അടുത്ത കളിയിൽ രാജസ്ഥാൻ റോയൽസിൽ ഈ നിർണായക മാറ്റങ്ങൾ വരും; സഞ്ജുവിന്റെ ടീം ഡബിൾ സ്ട്രോങ്ങാവാൻ പോകുന്നു

Curated byഗോകുൽ എസ് | Samayam Malayalam | Updated: 4 Apr 2025, 1:12 am

Samayam Malayalamരാജസ്ഥാൻ റോയൽസ്

2025 സീസൺ ഇന്ത്യൻ പ്രീമിയർ ലീഗിലെ ആദ്യ രണ്ട് മത്സരങ്ങളിലും പരാജയപ്പെട്ട രാജസ്ഥാൻ റോയൽസ്, മൂന്നാമത്തെ കളിയിൽ ചെന്നൈ സൂപ്പർ കിങ്സിനെ തകർത്ത് വിജയവഴിയിലേക്ക് എത്തിയിരുന്നു. ഗുവാഹത്തിയിൽ നടന്ന മത്സരത്തിൽ ആറ് റൺസിന്റെ ത്രില്ലിങ് ജയമാണ് സിഎസ്കെക്ക് എതിരെ റോയൽസ് നേടിയത്. നിലവിൽ മൂന്ന് കളികളിൽ രണ്ട് പോയിന്റ് മാത്രമുള്ള രാജസ്ഥാൻ ലീഗ് പട്ടികയിൽ ഒൻപതാം സ്ഥാനത്താണ്. ഈ മാസം അഞ്ചാം തീയതി കരുത്തരായ പഞ്ചാബ് കിങ്സിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. സീസണിലെ ആദ്യ രണ്ട് മത്സരങ്ങളിലും ജയം നേടിയ പഞ്ചാബ് കിങ്സ് ഉജ്ജ്വല ഫോമിലാണ് ഈ മത്സരത്തിന് ഇറങ്ങുന്നത്.

അവസാന മത്സരത്തിൽ കളിച്ച തന്ത്രങ്ങളിൽ സുപ്രധാന മാറ്റങ്ങളുമായാകും രാജസ്ഥാൻ റോയൽസ് അടുത്ത കളിക്ക് ഇറങ്ങുക. ക്യാപ്റ്റൻസിയിലാണ് ഏറ്റവും പ്രധാന മാറ്റം. സഞ്ജു സാംസണിന്റെ ഫിറ്റ്നസ് പ്രശ്നങ്ങളെ തുടർന്ന് റിയാൻ പരാഗായിരുന്നു ആദ്യ മൂന്ന് കളികളിലും റോയൽസിനെ നയിച്ചത്. എന്നാൽ നിലവിൽ വിക്കറ്റ് കീപ്പറാകാനുള്ള ഫിറ്റ്നസ് ക്ലിയറൻസ് ലഭിച്ചുകഴിഞ്ഞ ‌സഞ്ജു അടുത്ത കളിയിൽ ടീമിന്റെ ക്യാപ്റ്റൻസിയിലേക്കും തിരിച്ചെത്തും. നായക സ്ഥാനത്തേക്ക് സഞ്ജു തിരിച്ചെത്തുന്നത് രാജസ്ഥാൻ റോയൽസിന്റെ ആത്മവിശ്വാസം വർധിപ്പിക്കും.

Also Read: അടുത്ത കളിയിൽ സഞ്ജു സാംസണിന്റെ ലക്ഷ്യം ആ സ്പെഷ്യൽ റെക്കോഡ്; പഞ്ചാബിനെ തോൽപ്പിച്ചാൽ രാജസ്ഥാൻ റോയൽസിലെ കിടിലൻ നേട്ടം

വനിന്ദു ഹസരംഗക്ക് ബാറ്റിങ് ഓർഡറിൽ പ്രൊമോഷൻ നൽകുന്ന രാജസ്ഥാൻ റോയൽസിന്റെ സ്ട്രാറ്റജിയിലും മാറ്റം വന്നേക്കും. കഴിഞ്ഞ രണ്ട് കളികളിലും ബാറ്റിങ് ഓർഡറിൽ പ്രൊമോഷൻ ലഭിച്ച ഹസരംഗക്ക് രണ്ട് കളികളിലും തിളങ്ങാൻ സാധിച്ചിരുന്നില്ല. ഏഴാം നമ്പരിലോ എട്ടാം നമ്പരിലോ താരത്തെ ബാറ്റിങ്ങിന് ഇറക്കുന്നതാകും റോയൽസിന് നല്ലത്.

