MI vs DC; മുൻ മത്സരത്തിലെ പിഴവ് ആവർത്തിച്ചാൽ പണികിട്ടും; നിർണായക മത്സരത്തിൽ ടീമുകൾ നേരിടുന്ന പ്രധാന വെല്ലുവിളികൾ

ഇന്ത്യൻ പ്രീമിയർ ലീഗ് (ഐപിഎൽ) 2025 പ്ലേ ഓഫ് മാമാങ്കത്തിലേക്കായുള്ള തയ്യാറെടുപ്പുകളിലാണ്. നിലവിൽ മൂന്ന് ടീമുകൾ തങ്ങളുടെ പ്ലേ ഓഫ് സാധ്യത ഉറപ്പിച്ചു കഴിഞ്ഞു. ഇനി നാലാം സ്ഥാനത്തിനായുള്ള പടയൊരുക്കമാണ്. മുംബൈ ഇന്ത്യൻസും (എംഐ) ഡൽഹി ക്യാപിറ്റൽസുമാണ് (ഡിസി) ഈ പടയൊരുക്കത്തിലെ പോരാളികൾ. നാളെ ഇവർ തമ്മിൽ ഏറ്റുമുട്ടുമ്പോൾ അത് പ്ലേ ഓഫിലേക്കുള്ള ഇരു ടീമുകളുടെയും നിർണായക അവസരമാണ്.
മൂന്ന് വിദേശ താരങ്ങളെ സൈൻ ചെയ്ത് മുംബൈ ഇന്ത്യൻസ്, പ്ലേ ഓഫിന് മുൻപ് ടീമിന്റെ കിടിലൻ നീക്കം
നാളെ മുംബൈ ഇന്ത്യൻസ് ജയിച്ചാൽ പിന്നെ മറ്റൊന്നും നോക്കേണ്ടതില്ല മുംബൈ പ്ലേ ഓഫിലെത്തും. പക്ഷെ പ്ലേ ഓഫ് സാധ്യത നിലനിർത്തണമെങ്കിൽ ഡൽഹിക്ക് ജയം അനിവാര്യമാണ്. അതുകൊണ്ടുതന്നെ നാളെ മുംബൈയുടെ ഹോം ഗ്രൗണ്ട് ആയ വാങ്കഡെ സ്റ്റേഡിയത്തിൽ നടക്കുന്ന മത്സരം ഇരു ടീമുകൾക്കും നിർണായകമാണ്. ഈ മത്സരത്തിൽ ടീമുകൾ നേരിടുന്ന പ്രധാന വെല്ലുവിളിയും ടീമുകളുടെ സാധ്യത പ്ലേയിങ് ഇലവനും പിച്ച് റിപ്പോർട്ടും പരിശോധിക്കാം.

മുംബൈ ഇന്ത്യൻസ് നേരിടുന്ന വെല്ലുവിളികൾ

മെയ് 21 നു വാങ്കഡെ സ്റ്റേഡിയത്തിൽ നടക്കുന്ന മത്സരത്തിൽ മുംബൈ ഇന്ത്യൻസ് ജയിച്ചാൽ 16 പോയിന്റുമായി മുംബൈയ്ക്ക് പ്ലേ ഓഫ് ഉറപ്പിക്കാം. ഡൽഹിയുടെ മറ്റ് മത്സരങ്ങളുടെ ഫലം കാത്ത് കഴിയേണ്ട അവസ്ഥ വരില്ല. അതുകൊണ്ടു തന്നെ ടീമിൽ പല നിർണായക മാറ്റങ്ങൾ വരുത്തിയാകും മുംബൈ ഡൽഹിയെ നേരിടാൻ ഒരുങ്ങുക. അതേസമയം ഇരു ടീമുകളും മുമ്പ് വാങ്കഡെ സ്റ്റേഡിയത്തിൽ ഏറ്റുമുട്ടിയ കണക്ക് പരിശോധിക്കുകയാണെങ്കിൽ അവിടെ കൂടുതൽ തവണ ജയിച്ചത് മുംബൈ ഇന്ത്യൻസ് ആണ്. അതുകൊണ്ടുതന്നെ ജയ പ്രതീക്ഷ മുംബൈയ്ക്ക് അൽപ്പം കൂടുതലാണ്.

എന്നാൽ വാശിയോടെ എത്തുന്ന ഡൽഹി ക്യാപിറ്റൽസിനെ മുംബൈ ഭയന്നെ മതിയാകു. സ്പിന്നർമാരും ബാറ്റ്സ്മാൻമാരും കിടിലൻ ഫോം പുറത്തെടുത്താൽ മുംബൈ ചിലപ്പോൾ വെള്ളം കുടിക്കും. അതുകൊണ്ട് തന്നെ ഡൽഹിയുടെ സ്റ്റാർ ബാറ്റർമാരെ പെട്ടന്ന് തന്നെ പവലിയനിലേക്ക് അയക്കാൻ മുംബൈ ശ്രദ്ധ ചെലുത്തണം.

