Vaibhav Suryavanshi; രാജസ്ഥാൻ റോയൽസ് കാത്തുവെച്ച വജ്രായുധം; അരങ്ങേറ്റത്തിൽ വെടിക്കെട്ട് തീർത്ത് സുര്യവൻശി

Edited byഅനുഷ ഗംഗാധരൻ | Samayam Malayalam | Updated: 19 Apr 2025, 10:58 pm

ജയ്‌പൂർ : ഐപിഎൽ പതിനെട്ടാം അങ്കത്തട്ടിൽ അരങ്ങേറ്റക്കാരനായ പതിനാലുകാരന്റെ വെടിക്കെട്ട്. രാജസ്ഥാൻ റോയൽസിന്റെ ബെഞ്ചിൽ കാത്തുവെച്ചിരുന്ന വജ്രായുധം ലക്‌നൗ സൂപ്പർ ജയിന്റ്‌സിനെതിരായ മത്സരത്തിൽ പുറത്തെടുത്തു. ലക്‌നൗവിന്റെ പ്രധാന ബൗളർ ശർദുൽ താക്കൂറിന്റെ നേരിട്ട ആദ്യ പന്ത് തന്നെ അതിർത്തി കടത്തി തന്റെ വരവറിയിച്ച് വൈഭവ് സൂര്യവൻശി. ഗാലറിയിലും കമന്റ് ബോക്സിലും അവിശ്വസിനീയമായ പ്രതികരണങ്ങൾ.
GT vs DC; രാജസ്ഥാൻ കൈവിട്ട ബട്ലറിന്റെ താണ്ഡവത്തിൽ ഡൽഹിയെ തോല്പിച്ച് ഗുജറാത്ത് ടൈറ്റൻസ്തെരുവിൽ അച്ഛനൊപ്പം കച്ചവടം നടത്തി ഇന്ത്യൻ ക്രിക്കറ്റിന്റെ നീല കുപ്പായം സ്വപ്നം കണ്ട യുവ താരം യശസ്വി ജയ്‌സ്വാളിന്റെ തോളോട് തോൾ ചേർന്ന് വൈഭവ് കത്തിക്കയറി. ഇരുത്തം വന്ന ഒരു ബാറ്ററുടെ സ്വിങ് എന്ന് തോന്നിപ്പിക്കും വിധം വൈഭവ് ബാറ്റ് വീശി. തുടരെ തുടരെ വെള്ള പന്തുകൾ അതിർത്തി കടന്നു. ഗാലറിയിലും ആവേശം. പരിക്കേറ്റ് സഞ്ജു സാംസൺ കളത്തിന് പുറത്തായപ്പോൾ നിരാശയിലായ രാജസ്ഥാൻ റോയൽസ് ആരാധകർക്ക് തുടക്കക്കാരൻ ബാറ്റിങ് വിരുന്ന് ഒരുക്കി.

നേരിട്ട 20 പന്തിൽ രണ്ട് ഫോറും മൂന്ന് സിക്‌സറും പറത്തി 34 റൺസ് നേടി താരം പുറത്തായെങ്കിലും വരും മത്സരങ്ങളിൽ തന്നെ അടയാളപ്പെടുത്താൻ പോന്ന ഇന്നിങ്‌സാണ് വൈഭവ് കാഴ്ചവെച്ചത്. കാലൊന്നിടറി പുറത്തായപ്പോൾ കണ്ണീരണിഞ്ഞ് പവലിയനിലേക്കുള്ള മടക്കം വൈഭവ് സൂര്യവൻശി എന്ന പതിനാലുകാരന് ക്രിക്കറ്റ് ഹൃദയ വികാരമാണെന്ന് തെളിയിക്കുന്നതായിരുന്നു. ഐപിഎൽ 2025 സീസണിന് മുന്നോടിയായി നടന്ന മെഗാ താരലേലത്തിൽ 1.1 കോടി രൂപയ്ക്ക് രാജസ്ഥാൻ രാജാക്കന്മാരുടെ പടയിലേക്ക് സൂര്യവൻശിയെ വാങ്ങുമ്പോൾ പതിനാലുകാരന്റെ കഴിവുകളെ കുറിച്ച് പലർക്കും ആശങ്കയുണ്ടായിരുന്നു. എന്നാൽ നിർണായക മത്സരത്തിൽ ഓപ്പണിങ് കൂട്ടുകെട്ടിൽ അടിപതറാതെ നിന്ന വൈഭവിന്റെ പ്രകടനം എല്ലാ സംശയങ്ങളെയും കാറ്റിൽ പറത്തി. സൂര്യവൻശിയുടെ ചരിത്രമറിയുന്നവർക്ക് ഈ പ്രകടനം തെല്ലും അത്ഭുതം നൽകുന്നില്ല.

തന്റെ പന്ത്രണ്ടാം വയസിൽ ബിഹാറിന് വേണ്ടി 5 മത്സരങ്ങളില്‍ നിന്ന് 400 റൺസ് സ്വന്തമാക്കി. ശേഷം രഞ്ജി ട്രോഫിയിലും ബീഹാറിന് വേണ്ടി താരം ബാറ്റ് വീശി. ഇതോടെ രഞ്ജി ട്രോഫി മത്സരത്തിൽ ബാറ്റ് വീശുന്ന ഏറ്റവും പ്രായം കുറഞ്ഞ താരമായി സൂര്യവൻശി മാറി. ചെന്നൈയിൽ ഓസ്‌ട്രേലിയയ്‌ക്കെതിരായ ഒരു യൂത്ത് ടെസ്റ്റ് മത്സരത്തിൽ ഇന്ത്യക്കായി അണ്ടർ 19 ടീമിലും സൂര്യവൻശി ബാറ്റ് വീശി. ഇതോടെ ഇന്ത്യ അണ്ടർ 19 കളിക്കുന്ന ഏറ്റവും പ്രായം കുറഞ്ഞ കളിക്കാരനായി പതിനാലുകാരൻ മാറി. അരങ്ങേറ്റ മത്സരത്തിൽ തന്നെ 64 പന്തിൽ സെഞ്ച്വറി നേടിയിരുന്നു. കഴിഞ്ഞ വർഷം നടന്ന അണ്ടർ 19 ഏഷ്യാ കപ്പിലും അദ്ദേഹം ഇന്ത്യൻ ടീമിൻ്റെ ഭാഗമായിരുന്നു.