IPL 2026: ശുഭ്മാൻ ​ഗില്ലിന്റെ ​ഗുജറാത്ത് കപ്പടിക്കുമോ? ടീമിനെ ചില പ്രശ്നങ്ങൾ വേട്ടയാടുന്നുണ്ട്; ചൂണ്ടിക്കാട്ടി ആകാശ് ചോപ്ര

ഇന്ത്യൻ പ്രീമിയർ ലീഗിന്റെ 2026 സീസൺ 28ന് ആരംഭിക്കുകയാണ്. അവസാന സീസണിലെ പിഴവുകൾ നികത്തി ഇത്തവണ അരയും തലയും മുറുക്കിയാണ് 10 ടീമുകളും ഇറങ്ങുന്നത്. അതുകൊണ്ടുതന്നെ പോരാട്ടം തീപാറുമെന്ന കാര്യം ഉറപ്പാണ്. ആരാവും കിരീടത്തിലേക്കെത്തുകയെന്നറിയാനുള്ള കാത്തിരിപ്പാണ് ഇനി. നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരു സൺറെെസേഴ്സ് ഹെെദരാബാദിനെ നേരിട്ടാണ് ഇത്തവണത്തെ ഐപിഎൽ ആരംഭിക്കുന്നത്. ചില ടീമുകളേയും താരങ്ങളേയും സംബന്ധിച്ച് ഇത്തവണത്തെ സീസൺ വളരെ പ്രധാനപ്പെട്ടതാണ്. എന്ത് വിലകൊടുത്തും കപ്പിലേക്കെത്താൻ ഒരുങ്ങി ഇറങ്ങുന്ന ടീമുകളിലൊന്നാണ് ഗുജറാത്ത് ടെെറ്റൻസ്. ശുഭ്മാൻ ഗിൽ നയിക്കുന്ന ഗുജറാത്ത് ടെെറ്റൻസിന് ഇത്തവണ കിരീടം അതി നിർണ്ണായകം. ഇന്ത്യയുടെ ടി20 ടീമിന് പുറത്തുള്ള ഗില്ലിനും ഇത്തവണ കപ്പിലേക്കെത്തേണ്ടത് അത്യാവശ്യമാണ്.

ബാറ്റുകൊണ്ടും ഗില്ലിന് മികവ് കാട്ടാനായേലെ ഇന്ത്യൻ ടി20 ടീമിലേക്ക് തിരിച്ചെത്താൻ സാധിക്കൂ. ഇപ്പോഴിതാ ഇത്തവണത്തെ ഐപിഎല്ലിലെ ഗുജറാത്ത് ടെെറ്റൻസിന്റെ ദൗർബല്യങ്ങൾ എന്തൊക്കെയാണെന്ന് ചൂണ്ടിക്കാട്ടിയിരിക്കുകയാണ് മുൻ ഇന്ത്യൻ താരവും അവതാരകനുമായ ആകാശ് ചോപ്ര. 'ഗുജറാത്ത് ടെെറ്റൻസിന്റെ ആ പ്രശ്നത്തെ ദൗർബല്യമെന്നോ അതോ വെല്ലുവിളിയെന്നോ വിളിക്കാം.

