RCB vs KKR: കളി മുടങ്ങിയാൽ ആർസിബിക്ക് പണി കിട്ടുമോ; പ്ലേ ഓഫ് യോഗ്യതയെ എങ്ങനെ ബാധിക്കും?

Curated by: ഗോകുൽ എസ്|Samayam Malayalam•17 May 2025, 8:55 pm

ഇന്ത്യ - പാക് സംഘർഷങ്ങളുടെ പശ്ചാത്തലത്തിൽ താൽക്കാലികമായി നിർത്തിവെച്ച 2025 സീസൺ ഐപിഎൽ ശനിയാഴ്ച കെകെആർ - ആർസിബി മത്സരത്തോടെ പുനരാരംഭിക്കുകയാണ്. എന്നാൽ കളിക്ക് വില്ലനായിരിക്കുകയാണ് കാലാവസ്ഥ. കനത്ത മഴയെ തുടർന്ന് മത്സരത്തിന്റെ ടോസിങ് പോലും നടന്നിട്ടില്ല. മഴ ശക്തമായി പെയ്യുന്ന സാഹചര്യത്തിൽ ഇന്നത്തെ മത്സരം നടക്കാനുള്ള ‌സാധ്യത കുറവാണെന്നാണ് റിപ്പോർട്ട്. അതേ സമയം ഇന്ന് കളി നടന്നില്ലെങ്കിൽ ടീമുകളുടെ പ്ലേ ഓഫ് സാധ്യതകളെ എങ്ങനെ ബാധിക്കുമെന്ന് നോക്കാം.നിലവിൽ 11 കളികളിൽ 16 പോയിന്റുമായി ലീഗിൽ രണ്ടാമതാണ് റോയൽ ചലഞ്ചേഴ്സ് ബംഗളൂരു. കൊൽക്കത്ത നൈറ്റ് റൈഡേഴ്സിന് എതിരായ കളി മഴ മൂലം ഉപേക്ഷിക്കുകയാണെങ്കിൽ ആർസിബിയുടെ പോയിന്റ് നേട്ടം 12 കളികളിൽ 17 പോയിന്റാകും. ഇതിന് ശേഷം രണ്ട് കളികൾ കൂടി ലീഗ് ഘട്ടത്തിൽ ബാക്കി നിൽക്കുന്നതിനാൽ ആർസിബിക്ക് ഇന്നത്തെ മഴ ഒരു തരത്തിലും വെല്ലുവിളിയില്ല. 17 പോയിന്റാകുന്നതോടെ ടീമിന്റെ പ്ലേ ഓഫ് യോഗ്യത ഏറെക്കുറെ ഉറപ്പാകുമെന്നാണ് കരുതപ്പെടുന്നതും.

നിലവിൽ 12 കളികളിൽ 11 പോയിന്റുമായി ലീഗിൽ ആറാം സ്ഥാനത്തുള്ള ടീമാണ് കൊൽക്കത്ത നൈറ്റ് റൈഡേഴ്സ്‌. ഇന്നത്തെ കളി മഴയെ തുടർന്ന് ഉപേക്ഷിക്കുകയാണെങ്കിൽ കെകെആറിന്റെ സമ്പാദ്യം. 13 കളികളിൽ 12 പോയിന്റാകും. ഇതോടെ ടീം ഔദ്യോഗികമായി പ്ലേ ഓഫ് സാധ്യതകളിൽ നിന്ന് പുറത്താവുകയും ചെയ്യും. ചുരുക്കി പറഞ്ഞാൽ ഇന്ന് മഴ പെയ്ത് കളി മുടങ്ങിയാലും ആർസിബിയെ അത് കാര്യമായി ബാധിക്കില്ല‌‌. മറിച്ച് കെകെആറിന് പണി കിട്ടും.


നിലവിൽ ഗുജറാത്ത് ടൈറ്റൻസാണ് ഐപിഎൽ പോയിന്റ് പട്ടികയിൽ ഒന്നാം സ്ഥാനത്ത്‌. 11 കളികളിൽ 16 പോയിന്റാണ് ശുഭ്മാൻ ഗിൽ നയിക്കുന്ന ടീമിനുള്ളത്‌‌‌. ആർസിബി 16 പോയിന്റുമായി ഒപ്പത്തിന് ഒപ്പമുണ്ട്. പഞ്ചാബ് കിങ്സാണ് മൂന്നാമത്. 11 കളികളിൽ 15 പോയിന്റാണ് ശ്രേയസ് അയ്യർ നയിക്കുന്ന ടീമിനുള്ളത്. 12 കളികളിൽ 15 പോയിന്റുള്ള ഹാർദിക് പാ‌ണ്ഡ്യയുടെ മുംബൈ ഇന്ത്യൻസ് നാലാം സ്ഥാനത്തുണ്ട്.

'18 വർഷത്തെ കാത്തിരിപ്പ്, ഇത് കോഹ്ലി കിരീടം ഉയർത്തുന്ന വർഷം'; ആർസിബി കാത്തിരുന്നത് ഇത്തവണ സാധ്യമാകുമെന്ന് മുൻ താരം
അതേ സമയം ഇന്നത്തെ കളിക്ക് ശേഷം സൺ റൈസേഴ്സ് ഹൈദരാബാദിന് എതിരെയും ലക്നൗ സൂപ്പർ ജയന്റ്സിന് എതിരെയുമാണ് ആർസിബിക്ക് മത്സരങ്ങൾ. ഹൈദരാബാദിനെ 23 നും ലക്നൗവിനെ 27 നുമാണ് ടീം നേരിടുക.