ഇമ്പാക്ട് പ്ലേയറുടെ കാര്യത്തിലും മാറ്റം വരും. കഴിഞ്ഞ മത്സരത്തിൽ സഞ്ജു സാംസണ് പകരം കുമാർ കാർത്തികേയയെ ആയിരുന്നു രാജസ്ഥാൻ റോയൽസ് ഇമ്പാക്ട് പ്ലേയറായി ഇറക്കിയത്. എന്നാൽ ഈ യുവ സ്പിന്നർക്ക് ആകെ ഒരോവർ മാത്രമാണ് റോയൽസ് നൽകിയത്. ആദ്യ മൂന്ന് കളികളിലും അവസരം ലഭിക്കാതിരുന്ന വലം കൈയ്യൻ പേസർ ആകാശ് മധ്വാൽ അടുത്ത മത്സരത്തിൽ ഇമ്പാക്ട് പ്ലേയറായി കളിക്കാനുള്ള സാധ്യത കൂടുതലാണ്.

ക്യാപ്റ്റൻ സഞ്ജു സാംസണും യശസ്വി ജയ്സ്വാളും ചേർന്നാകും ഈ മത്സരത്തിലും രാജസ്ഥാൻ റോയൽസിന്റെ ബാറ്റിങ് ഓപ്പൺ ചെയ്യുക. ആദ്യ മൂന്ന് കളികളിലും നിരാശപ്പെടുത്തിയ ജയ്സ്വാളിൽ നിന്ന് മികച്ച തിരിച്ചുവരവാണ് ആരാധകർ പ്രതീക്ഷിക്കുന്നത്. മൂന്നാം നമ്പരിൽ നിതീഷ് റാണ തന്നെ ഇറങ്ങും. ചെന്നൈക്ക് എതിരെ 36 പന്തിൽ 81 റൺസായിരുന്നു നിതീഷ് അടിച്ചുകൂട്ടിയത്.

Also Read: രാജസ്ഥാൻ റോയൽസ് കാണിച്ച ഏറ്റവും വലിയ മണ്ടത്തരം, നേട്ടമായത് ഗുജറാത്ത് ടൈറ്റൻസിന്; ഇത്തവണ മിന്നും ഫോമിൽ ജോസ് ബട്ലർ

റിയാൻ പരാഗ്, ധ്രുവ് ജൂറൽ, ഷിംറോൺ ഹെറ്റ്മെയർ എന്നിവർക്കും മധ്യനിരയിൽ സ്ഥാനം ഉറപ്പാണ്. പരാഗ്, ഹെറ്റി എ‌ന്നിവരും ഈ കളിയിൽ ഫോമിലേക്ക് മടങ്ങിയെത്തേണ്ടത് രാജസ്ഥാൻ റോയൽസിന് അനിവാര്യമാണ്. വനിന്ദു ഹസരംഗയും, മഹീഷ തീക്ഷണയുമാകും സ്പിൻ നിരയിൽ അണിനിരക്കുക. ജോഫ്ര ആർച്ചർ നയിക്കുന്ന പേസ് നിരയിൽ സന്ദീപ് ശർമ, തുഷാർ ദേഷ്പാണ്ടെ എന്നിവരും കളിക്കും. ഇമ്പാക്ട് താരമായി ആകാശ് മധ്വാൽ എത്താനുള്ള സാധ്യതകൾ തള്ളിക്കളയാനാവില്ല.

രാജസ്ഥാൻ റോയൽസിന്റെ സാധ്യത ഇലവൻ: സഞ്ജു സാംസൺ ( ക്യാപ്റ്റൻ ), യശസ്വി ജയ്സ്വാൾ, നിതീഷ് റാണ, റിയാൻ പരാഗ്, ധ്രുവ് ജൂറൽ, ഷിം റോൺ ഹെറ്റ്മെയർ, വനിന്ദു ഹസരംഗ, ജോഫ്ര ആർച്ചർ, മഹീഷ് തീക്ഷണ, സന്ദീപ് ശർമ, തുഷാർ ദേഷ്പാണ്ടെ. ഇമ്പാക്ട് താരം: ആകാശ് മധ്വാൽ/ശുഭം ദുബെ.