IPL 2026: സഞ്ജുവും ​ഗില്ലുമില്ല, വെെഭവ്-സായ് ഓപ്പണിങ്; അഞ്ച് ആർസിബി താരങ്ങൾ, ഈ സീസണിലെ ബെസ്റ്റ് പ്ലേയിങ് ഇലവൻ ഇതാ

ഇന്ത്യൻ പ്രീമിയർ ലീഗിന്റെ 2026 സീസണ് കൊടിയിറങ്ങിയിരിക്കുകയാണ്. 10 ടീമുകൾ പോരാടിച്ച സൂപ്പർ സീസണിനൊടുവിൽ റോയൽ ചലഞ്ചേഴ്സ് ബംഗളൂരുവാണ് കപ്പിൽ മുത്തമിട്ടിരിക്കുന്നത്. ഫെെനലിൽ ഗുജറാത്ത് ടെെറ്റൻസിനെ അഹമ്മദാബാദിൽ തോൽപ്പിച്ചാണ് ആർസിബി കപ്പ് നേടിയത് എന്നതാണ് ശ്രദ്ധേയമായ കാര്യം. ആർസിബി തുടർച്ചയായ രണ്ടാം സീസണിലും കിരീടം നേടിയെടുത്ത് സിഎസ്കെയുടെയും മുംബെെ ഇന്ത്യൻസിന്റേയും തുടർ കിരീട റെക്കോഡുകളോടൊപ്പമെത്താൻ ആർസിബിക്കായി.

ഈ സീസണ് കൊടിയിറങ്ങുമ്പോൾ അത്ഭുതപ്പെടുത്തുന്ന നിരവധി താരങ്ങളേയും നിരാശപ്പെടുത്തിയ താരങ്ങളേയും കാണാനാവും. ഈ സീസണിലെ മികച്ച പ്ലേയിങ് ഇലവൻ പരിഗണിച്ചാൽ‌ ആരൊക്കെ അതിൽ ഉൾപ്പെടുമെന്ന് പരിശോധിക്കാം. ഓപ്പണിങ്ങിൽ വെെഭവ് സൂര്യവംശിയും സായ് സുദർശനുമാണ് അവസരം. രാജസ്ഥാൻ ഓപ്പണറായ വെെഭവ് 16 മത്സരത്തിൽ നിന്ന് 776 റൺസോടെ ഓറഞ്ച് ക്യാപ്പ് നേടി.ഗുജറാത്ത് ടെെറ്റൻസ് താരമായ സായ് സുദർശൻ 17 മത്സരത്തിൽ നിന്ന് 722 റൺസാണ് നേടിയത്.

സഞ്ജു സാംസണും ശുഭ്മാൻ ഗില്ലിനും ഓപ്പണർ റോളിൽ അവസരമില്ല. മൂന്നാം നമ്പറിൽ‌ ആർസിബിയുടെ വിരാട് കോഹ്ലിക്കാണ് സീറ്റ്. ഫെെനലിലെ അർധ സെഞ്ചുറി ഉൾപ്പെടെ 16 മത്സരത്തിൽ നിന്ന് 675 റൺസാണ് കോഹ്ലി നേടിയത്. ഫെെനലിലെ താരമാകാനും കോഹ്ലിക്ക് സാധിച്ചു. നാലാം നമ്പറിൽ സൺറെെസേഴ്സ് ഹെെദരാബാദിന്റെ ഹെൻ റിച്ച് ക്ലാസനാണ് അവസരം. എസ്ആർഎച്ചിനായി നാലാം നമ്പറിൽ കളിച്ച ക്ലാസൻ 624 റൺസാണ് ഈ സീസണിൽ നേടിയത്.

