അഭിഷേക് ശർമയുടെ വെടിക്കെട്ടിന്റെ റെക്കോഡ് തകർത്ത് ചെന്നൈയുടെ സർപ്രൈസ് താരം; ആദ്യ കളിയിൽ വമ്പൻ നേട്ടം

Curated byഗോകുൽ എസ് | Samayam Malayalam | Updated: 8 May 2025, 2:22 am

ഐപിഎല്ലിൽ ഇന്നലെ നടന്ന ത്രില്ലർ മത്സരത്തിൽ കൊൽക്കത്ത നൈറ്റ് റൈഡേഴ്സിനെ പരാജയപ്പെടുത്താൻ ചെന്നൈ സൂപ്പർ കിങ്സിന് സാധിച്ചിരുന്നു‌. ആവേശം അവസാന ഓവറിലേക്ക് നീണ്ട കളിയിൽ രണ്ട് വിക്കറ്റിനായിരുന്നു ചെന്നൈയുടെ വിജയം. ഈ സീസണിൽ ടീം നേടുന്ന മൂന്നാമത്തെ മാത്രം ജയമായിരുന്നു ഇത്. പ്ലേ ഓഫ് സാധ്യതകളിൽ നിന്ന് നേരത്തെ തന്നെ പുറത്തായിക്കഴിഞ്ഞ ചെന്നൈക്ക് വലിയ ആവേശം സമ്മാനിക്കുന്ന ജയമാണിത്.അതേ സമയം കെകെആറിന് എതിരായ കളിയിൽ ചെന്നൈ‌ നിരയിൽ ശരിക്കും ഞെട്ടിച്ചത് പുതുമുഖ താരം ഉർവിൽ പട്ടേലായിരുന്നു. ഐപിഎല്ലിലെ തന്റെ അരങ്ങേറ്റ മത്സരത്തിന് ഇറങ്ങിയ ഈ യുവ വിക്കറ്റ് കീപ്പർ ബാറ്റർ ബാറ്റിങ് വെടിക്കെട്ടുമായി ഞെട്ടിച്ചു. 180 റൺസ് വിജയലക്ഷ്യം പിന്തുടർന്ന കളിയിൽ ചെന്നൈക്ക് വേണ്ടി മൂന്നാം നമ്പരിലാണ് ഉർവിൽ പട്ടേൽ ബാറ്റ് ചെയ്തത്. വെറും 11 പന്തുകളിൽ ഒരു ഫോറും നാല് സിക്സറുകളുമടക്കം 31 റൺസാണ് ഈ ഇരുപത്തിയാറുകാരൻ നേടിയത്. ഈ ഇന്നിങ്സിനിടെ ഒരു കിടിലൻ ഐപിഎൽ റെക്കോഡും ഉർവിൽ പട്ടേൽ സ്വന്തമാക്കി.


ഐപിഎൽ അരങ്ങേറ്റത്തിലെ ആദ്യ 10 പന്തുകളിൽ ഏറ്റവും കൂടുതൽ റൺസെടുക്കുന്ന താരമെന്ന റെക്കോഡാണ് ഉർവിൽ പട്ടേലിന് സ്വന്തമായത്. കെകെആറിന് എതിരെ ആദ്യ 10 പന്തിൽ 31 റൺസായിരുന്നു താരത്തിന്റെ ബാറ്റിൽ നിന്ന് പിറന്നത്. അഭിഷേക് ശർമയുടെ പേരിലായിരുന്നു ഇത്രയും നാൾ ഇക്കാര്യത്തിലെ റെക്കോഡ്. 2018 ൽ തന്റെ ഐപിഎൽ അരങ്ങേറ്റത്തിൽ ഡെൽഹി ക്യാപിറ്റൽസിന് വേണ്ടി 30 റൺസായിരുന്നു അഭിഷേക് ശർമ നേടിയത്.

സ്റ്റമ്പുകള്‍ക്ക് പിന്നില്‍ ധോണിക്ക് ചരിത്രനേട്ടം; ആശ്വാസ ജയവുമായി സിഎസ്‌കെ, കെകെആറിന് വന്‍ പ്രഹരം
അതേ സമയം രണ്ട് ദിവസങ്ങൾക്ക് മുൻപാണ് പകരക്കാരനായി ഉർവിൽ പട്ടേലിനെ ചെന്നൈ സൂപ്പർ കിങ്സ് സൈൻ ചെയ്തത്. ഗുജറാത്തിൽ നിന്നുള്ള ഈ 26 കാരൻ, വെടിക്കെട്ട് ബാറ്റിങ്ങിന് പേരുകേട്ട വിക്കറ്റ് കീപ്പർ ബാറ്ററാണ്. അഭ്യന്തര ക്രിക്കറ്റിൽ കഴിഞ്ഞ സീസണിൽ ഉജ്ജ്വല ഫോമിൽ കളിച്ച താരം, ത്രിപുരക്ക് എതിരായ സയ്യിദ് മുഷ്താഖ് അലി ട്രോഫി മത്സരത്തിൽ 28 പന്തിൽ സെഞ്ചുറി നേടി ഞെട്ടിച്ചിരുന്നു.

മഴയ്ക്കും തോല്‍പ്പിക്കാനാവാത്ത പോരാട്ട വീര്യം, മുംബൈക്കെതിരേ അവസാന പന്തില്‍ വിജയം; ഗുജറാത്ത് ടൈറ്റന്‍സ് വീണ്ടും ഒന്നാമത്
ഇതിന് ശേഷം ഉത്തരാഖണ്ഡിന് എതിരെ 36 പന്തിൽ സെഞ്ചുറി നേടിയും താരം അമ്പരപ്പിച്ചിരുന്നു. 2025 സീസൺ ഇന്ത്യൻ പ്രീമിയർ ലീഗിൽ പരിക്കുകളാൽ വലയുന്ന ചെന്നൈ സൂപ്പർ കിങ്സ് കഴിഞ്ഞ മാസാവസാനം മിഡ് സീസൺ ട്രയൽസിന് ഉർവിൽ പട്ടേൽ അടക്കമുള്ള ചില താരങ്ങളെ വിളിപ്പിക്കുകയും ഈയാഴ്ച താരത്തെ സൈൻ ചെയ്യുകയുമായിരുന്നു.