സ് വീണ്ടും ഒന്നാമത്
ഹാർദിക്കിന്റെ മോശം ഓവർ മുംബൈ ഇന്ത്യൻസിന്റെ ആരാധകരെയും കട്ടകലിപ്പിലാക്കി. ഈ ഓവറിനിടെ വാംഖഡെ സ്റ്റേഡിയത്തിൽ താരത്തിന് എതിരെ കൂക്കുവിളികൾ ഉയർന്നു. ഹാർദികിന്റെ ഓവറിൽ ശുഭ്മാൻ ഗിൽ ഒരു സിക്സർ കൂടി നേടിയതോടെ ഈ കൂക്കുവിളികൾ കൂടുതൽ ഉച്ചത്തിലായി.

മുംബൈ ഇന്ത്യൻസിന് വേണ്ടി കളിച്ചത് 13 പേർ, കാരണം ആ ക്രിക്കറ്റ് നിയമം; നിർണായക മത്സരത്തിൽ പക്ഷേ ടീമിന് തോൽവി
അതേ സമയം മുംബൈ ഇന്ത്യൻസിന് എതിരായ ജയത്തിലൂടെ പോയിന്റ് പട്ടികയിൽ ഒന്നാം സ്ഥാനത്തേക്ക് കയറാൻ ഗുജറാത്ത് ടൈറ്റൻസിനായി. നിലവിൽ 11 കളികളിൽ 16 പോയിന്റാണ് അവർക്കുള്ളത്. ഒരു കളിയിൽ കൂടി വിജയിക്കാനാൽ പ്ലേ ഓഫ് യോഗ്യത ഉറപ്പിക്കാൻ ഗില്ലിനും ടീമിനുമാകും. പ്ലേ ഓഫ് യോഗ്യതയിലേക്കും അവർ വളരെ അടുത്തു. മുംബൈ ഇന്ത്യൻസാകട്ടെ തോൽവിയോടെ പോയിന്റ് പട്ടികയിൽ നാലാം സ്ഥാനത്തായി. 12 കളികളിൽ 14 പോയിന്റാണ് അവരുടെ സമ്പാദ്യം.