20 ഓവറിൽ 300 റൺസടിച്ച് ആർസിബി, ഇൻട്രാ സ്ക്വാഡ് കളിയിൽ ബാറ്റിങ് വെടിക്കെട്ട്; ഇഷാൻ കിഷനും മിന്നും ഫോമിൽ

Curated byഗോകുൽ എസ് | Samayam Malayalam | Updated: 20 Mar 2025, 12:46 am

Samayam Malayalamആർസിബി താരങ്ങൾ

2025 സീസൺ ഇന്ത്യൻ പ്രീമിയർ ലീഗ് ഈ മാസം 22 ന് തുടങ്ങാനിരിക്കുകയാണ്. ഏതാനും ദിവസ‌ങ്ങൾ മാത്രം ബാക്കി നിൽക്കെ ലീഗിനായുള്ള അവസാന വട്ട മുന്നൊരുക്കത്തിലാണ് ടീമുകൾ. അതിനിടെ ഫ്രാഞ്ചൈസികളെല്ലാം ഇൻട്രാ സ്ക്വാഡ് പരിശീലന മത്സരങ്ങളും സംഘടിപ്പിക്കുന്നുണ്ട്. ഇപ്പോളിതാ ആർസിബിയുടെ ഇൻട്രാ സ്ക്വാഡ് മത്സരത്തിലെ സ്കോറാണ്‌ ക്രിക്കറ്റ് ലോകത്ത് ചർച്ചയായിരിക്കുന്നത്.ആർസിബി ടീം രണ്ട് സ്ക്വാഡുകളായി തിരിഞ്ഞ് കളിച്ച പരിശീലന മത്സരത്തിൽ ഒരു ടീം 20 ഓവറിൽ 300 റൺസ് നേടിയെന്നാണ് റിപ്പോർട്ടുകൾ. ഇത് ഏതൊക്കെ താരങ്ങൾ അടങ്ങിയ ടീമാണെന്ന വിവരം പുറത്തു വന്നിട്ടില്ല. എന്നാൽ ക്യാപ്റ്റൻ രജത് പാട്ടിദാർ ഈ കളിയിൽ 56 റൺസ് നേടിയെന്ന് റിപ്പോർട്ടുകൾ സൂചിപ്പിക്കുന്നു. സീസണിലെ ആദ്യ കളിക്ക് മുൻപ് ആർസിബിക്ക് വലിയ ആവേശം സമ്മാനിക്കുന്ന കാര്യമാണിത്.


ടീമിന്റെ വിദേശ താരമായ ലിയാം ലിവിങ്സ്റ്റൺ 23 റൺസിൽ പുറത്തായെന്നും യുവ പേസർ റാസിഖ് ദർ മികച്ച രീതിയിൽ പന്തെറിഞ്ഞെന്നും റിപ്പോർട്ടുകൾ പറയുന്നു. സീനിയർ താരങ്ങളായ വിരാട് കോഹ്ലിയു., ജോഷ് ഹേസൽവുഡും ഇൻട്രാ സ്ക്വാഡ് മത്സരത്തിൽ കളിച്ചില്ലെന്നാണ് സൂചനകൾ.

Also Read: വെടിക്കെട്ട് സെഞ്ചുറി നേടി റിയാൻ പരാഗ്, ഞെട്ടിച്ച് ജൂറലും ജയ്സ്വാളും; സഞ്ജുവും ടീമും ഇക്കുറി ഡബിൾ സ്ട്രോങ്ങ്

അതേ സമയം സൺ റൈസേഴ്സ് ഹൈദരാബാദിന്റെ ഇൻട്രാ സ്ക്വാഡ് പരിശീലന മത്സരത്തിൽ ഇഷാൻ കിഷൻ ബാറ്റിങ് വെടിക്കെട്ട് നടത്തി. ഇക്കഴിഞ്ഞ മെഗാ താരലേലത്തിൽ വമ്പൻ തുകക്ക് ഹൈദരാബാദിൽ എത്തിയ ഇഷാൻ, എസ്‌ ആർ ച്ച് എ ടീമിന് വേണ്ടി 18 പന്തിൽ 49 റൺസും, പിന്നാലെ എസ്‌ ആർ എച്ച് ബി ടീമിന് വേണ്ടി 33 പന്തിൽ 66 റൺസും സ്കോർ ചെയ്തു. സീസണ് മുൻപ് ഇഷാൻ കിഷൻ ഇത്തരത്തിൽ മിന്നും ഫോമിലായത് ഓറഞ്ച് ആർമിക്ക് സമ്മാനിക്കുന്ന ആവേശം ചെറുതല്ല.

Also Read: ഈ സീസണിൽ രാജസ്ഥാൻ റോയൽസിന്റെ ഇമ്പാക്ട് താരം ഈ മൂന്ന് പേരിൽ ഒരാൾ? സഞ്ജുവും ടീമും രണ്ടും കൽപ്പിച്ച്

ഡെൽഹി ക്യാപിറ്റൽസിന്റെ ഇൻട്രാ സ്ക്വാഡ് മത്സരത്തിൽ നിന്നാണ് മറ്റൊരു പ്രധാന വെടിക്കെട്ടിന്റെ വാർത്ത എത്തിയിരിക്കുന്നത്. ടീമിന്റെ യുവതാരമായ സമീർ റിസ്വി കഴിഞ്ഞ ദിവസം നടന്ന പരിശീലന മത്സരത്തിൽ 106 റൺസാണ് അടിച്ചുകൂട്ടിയത്. മു‌ൻ സീസണിൽ ചെന്നൈ സൂപ്പർ കിങ്സിന്റെ താരമായിരുന്നു റിസ്വി.