IPL 2026: സഞ്ജു വളർത്തിയ രാജസ്ഥാൻ, ഇനി ആ വിടവ് എങ്ങനെ നികത്തും? റിയാൻ പരാ​ഗ് പറയുന്നത് ഇങ്ങനെയാണ്

ഇന്ത്യൻ പ്രീമിയർ ലീഗിന്റെ 2026 സീസൺ 28ന് ആരംഭിക്കാൻ പോവുകയാണ്. അവസാന സീസണിലെ ടീമുകളിൽ നിന്ന് വലിയ മാറ്റത്തോടെയാണ് ഇത്തവണ 10 ടീമുകളും ഇറങ്ങിയിരിക്കുന്നത്. പിഴവുകൾ കൂട്ടിയും കിഴിച്ചും ടീമുകൾ പദ്ധതികൾ മെനയുമ്പോൾ ആർക്കാവും കപ്പ് നേടാൻ സാധിക്കുകയെന്നതാണ് കാത്തിരുന്ന് കണ്ടറിയേണ്ടത്. ഇത്തവണത്തെ സീസണിന് മുമ്പുള്ള പ്രധാന കൂടുമാറ്റങ്ങളിലൊന്ന് സഞ്ജു സാംസണിന്റേതാണ്. രാജസ്ഥാൻ റോയൽസ് ക്യാപ്റ്റനായിരുന്ന സഞ്ജു സാംസൺ ഇപ്പോൾ കൂടുമാറ്റം നടത്തി ചെന്നെെ സൂപ്പർ കിങ്സിനൊപ്പമാണ്. സഞ്ജുവിന്റെ അഭാവം രാജസ്ഥാനെ എങ്ങനെ ബാധിക്കുമെന്നും എങ്ങനെയാവും ടീമിന്റെ ഭാവിയെന്നുമെല്ലാമുള്ള ആശങ്ക പലരും പങ്കുവെക്കുന്നുണ്ട്. എന്തായാലും രാജസ്ഥാൻ റോയൽസിന്റെ പുതിയ ക്യാപ്റ്റനായ റിയാൻ പരാഗിന് കാര്യങ്ങൾ എളുപ്പമാവില്ലെന്നുറപ്പ്.

സഞ്ജു സാംസണിന്റെ വലിയ വിടവ് നികത്താനുള്ള ദൗത്യമാണ് പരാഗിനുള്ളത്. എന്നാൽ സഞ്ജുവിന്റെ പകരക്കാരനാവുക ആർക്കുമാവില്ലെന്നാണ് പരാഗ് പറയുന്നത്. 'സഞ്ജു സാംസൺ തികച്ചും വ്യത്യസ്തനായിട്ടുള്ള താരമാണ്. മറ്റാരുമായും അദ്ദേഹത്തെ താരതമ്യം ചെയ്യാനാവില്ല. വിരാട് കോഹ്ലിയുടെ പകരക്കാരൻ ആകാൻ ആർക്കാണ് സാധിക്കുക. ആർക്കും സാധിക്കില്ലെന്ന് എല്ലാവർക്കും അറിയാം.

എല്ലാ താരങ്ങളും വിജയിക്കാനായിട്ടാണ് കളിക്കുന്നത്. ഓരോരുത്തർക്കും വ്യത്യസ്തമായ കഴിവുകളുമാവും ഉണ്ടാവുക. അവസാന സീസണിലെ രാജസ്ഥാന്റെ തോൽവികൾ പലപ്പോഴും അവസാന സമയത്തായിരുന്നു. കൂടുതൽ സ്വാതന്ത്ര്യത്തോടെ ആക്രമിക്കാനും അവസാന സീസണിലെ പിഴവുകൾ നികത്താനുമാവും ഇത്തവണ ഞങ്ങൾ ലക്ഷ്യമിടുക' റിയാൻ പരാഗ് പറഞ്ഞു.
IPL 2026: ഐപിഎല്ലിലെ വമ്പന്മാർ, പക്ഷെ ഇത്തവണ സ്പിൻ കരുത്ത് ദുർബലം; ഈ ദൗർബല്യം മൂന്ന് ടീമുകൾക്ക് തിരിച്ചടിയായേക്കും
ഇത്തവണ രാജസ്ഥാൻ റോയൽസിൽ സഞ്ജു സാംസൺ ഇല്ലെങ്കിലും ശക്തമായ ടീം കരുത്തുണ്ട്. ഓപ്പണിങ്ങിൽ തല്ലിത്തകർക്കാൻ വെെഭവ് സൂര്യവംശിയും യശ്വസി ജയ്സ്വാളുമുണ്ട്. റിയാൻ പരാഗ്, ദ്രുവ് ജുറേൽ, ഷിംറോൻ ഹെറ്റ്മെയർ എന്നിവർ പിന്നാലെ ആക്രമിക്കാനെത്തും. രവീന്ദ്ര ജഡേജയും സാം കറനും ചേരുമ്പോൾ രാജസ്ഥാന്റെ ബാറ്റിങ് നിരയിൽ ആശങ്കകൾ കുറവാണ്.

