ഹാർദിക് പാണ്ഡ്യയുടെ ആ നീക്കം മുംബൈ ഇന്ത്യൻസ് ഉടമയേയും കലിപ്പിലാക്കി; ത്രില്ലർ പോരിനിടെ നടന്നത് ഇങ്ങനെ

Curated byഗോകുൽ എസ് | Samayam Malayalam | Updated: 5 Apr 2025, 1:38 am

Samayam Malayalamഹാർദിക് പാണ്ഡ്യ

ഐപിഎല്ലിലെ മറ്റൊരു ത്രില്ലർ പോരിന് ഒടുവിൽ പരാജയം ഏറ്റുവാങ്ങിയിരിക്കുകയാണ് മുംബൈ ഇന്ത്യൻസ്. വെള്ളിയാഴ്ച ലക്നൗ സൂപ്പർ ജയന്റ്സിന് എതിരെ നടന്ന കളിയിൽ 12 റൺസിന്റെ പരാജയമാണ് മുംബൈ ഇന്ത്യൻസ് നേരിട്ടത്. തിലക് വർമ മോശം ഫോമിനെത്തുടർന്ന് റിട്ടയേഡ് ഔട്ടായ കളിയായിരുന്നു ഇത്. മത്സരത്തിൽ ആദ്യം ബാറ്റ് ചെയ്ത ലക്നൗ സൂപ്പർ ജയന്റ്സ് നിശ്ചിത 20 ഓവറുകളിൽ 203/8 എന്ന സ്കോർ നേടിയപ്പോൾ, മുംബൈ ഇന്ത്യൻസിന്റെ മറുപടി 191/5 ൽ അവസാനിക്കുകയായിരുന്നു.204 റൺസ് വിജയലക്ഷ്യം പിന്തുടർന്ന മുബൈ ഇന്ത്യൻസിന് അവസാന ഓവറിൽ 22 റൺസായിരുന്നു ജയിക്കാൻ വേണ്ടിയിരുന്നത്. ആവേശ് ഖാൻ എറിഞ്ഞ ആദ്യ പന്ത് ഹാർദിക് പാണ്ഡ്യ സിക്സർ പറത്തി. ഇതോടെ മുംബൈയുടെ ലക്ഷ്യം അഞ്ച് പന്തുകളിൽ 16 ആയി. മൂന്നാം പന്ത് ലെഗ് സ്റ്റമ്പിൽ ഒരു ലോ ഫുൾടോസായിരുന്നു. ഡീപ് സ്ക്വയർ ലെഗിലേക്ക് അടിച്ച പന്തിൽ പക്ഷേ സിംഗിൾ ഓടാൻ ഹാർദിക് തയ്യാറായില്ല.


ബാക്കിയുള്ള പന്തുകളിൽ കളി ഫിനിഷ് ചെയ്യാമെന്ന ആത്മവിശ്വസമായിരുന്നു ഇതിന് കാരണം. എന്നാൽ മറുവശത്തുണ്ടായിരുന്ന മിച്ചൽ സാന്റ്നറും മികച്ച ബാറ്ററായിരുന്നു. അത് കൊണ്ടു തന്നെ ആ സിംഗിൾ നിഷേധിച്ച ഹാർദിക്കിന്റെ നീക്കം ആരാധകരെ കലിപ്പിലാക്കി. മൂന്നാം പന്തിൽ സിംഗിൾ ഓടാൻ തയ്യാറാകാതെ ഇരുന്ന ഹാർദിക് പാണ്ഡ്യയുടെ തീരുമാനം മുംബൈ ഇന്ത്യൻസ് ഉടമ ആകാശ് അംബാനിയെപ്പോലും രോഷാകുലനാക്കി. എന്താണ് ഈ കാണിക്കുന്നത് എന്ന തരത്തിൽ ആകാശ് അംബാനി ആംഗ്യം കാണിക്കുന്നത് ക്യാമറ കണ്ണുകൾ ഒപ്പിയെടുത്തു. ഇത് സമൂഹ മാധ്യമങ്ങളിൽ വൈറലുമായി.

