IPL 2026: ബെംഗളൂരുവില്‍ ഐപിഎല്‍ ഇല്ല! ആര്‍സിബി ഹോം മാച്ചുകള്‍ ചിന്നസ്വാമി സ്റ്റേഡിയത്തില്‍ നിന്ന് മാറ്റുന്നു

Authored by: നിഷാദ് അമീന്‍|Samayam Malayalam•12 Nov 2025, 11:34 am

ഐപിഎല്‍ 2025 വിജയാഘോഷത്തിനിടെയുണ്ടായ തിക്കിലും തിരക്കിലും പെട്ട് ആളുകള്‍ മരിക്കാനിടയായ ബെംഗളൂരുവിലെ എം ചിന്നസ്വാമി സ്റ്റേഡിയത്തില്‍ ഇത്തവണ ഐപിഎല്‍ മല്‍സരങ്ങള്‍ ഉണ്ടാവില്ല. മത്സരങ്ങള്‍ നടത്താന്‍ അനുയോജ്യമല്ലാത്തതിനാല്‍ റോയല്‍ ചാലഞ്ചേഴ്‌സ് ബെംഗളൂരുവിന്റെ ( Royal Challengers Bengaluru ) 2026 ലെ എല്ലാ ഹോം മത്സരങ്ങളും മറ്റൊരു വേദിയിലേക്ക് മാറ്റുമെന്നാണ് റിപോര്‍ട്ട്.ഈ വര്‍ഷം ജൂണില്‍ ആര്‍സിബിയുടെ കന്നി കിരീട വിജയത്തിന് പിന്നാലെ സംഘടിപ്പിച്ച വിക്ടറി പരേഡിനിടെ സ്റ്റേഡിയത്തിന് പുറത്താണ് ദുരന്തമുണ്ടായത്. 17 വര്‍ഷത്തെ നീണ്ട കാത്തിരിപ്പിന് ശേഷമാണ് വിരാട് കോഹ്‌ലിയുടെ നേതൃത്വത്തില്‍ ആര്‍സിബി കിരീടം ഉയര്‍ത്തിയത്. സ്വന്തം നഗരത്തിലെ ആരാധകര്‍ക്ക് മുന്നില്‍ ഒരിക്കല്‍ക്കൂടി കിരീടം നേടാനുള്ള അവസരം വേദി മാറ്റത്തിലൂടെ ഇല്ലാതാവുകയാണ്.


ലീഗിന്റെ വരാനിരിക്കുന്ന പതിപ്പിലെ ഒരു മത്സരവും പ്രശസ്തമായ സ്റ്റേഡിയത്തില്‍ നടക്കില്ലെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു. ആര്‍സിബിയുടെ എല്ലാ ഹോം മത്സരങ്ങളും പൂനെയിലെ മഹാരാഷ്ട്ര ക്രിക്കറ്റ് അസോസിയേഷന്‍ (എംസിഎ) സ്റ്റേഡിയത്തിലേക്ക് മാറ്റിയേക്കും. ചര്‍ച്ചകള്‍ തുടരുന്നതിനാല്‍ അന്തിമ പ്രഖ്യാപനമായിട്ടില്ല.

IPL 2026: സഞ്ജു-ജഡേജ പ്ലെയര്‍ ട്രേഡിന് പിന്നില്‍ മറ്റൊരു സൂപ്പര്‍ താരം; വിരമിക്കലിന് തൊട്ടുമുമ്പുള്ള സുപ്രധാന നീക്കം, ക്യാപ്റ്റന്‍സി ഉറപ്പെന്ന് കൈഫ്
ആര്‍സിബിയുടെ മത്സരങ്ങള്‍ക്ക് പൂനെ സ്റ്റേഡിയം വാഗ്ദാനം ചെയ്തതായി എംസിഎ സെക്രട്ടറി കമലേഷ് പൈ സ്ഥിരീകരിച്ചു. 'ആര്‍സിബിയുടെ മത്സരങ്ങള്‍ക്ക് ആതിഥേയത്വം വഹിക്കാന്‍ പൂനെ സ്റ്റേഡിയം സജ്ജമാണ്. ചര്‍ച്ചകള്‍ നടന്നുവരുന്നു, സ്ഥിരീകരിച്ചിട്ടില്ല. കര്‍ണാടകയില്‍ ദുരന്തമുണ്ടായതിനാല്‍ അവര്‍ക്ക് ചില പ്രശ്നങ്ങളുണ്ട്. അതിനാല്‍, അവര്‍ ഒരു വേദി അന്വേഷിക്കുകയാണ്. ഞങ്ങള്‍ അവര്‍ക്ക് ഞങ്ങളുടെ സ്റ്റേഡിയം വാഗ്ദാനം ചെയ്തിട്ടുണ്ട്. പ്രാഥമിക ചര്‍ച്ചകള്‍ നടക്കുന്നുണ്ട്, പരിഹരിക്കേണ്ട ചില സാങ്കേതിക കാര്യങ്ങളുണ്ട്. കാര്യങ്ങള്‍ ശരിയായാല്‍, പൂനെ മത്സരങ്ങള്‍ക്ക് ആതിഥേയത്വം വഹിക്കും'- എംസിഎ സെക്രട്ടറി വെളിപ്പെടുത്തി.

Sanju Samson Birthday: കൗതുകമായി സിഎസ്‌കെ പോസ്റ്റ്; ആശംസ നേര്‍ന്ന് ബിസിസിഐയും കെസിഎയും രാജസ്ഥാനും
ഐപിഎല്ലിന്റെ കഴിഞ്ഞ 18 പതിപ്പുകളില്‍ ആദ്യമായാണ് ആര്‍സിബിയുടെ എല്ലാ ഹോം മത്സരങ്ങളും മറ്റൊരു വേദിയിലേക്ക് മാറ്റാന്‍ ആലോചിക്കുന്നത്. 2009ല്‍ ടൂര്‍ണമെന്റ് ദക്ഷിണാഫ്രിക്കയിലേക്ക് മാറ്റിയപ്പോഴും 2020-22 കോവിഡ് വര്‍ഷങ്ങളിലും മാത്രമാണ് ആര്‍സിബി ബെംഗളൂരുവില്‍ കളിക്കാതിരുന്നത്. വരുന്ന സീസണില്‍ മറ്റ് ടീമുകളെല്ലാം അവരുടെ പരമ്പരാഗത ഹോം ഗ്രൗണ്ടുകളില്‍ തുടര്‍ന്നും കളിക്കും.

ഐപിഎല്‍ 2026 ന് മുമ്പ് ആര്‍സിബിക്ക് പുതിയ ഉടമകള്‍ എത്തിയേക്കും. വില്‍പ്പന ചര്‍ച്ച നടന്നുവരുന്നു. വനിതാ പ്രീമിയര്‍ ലീഗിലും ആര്‍സിബി ചാമ്പ്യന്‍മാരായിട്ടുണ്ട്. ഇന്ത്യന്‍ താരം സ്മൃതി മന്ദാനയാണ് നേതൃത്വം നല്‍കുന്നത്.