പേസ് നിരയിൽ ജോഫ്രാ ആർച്ചറുടെ സ്ഥിരതയാണ് പ്രശ്നം. ആർച്ചർ അതിവേഗ ബൗളറാണെങ്കിലും സമീപകാലത്തായി തല്ലുകൊള്ളിയാണ്. ടി20 ലോകകപ്പിലടക്കം ആർച്ചർ നന്നായി അടിവാങ്ങി. ഇത് രാജസ്ഥാന് തലവേദനയുണ്ടാക്കുന്ന കാര്യമാണെന്ന് നിസംശയം പറയാം. തുഷാർ ദെശപാണ്ഡെയേയും വിശ്വസിക്കാനാവില്ല. ക്വീന മഫാഖ, യുദ്ധ് വീർ സിങ്, കുൽദീപ് സെൻ എന്നിവരെല്ലാം വിശ്വസ്തരായ ബൗളർമാരല്ല. സന്ദീപ് ശർമയുടെ പ്രകടനം പ്രതീക്ഷ നൽകുന്ന കാര്യമാണ്.

IPL 2026: ഇംപാക്ട് പ്ലയറോ ഫിനിഷറോ? ധോണിയിൽ നിന്ന് സിഎസ്കെ അത്ഭുത പ്രകടനം പ്രതീക്ഷിക്കണോ? മുഹമ്മദ് കെെഫ് പറയുന്നത് ഇങ്ങനെ

നിലവിലെ രാജസ്ഥാന്റെ ടീം കരുത്ത് സഞ്ജുവിന്റെ അഭാവത്തിലും കപ്പ് നേടിയെടുക്കാൻ പ്രാപ്തമാണ്. എന്നാൽ നായകനെന്ന നിലയിൽ പരാഗിന്റെ പ്രകടനം എങ്ങനെയാവുമെന്നതാണ് കണ്ടറിയേണ്ടത്. അവസാന സീസണിൽ പരാഗ് ക്യാപ്റ്റനായപ്പോൾ പ്രതീക്ഷിച്ച പ്രകടനം നടത്താൻ സാധിച്ചിരുന്നില്ല. ആഭ്യന്തര ക്രിക്കറ്റിലടക്കം ഭേദപ്പെട്ട റെക്കോഡ് അവകാശപ്പെടാൻ സാധിക്കുന്ന താരമാണ് പരാഗ്. അതുകൊണ്ടുതന്നെ പരാഗിന് ഇത്തവണ ശക്തമായ തിരിച്ചുവരവ് നടത്താൻ സാധിക്കുമെന്നാണ് ആരാധകർ പ്രതീക്ഷിക്കുന്നത്.

രാജസ്ഥാൻ റോയൽസ് പ്രഥമ സീസണിലെ ചാമ്പ്യന്മാരാണ്. സഞ്ജു സാംസൺ ഫെെനലിൽ എത്തിച്ചെങ്കിലും കപ്പടിപ്പിച്ചിട്ടില്ല. ഇത്തവണ റിയാൻ പരാഗിന് കീഴിൽ രണ്ടാം ഐപിഎൽ കിരീടം നേടിയെടുക്കാൻ രാജസ്ഥാന് സാധിക്കുമോയെന്നതാണ് കണ്ടറിയേണ്ടത്.