39 പന്തിൽ 110 നോട്ടൗട്ട്, ആദ്യ കളിക്ക് മുൻപ് ഞെട്ടിച്ച് ജേക് ഫ്രേസർ മക്ഗർക്; ടീം നേടിയത് 289 റൺസ്, ഡെൽഹിക്ക് ആവേശം

Curated byഗോകുൽ എസ് | Samayam Malayalam | Updated: 21 Mar 2025, 12:15 am

Samayam Malayalamജേക് ഫ്രേസർ മക്ഗർക്

2024 സീസണിലെ ഇന്ത്യൻ പ്രീമിയർ ലീഗിൽ ഡെൽഹി ക്യാപിറ്റൽസിനായി കിടിലൻ പ്രകടനം കാഴ്ച വെച്ച താരമാണ് ജേക് ഫ്രേസർ മക്ഗർക്. ഓപ്പണിങ്ങിൽ വെടിക്കെട്ട് നടത്തിയ താരം ഒൻപത് കളികളിൽ നിന്ന് 36.67 ബാറ്റിങ് ശരാശരിയിലും‌ 234.04 സ്ട്രൈക്ക് റേറ്റിലുമായി 330 റൺസാണ് നേടിയത്. ഇക്കഴിഞ്ഞ ഐപിഎൽ മെഗാ ലേലത്തിൽ ഈ ഓസ്ട്രേലിയൻ താരത്തെ ആർടിഎം ഓപ്ഷൻ ഉപയോഗപ്പെടുത്തി ഡെൽഹി ടീമിലേക്ക് തിരിച്ചെത്തിക്കുകയും ചെയ്തു. ഒൻപത് കോടി രൂപയാ‌ണ് താരത്തിനായി അവർ മുടക്കിയത്. 2025 സീസണിലും ഡെൽഹി ക്യാപിറ്റൽസിന്റെ പ്രധാന പ്രതീക്ഷകളിൽ ഒരാളാണ് ഈ ഓസീസ് വെടിക്കെട്ട് ബാറ്റർ. ഇപ്പോളിതാ സീസണ് മുന്നോടിയായി നടന്ന പരിശീലന മത്സരത്തിൽ വെടിക്കെട്ട് സെഞ്ചുറി നേടി ഞെട്ടിച്ചിരിക്കുകയാണ് ഈ 22 കാരൻ. വെറും 39 പന്തുകളിൽ നിന്ന് 110 റൺസ് നേടി അദ്ദേഹം പുറത്താകാതെ നിന്നെന്നാണ് ഡെൽഹി ക്യാപിറ്റൽസ് ഫ്രാഞ്ചൈസി സ്ഥിരീകരിച്ചിരിക്കുന്നത്.


ഒമ്പത് ഫോറുകളും 10 സിക്സറുകളും അടങ്ങുന്നതായിരുന്നു ഡെൽഹി താരത്തിന്റെ വെടിക്കെട്ട് ഇന്നിങ്സ്.ജേക് ഫ്രേസർ മക്ഗർക് കിടിലൻ സെഞ്ചുറി നേടിയ കളിയിലാകട്ടെ അദ്ദേഹത്തിന്റെ ടീം 289 റൺസ് സ്കോർ ചെയ്തു. സീസണ് തൊട്ടുമുൻപ് ഓസീസ് താരം ഇതുപോലൊരു വെടിക്കെട്ട് നടത്തിയത് ഡെൽഹി ക്യാപിറ്റൽസിന് സമ്മാനിക്കുന്ന ആവേശം ചെറുതല്ല.

Also Read: രാജസ്ഥാൻ റോയൽസിന് പുതിയ ക്യാപ്റ്റൻ, സഞ്ജു ആദ്യ മൂന്ന് മത്സരം കളിക്കുക സ്പെഷ്യലിസ്റ്റ് ബാറ്ററായി മാത്രം

അതേ സമയം ഐപിഎല്ലിൽ ഇതുവരെ കിരീടം നേടാൻ സാധിച്ചിട്ടില്ലാത്ത ഡെൽഹി ക്യാപിറ്റൽസ് ഇക്കുറി അടിമുടി മാറ്റവുമായാണ് എത്തുന്നത്. മെഗാ ലേലം നടന്നതോടെ ടീമിൽ വമ്പൻ അഴിച്ചുപണി വന്നു. കഴിഞ്ഞ സീസണിൽ ടീമിനെ നയിച്ച ഋഷഭ് പന്ത് ഉൾപ്പെടെയുള്ളവർ ഇക്കുറി ടീമിലില്ല. ഇന്ത്യൻ സ്റ്റാർ ഓൾ റൗണ്ടർ അക്സർ പട്ടേലാണ് ഇത്തവണ ഡെൽഹിയുടെ നായകൻ‌. ഈ മാസം 24 നാണ് സീസണിൽ ഡെൽഹിയുടെ ആദ്യ പോരാട്ടം. ലക്നൗ സൂപ്പർ ജയന്റ്സാണ് എതിരാളികൾ.

Also Read: വെടിക്കെട്ട് സെഞ്ചുറി നേടി റിയാൻ പരാഗ്, ഞെട്ടിച്ച് ജൂറലും ജയ്സ്വാളും; സഞ്ജുവും ടീമും ഇക്കുറി ഡബിൾ സ്ട്രോങ്ങ്

2025 സീസൺ ഐപിഎല്ലിൽ ഡെൽഹി ക്യാപിറ്റൽസിന്റെ സ്ക്വാഡ് ഇങ്ങനെ: അക്സർ പട്ടേൽ ( ക്യാപ്റ്റൻ ), കെ എൽ രാഹുൽ, കുൽദീപ് യാദവ്, മിച്ചൽ സ്റ്റാർക്ക്, ടി നടരാജൻ, ട്രിസ്റ്റൻ സ്റ്റബ്സ്, ജേക് ഫ്രേസർ മക്ഗർക്, മുകേഷ് കുമാർ, അഭിഷേക് പോറൽ, അശുതോഷ് ശർമ, മോഹിത് ശർമ, ഫാഫ് ഡുപ്ലെസിസ്, സമീർ റിസ്വി, ഡൊണോവൻ ഫെരേര, ദുഷ്മന്ത ചമീര, വിപ്രജ് നിഗം, കരുൺ നായർ, മാധവ് തിവാരി, മൻവന്ത് കുമാർ, ത്രിപുരാന വിജയ്, ദർഷൻ നൽകണ്ടെ, അജയ് മണ്ഡൽ.