ഇപ്പോഴും ടോപ് ത്രീയെ അമിതമായി ആശ്രയിക്കുന്ന നിരയാണ് ഗുജറാത്തിന്റേത്. അവസാന സീസണിലേതുപോലെ ടോപ് ത്രീക്ക് ഇത്തവണയും തിളങ്ങാൻ സാധിക്കേണ്ടതായുണ്ട്. ടോപ് ത്രീ താരങ്ങൾ 14, 15 ഓവറെങ്കിലും ബാറ്റു ചെയ്യണം. അതിൽ ഒരു താരമെങ്കിലും 15 ഓവർ കഴിയുന്നതുവരെ ക്രീസിൽ തുടരണം. ജോസ് ബട്ലറിന്റെ ഫോം ഗുജറാത്തിന് വളരെ നിർണ്ണായകമാണ്.
സഞ്ജു രാജസ്ഥാൻ റോയൽസ് വിട്ടു, പക്ഷെ ഈ റെക്കോഡുകൾ എന്നും ശേഷിക്കും? തകർക്കാൻ സാധ്യതയില്ലാത്ത മൂന്ന് വമ്പൻ നേട്ടങ്ങളിതാ
ലോകകപ്പിൽ ജോസ് ബട്ലറിൽ നിന്ന് മികച്ചൊരു പ്രകടനം കാണാനായില്ല. മികച്ച പിച്ചുകളിൽ പോലും അവന് തിളങ്ങാനായില്ല. അതുകൊണ്ടുതന്നെ ഗുജറാത്തിനെ സംബന്ധിച്ച് ബട്ലറുടെ ഫോം ഒരു പ്രധാന പ്രശ്നമാണ്. ഓപ്പണർമാർ എല്ലാ മത്സരത്തിലും മികവ് കാട്ടേണ്ടത് ഗുജറാത്തിനെ സംബന്ധിച്ച് വളരെ പ്രധാനപ്പെട്ട കാര്യമാണ്' ആകാശ് ചോപ്ര പറഞ്ഞു.

ശുഭ്മാൻ ഗിൽ, ജോസ് ബട്ലർ, സായ് സുദർശൻ എന്നിവരുടെ ബാറ്റിങ്ങിൽ അമിത പ്രതീക്ഷ അർപ്പിച്ചാണ് ഗുജറാത്ത് ഇത്തവണയും ഇറങ്ങുന്നത്. ഗില്ലിന്റെ സമീപകാലത്തെ ടി20യിലെ പ്രകടനം മോശമാണ്. ജോസ് ബട്ലർക്കും കാര്യമായ പ്രകടനം കാഴ്ചവെക്കാൻ സാധിക്കാതെ പോയി. സായ് സുദർശനിൽ നിന്ന് ക്ലാസിക് പ്രകടനം പ്രതീക്ഷിക്കാം. എന്തായാലും ഈ മൂന്ന് പേരുടെ പ്രകടനം ഗുജറാത്തിന്റെ വിജയത്തിൽ നിർണ്ണായകമാവും. ഗ്ലെൻ ഫിലിപ്സ്, ടോം ബാന്റൻ, ഷാരൂഖ് ഖാൻ, ജേസൻ ഹോൾഡർ എന്നിവരിൽ നിന്നൊന്നും വലിയൊരു പ്രകടനം പ്രതീക്ഷിക്കാനാവില്ല.

IPL 2026: ഈ ക്യാപ്റ്റന്മാർ സീസൺ തികച്ചേക്കില്ല, മോശം ഫോമിലെങ്കിൽ പാതി വഴിയിൽ പുറത്താവും; വെല്ലുവിളി നേരിടുന്ന നായകന്മാരിതാ

ഗുജറാത്തിനെ കപ്പിലേക്കെത്തിക്കാൻ സാധിക്കാതെ പോയാൽ ഗില്ലിനെ അത് പ്രതികൂലമായി ബാധിക്കുമെന്നുറപ്പാണ്. കിരീടമില്ലെങ്കിൽ പ്ലേ ഓഫിലെങ്കിലും ഗുജറാത്തിന് സീറ്റ് നേടാൻ സാധിക്കണം. ആശിഷ് നെഹ്റയെന്ന തന്ത്രശാലിയായ പരിശീലകനാണ് ഗുജറാത്തിന്റെ കരുത്ത്. ഓരോ താരത്തേയും എങ്ങനെ ഉപയോഗിക്കണമെന്ന് നെഹ്റക്ക് നന്നായി അറിയാം. അതുകൊണ്ടുതന്നെ ഇത്തവണയും നെഹ്റയുടെ മികവിൽ‌ വിശ്വാസം അർപ്പിച്ചാവും ഗുജറാത്ത് മുന്നോട്ട് പോവുകയെന്ന് നിസംശയം പറയാം.