Also Read: അടുത്ത കളിക്ക് മുൻപ് സഞ്ജുവിന്റെ രാജസ്ഥാൻ റോയൽസിന് തലവേദന നൽകി ഇക്കാര്യങ്ങൾ; ടീമിന്റെ പ്രധാന ആശങ്ക ഇങ്ങനെ

അതേ സമയം മൂന്നാം പന്തിൽ സിംഗിൾ ഓടാൻ ഹാർദിക് കൂട്ടാക്കാതെ ഇരുന്നതോടെ ടീമിന്റെ വിജയലക്ഷ്യം 3 പന്തിൽ 14 റൺസായി. നാലാം പന്ത് ഡോട്ടാക്കി ആവേശ് ഖാൻ ഹാർദിക് പാണ്ഡ്യയെയും മുംബൈയെയും നിരാശയിലേക്ക് തള്ളിയിട്ടു. അഞ്ചാം പന്തിൽ സിംഗിൾ നേടി അവസാനം ഹാർദിക് സ്ട്രൈക്ക് സാന്റ്നറിന് കൈമാറി. സാന്റ്നർ നേരിട്ട അവസാന പന്തും ഡോട്ട് ആയതോടെ ലക്നൗ കളിയിൽ 12 റൺസിന്റെ ആവേശ ജയം ഉറപ്പിച്ചു.

മുംബൈ ഇന്ത്യൻസ് - ലക്നൗ സൂപ്പർ ജയന്റ്സ് മത്സരം ഇ‌ങ്ങനെ: മത്സരത്തിൽ ആദ്യം ബാറ്റ് ചെയ്ത ലക്നൗ സൂപ്പർ ജയന്റ്സ് നിശ്ചിത 20 ഓവറുകളിൽ 203/8 എന്ന കിടിലൻ സ്കോറാണ് നേടിയത്. 31 പന്തിൽ 60 റൺസ് നേടിയ മിച്ചൽ മാർഷും, 38 പന്തിൽ 53 റ‌ൺസെടുത്ത ഐഡൻ മാർക്രവുമാണ് ലക്നൗ നിരയിൽ മിന്നിയത്. മുംബൈ ഇന്ത്യൻസിനായി ഹാർദിക് പാണ്ഡ്യ അഞ്ച് വിക്കറ്റുകളെടുത്ത് ബൗളിങ്ങിൽ തിളങ്ങി.

Also Read: മോശം ഫോമിൽ റിട്ടയേഡ് ഔട്ടായി തിലക് വർമ, ഐപിഎല്ലിൽ നാടകീയ രംഗങ്ങൾ; എന്നിട്ടും ടീമിന് തോൽവി, ലക്നൗവിന് ആവേശ‌ ജയം

204 റൺസ് വിജയലക്ഷ്യം പിന്തുടർന്ന മുംബൈ ഇന്ത്യൻസ് 24 പന്തിൽ 46 റൺസ് നേടിയ നമൻ ധിറിന്റെയും, 43 പന്തിൽ 67 റൺസെടുത്ത സൂര്യകുമാർ യാദവിന്റെയും നേതൃത്വത്തിൽ വിജയത്തിലേക്ക് കുതിക്കുമെന്ന് തോന്നിപ്പിച്ചെങ്കിലും തിലക് വർമയുടെ മെല്ലെപ്പോക്കൻ ഇന്നിങ്സ് കളിയിൽ അവരെ ബാക്ക്ഫുടിലാക്കുകയായിരുന്നു. ഇതോടെ 20 ഓവറുകളിൽ 191/5 എന്ന സ്കോറിൽ അവരുടെ ഇന്നിങ്സ് അവസാനിച്ചു.