അതേസമയം ഗുജറാത്ത് ടൈറ്റൻസിനോട് പരാജയപെട്ടതിനു ശേഷമാണു മുംബൈ ഡൽഹിയെ നേരിടാൻ എത്തുന്നത്. അന്ന് ഫീൽഡിങ്ങിലെ പിഴവുകളാണ് മുംബൈയെ പരാജയത്തിലേക്ക് എത്തിച്ചത്. ഇത്തവണയും മുംബൈ അത് ആവാസത്തിച്ചാൽ ഡൽഹിയുടെ ബാറ്റ്‌സ്മാന്മാർക്ക് കാര്യങ്ങൾ എളുപ്പമാകും. അതുകൊണ്ട് ഫീൽഡിങ്ങിലെ അപാകതകൾ പരിഹരിച്ചാകണം ഡൽഹിയെ നേരിടാൻ മൈതാനത്ത് ഇറങ്ങേണ്ടത്.

ഡൽഹി ക്യാപിറ്റൽസ് നേരിടുന്ന വെല്ലുവിളികൾ

ഐപിഎൽ 2025 സീസണിൽ നാളെ മുംബൈയുമായി നടക്കുന്ന മത്സരം ഉൾപ്പടെ രണ്ട് മത്സരങ്ങളാണ് ഇനി ഈ സീസണിൽ ഡൽഹിക്ക് ബാക്കിയുള്ളത്. ഈ രണ്ട് മത്സരങ്ങളിൽ ജയിച്ചാൽ മാത്രമേ ഡൽഹിയ്ക്ക് പ്ലേ ഓഫ് ഉറപ്പിക്കാൻ സാധിക്കുകയുള്ളു. നാളെ നടക്കുന്ന മത്സരത്തിൽ മുംബൈയോട് തോറ്റാൽ ഐപിഎൽ 2025 ൽ നിന്ന് പുറത്താകും. അതുകൊണ്ടുതന്നെ അതീവ തയ്യാറെടുപ്പുകളോടെ ആയിരിക്കും ഡൽഹി മൈതാനത്ത് ഇറങ്ങുക.

അതേസമയം ഗുജറാത്തിനോട് 10 വിക്കറ്റിന് തോൽവി ഏറ്റുവാങ്ങിയാണ് ഡൽഹി നാളെ മൈതാനത്ത് എത്തുന്നത്. ഈ മത്സരത്തിലേത് പോലെ വിക്കറ്റ് വീഴ്ത്തുന്നതിൽ പരാജയപ്പെട്ടാൽ മുംബൈയുടെ ബാറ്റ്‌സ്മാന്മാർ തിളങ്ങും. രോഹിത് ശർമ , സൂര്യകുമാർ യാദവ്, വിൽ ജാക്സ് , തിലക് വർമ്മ എന്ന് തുടങ്ങി ഒരു നീണ്ട നിര തന്നെ ബാറ്റിങ്ങിൽ മുംബൈക്കുണ്ട്. ഇവരുടെയെല്ലാം വിക്കറ്റുകൾ വീഴ്ത്തിയാൽ മാത്രമേ കാര്യങ്ങൾ ഡൽഹിയുടെ കൈകളിൽ എത്തുകയുള്ളൂ.

എംഐ - ഡിസി പിച്ച് റിപ്പോർട്ട്

പൊതുവെ ബാറ്റ്‌സ്മാന്മാർക്ക് അനുകൂലമാകുന്ന പിച്ച് ആണ് മുംബൈ വാങ്കഡെ സ്റ്റേഡിയത്തിന്റെ പിച്ച്. ആദ്യം ഇറങ്ങുന്ന ടീമിന് 180 കൂടുതൽ സ്കോർ ചെയ്യാൻ സാധിക്കുന്ന പിച്ച് ആണ് ഇത്. അതേസമയം പിച്ചിന്റെ ചരിത്രം പരിശോധിച്ചാൽ രണ്ടാമത്തിറങ്ങുന്ന ടീമിനാണ് ജയ സാധ്യത കൂടുതലുള്ളത്. അങ്ങനെയെങ്കിൽ ടോസ് നേടുന്ന ടീം ആദ്യം ഫീൽഡിങ് തിരഞ്ഞെടുക്കാൻ ആണ് സാധ്യത കൂടുതൽ.

മുംബൈ ഇന്ത്യൻസ് സാധ്യത പ്ലേയിങ് 11: രോഹിത് ശർമ്മ, റയാൻ റിക്കൽടൺ(WK), വിൽ ജാക്ക്‌സ്, സൂര്യകുമാർ യാദയ്, തിലക് വർമ്മ, ഹാർദിക് പാണ്ഡ്യ (C), കോർബിൻ ബോഷ്, ദീപക് ചാഹർ, ട്രെൻ്റ് ബോൾട്ട്, ജസ്പ്രീത് ബുംറ, കർൺ ശർമ്മ,

ഇമ്പാക്ട് താരം; അശ്വനി കുമ്‌നാർ

ഡൽഹി ക്യാപിറ്റൽസ് സാധ്യത പ്ലേയിങ് 11: കെഎൽ രാഹുൽ, ഫാഫ് ഡു പ്ലെസിസ്, അഭിഷേക് പോറെൽ, അക്സർ പട്ടേൽ (C), ട്രിസ്റ്റാൻ സ്റ്റബ്സ്, സമീർ റിസ്വി, അശുതോഷ് ശർമ, വിപ്രജ് നിഗം, ടി നടരാജൻ, കുൽദീപ് യാദവ്, മുസ്തഫിസുർ റഹ്മാൻ

ഇമ്പാക്ട് താരം; ദുഷ്മന്ത ചമീര