21 വര്‍ഷങ്ങള്‍ക്ക് മുന്‍പ് ആദ്യത്തെ ഗിഫ്റ്റ് വാങ്ങിയ സ്ഥലം! 8 വര്‍ഷത്തെ പ്രണയവും, 13 വര്‍ഷത്തെ ദാമ്പത്യവും; വിനീത് ശ്രീനിവാസന്‍ പറയുന്നു

Authored byഅശ്വിനി പി | Samayam Malayalam | Updated: 31 Mar 2025, 12:28 pm

Samayam Malayalamപ്രണയകാലത്തെ കുറിച്ച് വിനീത് ശ്രീനിവാസൻ

തട്ടത്തിന്‍ മറയത്ത്, ഹൃദയം പോലുള്ള മനോഹരമായ ചിത്രങ്ങള്‍ സംവിധാനം ചെയ്ത സംവിധായകനാണ് വിനീത് ശ്രീനിവാസന്‍. ആ പ്രണയത്തിന് ഇന്‍സ്പയറിങ് ആയത് വിനീതിന്റെ യഥാര്‍ത്ഥ ജീവിതത്തിലെ പ്രണയം തന്നെയാണ്. ചെന്നൈയിലെ പഠന കാലത്ത് ദിവ്യ ജീവിതത്തിലേക്ക് വന്നതിനെ കുറിച്ച് പലപ്പോഴും വിനീത് ശ്രീനിവാസന്‍ വാചാലനായിട്ടുണ്ട്. പഴയ കാര്യങ്ങള്‍ പലതും വിലപ്പെട്ട ഓര്‍മകളായി കൊണ്ടുനടക്കുന്ന വ്യക്തി കൂടെയാണ് വിനീത്.

ഇപ്പോഴിതാ പ്രണയിച്ചു നടന്ന സ്ഥലത്തേക്ക് വീണ്ടും എത്തിയപ്പോഴുള്ള ഓര്‍മകള്‍ പങ്കുവച്ച് എത്തിയിരിക്കുകയാണ് വിനീത് ശ്രീനിവാസന്‍. വളരെ കാലങ്ങള്‍ക്ക് ശേഷം ദിവ്യയ്‌ക്കൊപ്പം സ്‌പെന്‍സര്‍ പ്ലാസയില്‍ എത്തി, അവിടെ വച്ച് ഗഗനചാരിയുടെ സംവിധായകന്‍ കൂടെയായ അരുണ്‍ ചന്ദു എടുത്തു തന്ന ഫോട്ടോയ്‌ക്കൊപ്പമാണ് വിനീതിന്റെ പോസ്റ്റ്. ഞങ്ങളുടെ വിവാഹ ഫോട്ടോ എടുത്തും അദ്ദേഹമാണെന്ന് വിനീത് പറയുന്നു.

Also Read: ശരീരത്തില്‍ കാണിക്കാന്‍ പറ്റാത്ത സ്ഥലത്തും എന്റെ പേര് ടാറ്റു ചെയ്തിട്ടുണ്ട്; കുഞ്ഞിന്റെ മനസ്സാണ് ഭര്‍ത്താവിന് എന്ന് വരലക്ഷ്മി

'സ്‌പെന്‍സര്‍ പ്ലാസയുടെ പ്രതാപകാലമൊക്കെ വളരെക്കാലം മുന്‍പേ കഴിഞ്ഞുപോയി. ഇന്ന് അത് അതിന്റെ പഴയകാലത്തിന്റെ ഒരസ്ഥികൂടം മാത്രമാണ്. ഞങ്ങള്‍ ഫേസ് ത്രിയുടെ ബേസ്‌മെന്റില്‍ നില്‍ക്കുമ്പോള്‍, ദിവ്യ മുകളിലത്തെ നിലയിലെ ഒരു കടയിലേക്ക് വിരല്‍ ചൂണ്ടിയിട്ട് പറഞ്ഞു, 'നിങ്ങള്‍ എനിക്ക് ആദ്യമായി സമ്മാനം വാങ്ങി നല്‍കിയത് ആ കടയില്‍ നിന്ന് വാങ്ങിയിട്ടാണ്' എന്ന്.

Also Read: സുജാതയ്ക്ക് ഇന്ന് 62 വയസ്സ്! സൗന്ദര്യത്തിനും ശബ്ദത്തിനും 26 ന്റെ ചെറുപ്പം; 18 ആം വയസ്സില്‍ കല്യാണം, സംഗീത ലോകത്ത് 50 വര്‍ഷങ്ങള്‍!

21 വര്‍ഷങ്ങള്‍, ഓരോ നിമിഷവും ഒരു ഓര്‍മയായി മാറുകയാണ്. സമയം മുന്‍പത്തെക്കാള്‍ വേഗത്തില്‍ മുന്നോട്ട് പോകുന്നു, പക്ഷേ സാരമില്ല. നീയും ഞാനും ഒരുമിച്ച് എപ്പോഴും കൂടെയുണ്ട് എന്നതാണല്ലോ നമ്മളുടെ ഡീല്‍. ആനിവേഴ്‌സറി ആശംസകള്‍ ദിവ്യ' എന്നാണ് വിനീത് ശ്രീനിവാസന്‍ ഇന്‍സ്റ്റഗ്രാമില്‍ കുറിച്ചത്.


എട്ട് വര്‍ഷത്തെ പ്രണയത്തിന് ശേഷമായിരുന്നു 2012 ല്‍ വിനീത് ശ്രീനിവാസന്റെയും ദിവ്യയുടെയും വിവാഹം. 13 വര്‍ഷത്തെ ദാമ്പത്യം, രണ്ട് മക്കളാണ് ദമ്പതികള്‍ക്ക്. സിനിമാ തിരക്കഥയുടെ എഴുത്തിലൊക്കെ വിനീതിന് പിന്തുണയുമായി എന്നും ദിവ്യ കൂടെ തന്നെയുണ്ട്.