IPL 2026: ചേട്ടൻ തുടങ്ങി മക്കളേ... സിഎസ്കെ നെറ്റ്സിൽ പരിശീലനം ആരംഭിച്ച് സഞ്ജു, ആദ്യ സെഷനിൽ ചെയ്തത് ഇങ്ങനെ

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ ഇനി ഏഴ് ദിവസമാണ് ശേഷിക്കുന്നത്. ഈ മാസം 28ന് ആരംഭിക്കുന്ന ഐപിഎല്ലിനായി അവസാന ഘട്ട തയ്യാറെടുപ്പിലാണ് ടീമുകളുള്ളത്. എല്ലാവരും ഇത്തവണ ഉറ്റുനോക്കുന്ന താരങ്ങളിലൊരാൾ സ‍ഞ്ജു സാംസണാണ്. ടി20 ലോകകപ്പിൽ മിന്നും പ്രകടനത്തോടെ കസറിയ സഞ്ജു സാംസൺ ഐപിഎല്ലിലും ഇതേ മികവ് ആവർത്തിക്കുമോയെന്നതാണ് എല്ലാവരും ഉറ്റുനോക്കുന്നത്.ഇത്തവണ രാജസ്ഥാൻ റോയൽസ് വിട്ട് സിഎസ്കെയിലേക്കെത്തിയ സഞ്ജു സാംസൺ ഇപ്പോഴിതാ നെറ്റ്സ് പരിശീലനം ആരംഭിച്ചിരിക്കുകയാണ്. കഴിഞ്ഞ ദിവസം സഞ്ജു ഗ്രൗണ്ടിലേക്കെത്തുകയും സഹതാരങ്ങളോടൊപ്പം സംസാരിക്കുകയും ചെറിയ വ്യായാമങ്ങൾ ചെയ്യുകയും ചെയ്തിരുന്നു. എംഎസ് ധോണിയോടൊപ്പം സഞ്ജു സംസാരിച്ചിരിക്കുന്ന വീഡിയോയും വെെറലായി മാറിയിരുന്നു.

ഇന്നാണ് സഞ്ജു നെറ്റ്സ് പരിശീലനത്തിലേക്ക് കടന്നിരിക്കുന്നത്. ത്രോ ബോളുകളെയാണ് കൂടുതലായും സഞ്ജു നേരിട്ടത്. വലിയ ഷോട്ടുകൾക്ക് ശ്രമിക്കാതെ പ്രതിരോധിച്ച് കളിക്കുന്നതാണ് കാണാനായത്. സഞ്ജു സാംസണ് വലിയ വരവേൽപ്പാണ് ആരാധകർ നൽകിയത്. എംഎസ് ധോണിക്ക് ലഭിക്കുന്ന അതേ സ്വീകാര്യത സഞ്ജുവിനും ഇത്തവണ പ്രതീക്ഷിക്കാം.

സഞ്ജു സാംസണെ സംബന്ധിച്ച് സിഎസ്കെയിലേക്കുള്ള കൂടുമാറ്റം വളരെ നിർണ്ണായകമായിരുന്നു. രാജസ്ഥാൻ റോയൽസിലൂടെ കളിച്ച് വളർന്ന താരമാണ് സഞ്ജു. രാജസ്ഥാന്റെ നായകസ്ഥാനമടക്കം ഉപേക്ഷിച്ച് സിഎസ്കെയിലേക്കുള്ള മലയാളി താരത്തിന്റെ കൂടുമാറ്റം തികച്ചും അപ്രതീക്ഷിതമായിരുന്നുവെന്ന് പറയാം. എന്നാൽ സിഎസ്കെയിൽ സഞ്ജുവിന് ലഭിക്കുന്ന ആരാധക പിന്തുണ ഈ പ്രശ്നങ്ങളെയെല്ലാം മറികടക്കാൻ സഹായിക്കുന്നതാണ്.
IPL 2026: ഇന്ത്യൻ ടീമിലെ സുഹൃത്തുക്കൾ, പക്ഷെ ഐപിഎല്ലിൽ തമ്മിലടിച്ചു! സഞ്ജുവിനോടും കൊമ്പുകോർത്തു, ഇത്തവണ ആവർത്തിക്കുമോ?
രാജസ്ഥാനെതിരേ കളിക്കുമ്പോൾ വെെകാരിക പ്രശ്നമില്ലെന്ന് സഞ്ജു തന്നെ തുറന്ന് പറഞ്ഞു. രാജസ്ഥാനിൽ നിന്ന് മാറേണ്ട സമയമായപ്പോൾ മാറിയെന്നതാണ് സഞ്ജു വ്യക്തമാക്കിയത്. എന്തായാലും സിഎസ്കെയിൽ സഞ്ജുവിനെ കാത്തിരിക്കുന്നത് വലിയ നേട്ടങ്ങളാണെന്ന് പറയാം. ഇനി സഞ്ജുവിന്റെ താരമൂല്യത്തിൽ വലിയ കുതിപ്പ് ഉണ്ടാവും. ടി20 ലോകകപ്പിലൂടെത്തന്നെ സഞ്ജുവിന്റെ നിലവാരം മറ്റൊരു തലത്തിലേക്ക് എത്തിയിരിക്കുകയാണ്.