എസ്ആർഎച്ച് എലിമിനേറ്ററിൽ തോറ്റ് പുറത്തായി എങ്കിലും തകർപ്പൻ പ്രകടനമാണ് ക്ലാസൻ പുറത്തെടുത്തത്. അഞ്ചാം നമ്പറിൽ രജത് പാട്ടീധാറാണ് ഇറങ്ങുക. രജത്തിന്റെ കീഴിലാണ് തുടർച്ചയായി രണ്ടാം സീസണിലും ആർസിബി കപ്പടിച്ചിരിക്കുന്നത്. അതുകൊണ്ടുതന്നെ ഈ ഇലവനെ നയിക്കുന്നതും രജത്താണ്. 14 ഇന്നിങ്സിൽ നിന്ന് 501 റൺസാണ് രജത് നേടിയത്. ആറാം നമ്പറിൽ ആർസിബിയുടെ സ്പിൻ ഓൾറൗണ്ടറായ ക്രുണാൽ‌ പാണ്ഡ്യക്കാണ് അവസരം.
RCB vs GT IPL 2026 Final: ​ഗില്ലിന്റെ വലിയ പിഴവ്, എന്തുകൊണ്ട് അത് ചെയ്തില്ല? ​ഗുജറാത്തിന്റെ തോൽവിയുടെ കാരണങ്ങളിതാ
ഇടം കെെയൻ താരമായ ക്രുണാൽ ഫെെനലിൽ ജോസ് ബട്ലറുടെ നിർണ്ണായക വിക്കറ്റ് നേടിയ താരമാണ്. ഈ സീസണിൽ‌ 226 റൺസും 14 വിക്കറ്റുമായി ആർസിബിയുടെ കിരീട നേട്ടത്തിൽ നിർണ്ണായക പങ്കുവഹിക്കാൻ ക്രുണാലിന് സാധിച്ചിരുന്നു. ഏഴാം നമ്പറിൽ ഗുജറാത്തിന്റെ റാഷിദ് ഖാനാണ് അവസരം. 19 വിക്കറ്റുകൾ വീഴ്ത്തിയ റാഷിദ് ഖാൻ ഫെെനലിൽ രണ്ട് വിക്കറ്റുകളും സ്വന്തമാക്കി.

എട്ടാമനായി രാജസ്ഥാന്റെ ജോഫ്രാ ആർച്ചറാണുള്ളത്. 25 വിക്കറ്റുകളോടെ ശ്രദ്ധേയ പ്രകടനം നടത്താൻ ആർച്ചർക്ക് സാധിച്ചിരുന്നു. രാജസ്ഥാൻ പ്ലേ ഓഫിലെത്താൻ നിർണ്ണായക പങ്കുവഹിച്ച താരമാണ് ആർച്ചർ. ഒമ്പതാം നമ്പറിൽ ആർസിബിയുടെ ഭുവനേശ്വർ കുമാറിനാണ് അവസരം. 28 വിക്കറ്റുകളോടെ ആർസിബിയുടെ കിരീട നേട്ടത്തിൽ സുപ്രധാന പങ്കുവഹിക്കാൻ ഭുവനേശ്വറിന് സാധിച്ചു.

RCB vs GT IPL 2026 Final: ധോണിയും രോഹിത്തും ഇനി പിന്നിൽ, രജത് ആ സിംഹാസനത്തിൽ ഒറ്റക്കിരിക്കും; ആർസിബി ക്യാപ്റ്റന് ചരിത്ര നേട്ടം

10ാം നമ്പറിൽ ഗുജറാത്തിന്റെ കഗിസോ റബാഡക്കാണ് അവസരം. 29 വിക്കറ്റുകളോടെ റബാഡയാണ് വിക്കറ്റ് വേട്ടക്കാർക്കുള്ള പർപ്പിൾ ക്യാപ്പ് നേടിയത്. 11ാം നമ്പറിൽ‌ ആർസിബിയുടെ റാസിഖ് സലാം ധാറിനെ പരിഗണിക്കാം. 12 മത്സരത്തിൽ നിന്ന് 19 വിക്കറ്റ് നേടിയ താരം ഫെെനലിൽ മൂന്ന് വിക്കറ്റുകളും സ്വന്തമാക്കി.

ഐപിഎൽ 2026 ബെസ്റ്റ് ഇലവൻ: വെെഭവ് സൂര്യവംശി, സായ് സുദർശൻ, വിരാട് കോഹ്ലി , ഹെൻ റിച്ച് ക്ലാസൻ, രജത് പാട്ടീധാർ( ക്യാപ്റ്റൻ), ക്രുണാൽ പാണ്ഡ്യ, റാഷിദ് ഖാൻ, ജോഫ്രാ ആർച്ചർ, ഭുവനേശ്വർ കുമാർ, കഗിസോ റബാഡ, റാസിഖ് സലാം ധാർ.