40 വര്‍ഷത്തിനിടയില്‍ ഇത്രയധികം സിനിമകള്‍ ചെയ്തിട്ടും ഒറ്റ സിനിമയിലും മോഹന്‍ലാലും മമ്മൂട്ടിയും അഭിനയിക്കാത്തതിന് കാരണം?

രാജസേനന്‍ , മലയാള സിനിമ സംബന്ധിച്ച് ഹിറ്റുകളുടെ രാജാവായിരുന്നു. ഒന്നിനു പിറകെ ഒന്നായി തന്ന സിനിമകള്‍ എല്ലാം ഇന്നും മലയാളികളെ ചിരിപ്പിക്കുന്നതും രസിപ്പിക്കുന്നതുമാണ്. പ്രത്യേകിച്ചും ജയറാമിനെ നായകനാക്കി ചെയ്ത പതിനാറോളം സിനിമകള്‍. കടിഞ്ഞൂല്‍ കല്യാണം, അയലത്തെ അദ്ദേഹം, മേലെപ്പറമ്പിലെ ആണ്‍വീട്, ശ്രീകൃഷ്ണപുരത്തെ നക്ഷത്രത്തിളക്കം, കൊട്ടാരം വീട്ടിലെ അപ്പൂട്ടന്‍ അങ്ങനെ എത്രയെത്ര ഹിറ്റുകള്‍.

എന്നാല്‍ നാല് പതിറ്റാണ്ടിലെറെയായുള്ള സംവിധാന ജീവിതത്തില്‍ രാജസേനന്റെ ഒരു സിനിമയില്‍ പോലും മലയാളത്തിന്റെ സൂപ്പര്‍സ്റ്റാറുകള്‍ പ്രത്യക്ഷപ്പെട്ടിട്ടില്ല. എന്തുകൊണ്ട് മമ്മൂട്ടിയെയും മോഹന്‍ലാലിനെയും വച്ച് ഒരു സിനിമ പോലും ചെയ്തില്ല എന്ന ചോദ്യത്തിന് രാജസേനന്‍ മറുപടി നല്‍കുന്നു. സമയം മലയാളത്തിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.

Also Read: പബ്ലിക്കിന്റെ മുന്നില്‍ വരുമ്പോള്‍ നല്ല വേഷം ധരിക്കണം, വസ്ത്ര സ്വാതന്ത്ര്യം എന്നാല്‍ എന്ത് വൃത്തികേടും ആവാം എന്നല്ല; ഇന്ദ്രജ പറയുന്നു

മോഹന്‍ലാലിനും മമ്മൂട്ടിയ്ക്കും പറ്റിയ വിധം കഥകള്‍ വരാത്തത് കൊണ്ടാണോ അത് സംഭവിക്കാതെ പോയത് എന്നായിരുന്നു ചോദ്യം. രണ്ടു പേരോടും കഥകള്‍ സംസാരിച്ചിരുന്നു എന്ന് രാജസേനന്‍ വ്യക്തമാക്കി. കൂടുതലും മോഹന്‍ലാലിനൊപ്പമാണ് മൂന്നോ നാവോ ഡിസ്‌കഷന്‍സ് നടത്തിയിട്ടുള്ളത്. മമ്മൂക്കയുമായിട്ട് രണ്ട് തവണ പ്രൊജക്ട് സംസാരിച്ചിട്ടുണ്ട്. മോഹന്‍ലാലുമായി സംസാരിച്ചത് വാസ്തവത്തില്‍ നടക്കാതെ പോയത് ചില തെറ്റിദ്ധാരണകള്‍ കാരണമാണ്.

Also Read: ഞങ്ങള്‍ സന്തുഷ്ടരാണ് എന്ന സിനിമ ഇന്നാണെങ്കില്‍ ചെയ്യില്ല എന്ന് പറഞ്ഞ അഭിരാമി അന്ന് കഥ കേട്ടപ്പോള്‍ പറഞ്ഞ മറുപടി വെളിപ്പെടുത്തി രാജസേനന്‍

അത് മാത്രവുമല്ല, എനിക്ക് ഗ്യാപ് കിട്ടിയിരുന്നില്ല എന്നതും ഒരു കാരണമാണ്. തുടര്‍ച്ചയായി ജയറാം ഡേറ്റുകള്‍ തന്നുകൊണ്ടേയിരിക്കുകയായിരുന്നല്ലോ. ഒരെണ്ണം കഴിഞ്ഞാല്‍ അടുത്തത് എന്ന രീതിയില്‍ ഞാന്‍ തിരക്കിലുമായിരുന്നു. അതുകൊണ്ടാണ് അത് നടക്കാതെ പോയത്. തീര്‍ച്ചയായും മോഹന്‍ലാലിനെയും മമ്മൂട്ടിയെയും വച്ച് ഒരു സിനിമ ചെയ്യുക എന്നത് മലയാളത്തിലെ ഏതൊരു സംവിധായകന്റെയും വലിയ സ്വപ്‌നങ്ങളിലൊന്നാണ്- രാജസേനന്‍ പറഞ്ഞു.

ഇനി അത് നടക്കാനുള്ള സാധ്യതയും ഇല്ലെന്നാണ് രാജസേനന്‍ പറയുന്നത്. കാരണം ഞാന്‍ ഇപ്പോള്‍ പ്ലാനിങില്‍ ഇരിക്കുന്ന രണ്ട് സിനിമകള്‍ ടിപ്പിക്കലാണ്, അതില്‍ വലിയ സ്റ്റാറുകളുടെ ആവശ്യമില്ല. കഥയ്ക്കും കഥാപാത്രങ്ങള്‍ക്കും പ്രാധാന്യം കൊടുക്കുന്ന രണ്ട് സിനിമകളുടെ ചര്‍ച്ചകളാണ് ഇപ്പോള്‍ നടക്കുന്നത് എന്ന് രാജസേനന്‍ പറഞ്ഞു.