Rajsthan Royals: ആ കൂട്ടുക്കെട്ട് വീണ്ടും? രാജസ്ഥാന്റെ മുഖ്യ പരിശീലകനാകാൻ സംഗക്കാര എത്തും

Authored by: അനുഷ ഗംഗാധരൻ|Samayam Malayalam•26 Sept 2025, 9:34 am

രാജസ്ഥാൻ റോയൽസിലേക്ക് വീണ്ടും കുമാർ സംഗക്കാര മുഖ്യ പരിശീലക റോളിലേക്ക് എത്തുകയാണ് എന്ന റിപോർട്ടുകൾ എത്തിയിരിക്കുകയാണ്. കഴിഞ്ഞ മാസം രാഹുൽ ദ്രാവിഡ് രാജസ്ഥാൻ റോയൽസിന്റെ മുഖ്യ പരിശീലക സ്ഥാനത്ത് നിന്ന് രാജി വെച്ചതിനെ തുടർന്ന് അടുത്ത പരിശീലകൻ ആരായിരിക്കും എന്ന സംശയങ്ങൾ ഉടലെടുത്തിരുന്നു. ഈ സാഹചര്യത്തിലാണ് സംഗക്കാര ടീമിലേക്ക് തിരിച്ചെത്തുന്നു എന്ന റിപോർട്ടുകൾ വരുന്നത്. 2021 മുതൽ 2024 വരെ മുഖ്യ പരിശീലകനായി സേവനമനുഷ്ഠിച്ച സംഗക്കാരയ്ക്ക് ശേഷം ആണ് രാഹുൽ ദ്രാവിഡ് ടീമിൽ എത്തിയത്. എന്നാൽ ദ്രാവിഡ് പരിശീലകനായ 2025 ഐപിഎൽ സീസൺ രാജസ്ഥാൻ റോയൽസിനെ സംബന്ധിച്ച് വളരെ മോശം സീസൺ ആയിരുന്നു. ഇന്നിപ്പോൾ സംഗക്കാര ടീമിലേക്ക് പരിശീലകനായി തിരിച്ചെത്തുകയാണ് എന്ന റിപ്പോർട്ട് ആരാധകർക്കും ഏറെ സന്തോഷം നൽകുകയാണ്.
IPL 2026: നായകൻ ഇനി സഞ്ജു സാംസൺ അല്ല, രാജസ്ഥാൻ റോയൽസിന്റെ നായകനാകുക മറ്റൊരു യുവതാരം
സ്പോർട്സ്റ്റാർ ആണ് ഈ കാര്യം റിപ്പോർട്ട് ചെയ്‌തത്‌. ദ്രാവിഡിന്റെ രാജിയ്ക്ക് ശേഷം മുഖ്യ പരിശീലക സ്ഥാനത്തേക്ക് ഏറ്റവും കൂടുതൽ ഉയർന്നു വന്ന പേര് സംഗക്കാരയുടേതായിരുന്നു. അതുകൊണ്ടുതന്നെ അദ്ദേഹം തന്നെയാകും പരിശീലക സ്ഥാനത്തേക്ക് വീണ്ടും എത്തുക എന്ന റിപോർട്ടുകൾ വന്നിരുന്നു.

മൂന്ന് വർഷത്തെ തന്റെ സേവനത്തിനിടയിൽ, മുൻ ശ്രീലങ്കൻ ക്യാപ്റ്റൻ റോയൽസിനെ 2022 ൽ ഐ‌പി‌എൽ ഫൈനലിലേക്കും പിന്നീട് 2024 ൽ പ്ലേ ഓഫിലേക്കും നയിച്ചിരുന്നു. അതുകൊണ്ടുതന്നെ റോയൽസിനെ പരിശീലകൻ ആകാൻ എന്തുകൊണ്ടും അനുയോജ്യനായ താരം സംഗക്കാരയാണ് എന്ന വാദമാണ് രാജസ്ഥാൻ റോയൽസ് ആരാധകരിൽ നിന്ന് ഉയർന്നു കേൾക്കുന്നത്.

'രാഹുൽ ദ്രാവിഡ് ടീമിൽ നിന്ന് മാറി നിന്നതോടെ, സംഗക്കാരയായിരിക്കും എപ്പോഴും ആദ്യം പരിഗണിക്കപ്പെടുക, അതാണ് സംഭവിച്ചത്' ഇത്തരം ഒരു സന്ദേശമാണ് ആണ് രാജസ്ഥാൻ റോയൽസിന്റെ അടുത്ത വൃത്തങ്ങളിൽ നിന്നും ലഭിച്ചത് എന്നാണ് റിപ്പോർട്ടിൽ പറയുന്നത്. അതേസമയം വിക്രം റാത്തോർ, ഷെയ്ൻ ബോണ്ട് എന്നിവർ യഥാക്രമം ബാറ്റിങ്, ബൗളിംഗ് പരിശീലകരായി തുടരുമെന്ന് അറിയുന്നു.

സംഗക്കാരയെ സംബന്ധിച്ചിടത്തോളം ഏറ്റവും വലിയ വെല്ലുവിളി ക്യാപ്റ്റൻസി പ്രശ്നം പരിഹരിക്കുക എന്നതായിരിക്കും. സഞ്ജു സാംസൺ ഫ്രാഞ്ചൈസിയിൽ തുടരാൻ താൽപ്പര്യപ്പെടുന്നില്ല എന്ന റിപ്പോർട്ടുകളെത്തുടർന്ന്, ടീമിനെ ആര് നയിക്കുമെന്ന കാര്യത്തിൽ അനിശ്ചിതത്വം നിലനിൽക്കുന്നതായി റിപ്പോർട്ടുകൾ ഉണ്ട്.

എന്നാൽ ലേലത്തിന് മുമ്പ്, സംഗക്കാരയും ടീം മാനേജ്‌മെന്റും സാധ്യതയുള്ള ക്യാപ്റ്റൻസി തെരഞ്ഞെടുപ്പിനെക്കുറിച്ച് തീരുമാനിക്കുകയും വീണ്ടും സംഘടിപ്പിക്കുകയും ചെയ്യേണ്ടതുണ്ട്. യശസ്വി ജയ്‌സ്വാൾ, റിയാൻ പരാഗ്, ധ്രുവ് ജുറെൽ എന്നിവരുൾപ്പെടെ ടീമിലെ ശ്രദ്ധേയമായ താരങ്ങൾ ഉണ്ടായിരുന്നിട്ടും, കഴിഞ്ഞ വർഷം ടൂർണമെന്റിൽ റോയൽസ് പരാജയപ്പെട്ടു. ടീമിനെ വീണ്ടും ട്രാക്കിലേക്ക് കൊണ്ടുവരുക എന്നത് തന്നെയായിരിക്കും സംഗക്കാരയുടെ പ്രഥമ പരിഗണന.