ഇനി സിഎസ്കെയിൽ സഞ്ജുവിന്റെ പ്രകടനം എങ്ങനെയാവുമെന്നതാണ് കാത്തിരുന്ന് കാണേണ്ടത്. സഞ്ജു ധോണിക്കൊപ്പം കളിക്കാൻ സാധിക്കുന്ന ആവേശത്തിലാണ്. പതിയ സാഹചര്യങ്ങളോട് പൊരുത്തപ്പെടാനാണ് സഞ്ജു ശ്രമിക്കുന്നത്. നെറ്റ്സിൽ വരുന്ന ദിവസങ്ങളിലും സഞ്ജുവിന്റെ തകർപ്പൻ പ്രകടനങ്ങൾ ഉണ്ടാവും. സിഎസ്കെയുടെ ടോപ് ഓഡറിലാണോ അതോ നാലാം നമ്പറിലാണോ സഞ്ജു കളിക്കുകയെന്ന കാര്യത്തിൽ ഇനിയും വ്യക്തത വരേണ്ടിയിരിക്കുന്നു.
രോഹിത്തും കോഹ്ലിയും ഏകദിന ലോകകപ്പിനുണ്ടാവില്ലേ? സീറ്റുറപ്പിക്കാതെ ബിസിസിഐ, ഐപിഎല്ലിന് ശേഷം നിർണ്ണായക തീരുമാനം
ടി20 ലോകകപ്പിൽ സഞ്ജു സാംസൺ ഓപ്പണറായാണ് കളിച്ചത്. എന്നാൽ സിഎസ്കെ യിൽ മറ്റൊരു ഉത്തരവാദിത്തം സഞ്ജുവിനെ ഏൽപ്പിക്കാനുള്ള നീക്കത്തിലാണ് ടീം മാനേജ്മെന്റ് എന്നുള്ള റിപ്പോർട്ടുകളുമുണ്ട്. ഇത്തവണ സഞ്ജുവിനെ വെെസ് ക്യാപ്റ്റനാക്കാനുള്ള നീക്കവും സിഎസ്കെ നടത്തുന്നുണ്ടെന്നാണ് വിവരം. എന്തായാലും സിഎസ്കെയുടെ അടുത്ത മുഖമായി സഞ്ജു മാറുമെന്ന് തന്നെ കരുതാം.

ഈ സീസണോടെ എംഎസ് ധോണി വിരമിക്കൽ പ്രഖ്യാപിച്ചേക്കും. അങ്ങനെ വരുമ്പോൾ സിഎസ്കെയെ മുന്നോട്ട് കൊണ്ടുപോകാൻ ശേഷിയുള്ള താരം സഞ്ജു സാംസണാണ്. നിലവിലെ നായകൻ റുതുരാജ് ഗെയ്ക് വാദിനും ഇത്തരമൊരു കഴിവ് അവകാശപ്പെടാനാവില്ല. എന്തായാലും സിഎസ്കെയിൽ ഇനി സഞ്ജുവിന്റെ സമയമാണ് വരാനിരിക്കുന്നതെന്ന് പറയാം. സഞ്ജുവിന്റെ സീസണായി ഇത്തവണത്തെ സീസൺ മാറുമോയെന്നത് കാത്തിരുന്ന് കാണാം.