അവര്‍ ആദ്യമായി കൈ പിടിച്ചത് എന്റെ മുന്നില്‍ വച്ചാണ്; നയനുമായി പ്രണയത്തിലാണെന്ന് വിക്കി പറഞ്ഞപ്പോള്‍ ദേഷ്യം വന്നു എന്ന് ബാലാജി

വിഘ്‌നേശ് ശിവന്റെ ജീവിതത്തിലെ ഏറ്റവും വലിയ നേട്ടങ്ങളിലൊന്നായിരുന്നു നാനും റൗഡി താന്‍ എന്ന ചിത്രം. ഒരു സംവിധായകന്‍ എന്ന നിലയില്‍ ഇന്റസ്ട്രിയില്‍ ഒരു പേര് നേടി എന്ന് മാത്രമല്ല, നയന്‍താരയെ പോലൊരു ഭാര്യയെ വിക്കിയ്ക്ക് കിട്ടിയതും നാനും റൗഡിതാന്‍ എന്ന ചിത്രത്തിന് ശേഷമാണ്. പക്ഷേ ആ സിനിമ സംഭവിച്ചതിന് പിന്നില്‍ വലിയൊരു കഥയുണ്ട്. അന്ന് ഇന്റസ്ട്രിയിലുണ്ടായിരുന്ന എല്ലാ നടന്മാരുടെ പുറകെയും കഥയുമായി വിക്കി നടന്നിരുന്നുവത്രെ. അവസാനം വിജയ് സേതുപതിയ്ക്കരികില്‍ എത്തി. കഥ ഇഷ്ടപ്പെട്ടിട്ടൊന്നുമല്ല, വിക്കിയിലുള്ള വിശ്വാസം കൊണ്ടാണ് അത് ചെയ്തത് എന്ന് അടുത്തിടെ വിജയ് സേതുപതി തന്നെ പറഞ്ഞിട്ടുണ്ട്.

നയന്‍താരയും വിക്കിയും പ്രണയത്തിലായതും നാനും റൗഡി താന്‍ എന്ന ചിത്രത്തിന്റെ ലൊക്കേഷനില്‍ വച്ചാണ്. വലിയൊരു ഇടവേളയ്ക്ക് ശേഷം വിഘ്‌നേശ് ശിവന്‍ സംവിധാനം ചെയ്യുന്ന എല്‍ഐകെ എന്ന ചിത്രത്തിന്റെ ലോഞ്ചിങ് പരിപാടിയില്‍ ആ പ്രണയം വീണ്ടും ചര്‍ച്ചയായി. ചിത്രത്തിന്റെ പ്രൊഡ്യൂസറാണ് നയന്‍താര . അങ്ങനെ ഒരു പരിപാടിയുടെ എല്ലാ ഒരുക്കങ്ങളും നടത്തിയതും, പങ്കെടുക്കേണ്ടവരെ എല്ലാം നിരന്തരം നേരിട്ട് വിളിച്ച് സംസാരിച്ചതും നയന്‍താര തന്നെയാണ്. പക്ഷേ ചടങ്ങില്‍ നിന്ന് മനപൂര്‍വ്വം നയന്‍താര മാറി നിന്നു. പൊതുവെ ഒരു സിനിമയുടെയും പ്രമോഷന്‍ പരിപാടികള്‍ക്ക് പങ്കെടുക്കാത്തത് കാരണം, ഈ ഒരു സിനിമയുടെ പ്രമോഷന് മാത്രം പങ്കെടുക്കുന്നത് വിവാദമാവും എന്നതുകൊണ്ടാവാം നയന്‍ മാറി നിന്നത്.

Also Read: ഡ്രൈവറെ കൊലപ്പെടുത്തി, കഷ്ണങ്ങളാക്കിയ നടി, ഇന്റസ്ട്രിയേ നിലച്ചു പോയ വാര്‍ത്ത; ആ ദുരന്ത അനുഭവത്തെ കുറിച്ച് അംബിക

എന്നിരുന്നാലും വിക്കിയുടെ കരിയറിലും ജീവിതത്തിലും നയന്‍താരയ്ക്കുള്ള സാന്നിധ്യം പറയാതിരിക്കാന്‍ കഴിയില്ലല്ലോ. അത്രയേറെ പിന്തുണയും പ്രോത്സാഹനവും നല്‍കുന്ന നയന്‍ വിക്കിയുടെ ജീവിതത്തിലെ അനുഗ്രഹമാണെന്ന് സംവിധായകനും നടനുമായ ആര്‍ജെ ബാലാജി പറയുന്നു. അവരുടെ പ്രണയത്തിന്റെ തുടക്കം മുതല്‍ അതിന് സാക്ഷിയായ ആളാണ് ഞാന്‍. ഇന്നും അത് കാണാന്‍ കഴിയുന്നതില്‍ സന്തോഷമുണ്ട് എന്ന് ആര്‍ജെ ബാലാജി പറഞ്ഞു. ഞാന്‍ വിക്കിയുടെ അടുത്ത സുഹൃത്താണ്, പക്ഷേ ഈ ചടങ്ങിന് എന്നെ വിളിച്ചത് വിക്കിയല്ല, നയന്‍താരയാണ് എന്ന് പറഞ്ഞുകൊണ്ടാണ് ആര്‍ജെ ബാലാജി സംസാരിച്ചു തുടങ്ങുന്നത്.

കൈ പിടിച്ചാലാണ് പ്രണയം സംഭവിക്കുക എന്നാണ് എല്‍ഐകെയില്‍ വിക്കി പറയുന്നത്. അങ്ങനെ ഒരു കൈ പിടിത്തത്തില്‍ സംഭവിച്ച പ്രണയമാണ് വിക്കിയുടെയും നയന്റെയും. അവര്‍ ആദ്യമായി കൈ പിടിച്ചത് എന്റെ മുന്നില്‍ വച്ചാണ്, അതിന് ഞാന്‍ സാക്ഷിയാണ്. ആദ്യമായി വിക്കി വന്ന് നയന്‍താരയുമായി പ്രണയത്തിലാണ് എന്ന് പറഞ്ഞപ്പോള്‍ എനിക്ക് ദേഷ്യം വന്നു. എന്നാലും എന്റെ നന്‍പന്‍, അവന് നല്ല ജീവിതം കിട്ടുന്നെങ്കില്‍ ആയിക്കോട്ടെ എന്ന് കരുതി. പക്ഷേ എനിക്ക് വിശ്വാസമില്ലായിരുന്നു. നേരെ പോയി നയന്‍താരയോട് ചോദിച്ചു, വിക്കിയുമായി പ്രണയത്തിലാണോ എന്ന്. അതെ അണ്ണാ എന്ന് നയനും പറഞ്ഞു. അന്ന് മുതല്‍, ഇന്നും അവരുടെ പ്രണയത്തിന് സാക്ഷിയാണ് ഞാന്‍- ആര്‍ജെ ബാലാജി പറഞ്ഞു