അവസാന കളിക്ക് ശേഷം അക്കാര്യം തുറന്ന് സമ്മതിച്ച് സഞ്ജു സാംസൺ; രാജസ്ഥാൻ റോയൽസ് നായകൻ പറഞ്ഞത് ഇങ്ങനെ

Curated by: ഗോകുൽ എസ്|Samayam Malayalam•21 May 2025, 1:05 am

2025 സീസൺ ഇന്ത്യൻ പ്രീമിയർ ലീഗിലെ തങ്ങളുടെ അവസാന മത്സരത്തിൽ വിജയം നേടിയിരിക്കുകയാണ് രാജസ്ഥാൻ റോയൽസ്. ചൊവ്വാഴ്ച രാത്രി നടന്ന മത്സരത്തിൽ മഹേന്ദ്ര സിങ് ധോണി നയിച്ച ചെന്നൈ സൂപ്പർ കിങ്സിനെ ആറ് വിക്കറ്റിനാണ് രാജസ്ഥാൻ റോയൽസ് വീഴ്ത്തിയത്. ഡെൽഹിയിൽ നടന്ന കളിയിൽ ആദ്യം ബാറ്റ് ചെയ്ത സിഎസ്കെ 20 ഓവറിൽ 187/8 എന്ന മികച്ച സ്കോർ നേടിയപ്പോൾ, രാജസ്ഥാൻ റോയൽസ് വെറും 17.1 ഓവറുകളിൽ ലക്ഷ്യം കണ്ടു.ജയത്തോടെ സീസൺ അവസാനിപ്പിക്കാൻ സാധിച്ചതിന്റെ ആശ്വാസം മത്സരശേഷം സംസാരിക്കുമ്പോൾ രാജസ്ഥാൻ റോയൽസ് നായകൻ സഞ്ജു സാംസണിന്റെ മുഖത്തുണ്ടായിരുന്നു. ചെന്നൈ സൂപ്പർ കിങ്സിന് എതിരായ കളിയിൽ കിടിലൻ ബൗളിങ് പ്രകടനം കാഴ്ച വെച്ച പേസർ ആകാശ് മധ്വാലിനെ വാനോളം പ്രശംസിച്ച സഞ്ജു, ജോഫ്ര ആർച്ചർ, സന്ദീപ് ശർമ എന്നിവരുടെ അഭാവത്തെക്കുറിച്ചും ചൂണ്ടിക്കാട്ടി. ഈ സീസണിൽ രാജസ്ഥാൻ റോയൽസിന് ചില തെറ്റുകൾ സംഭവിച്ചുവെന്ന് തുറന്ന് സമ്മതിക്കാനും സഞ്ജു മടികാണിച്ചില്ല.


"ഇനി ശരിക്കും ഒരു അവലോകനം നടത്തേണ്ടതുണ്ട് ( സീസണെക്കുറിച്ച് ). തീർച്ചയായും ഞങ്ങൾക്ക് ഇതിലും മികച്ച പ്രകടനം കാഴ്ച വെക്കാമായിരുന്നു. ഭാഗ്യമല്ല കാരണം. ഞങ്ങൾ കുറച്ച് തെറ്റുകൾ വരുത്തി. അടുത്ത സീസണിൽ മികച്ച മാനസികാവസ്ഥയോടെ ഞങ്ങൾക്ക് തിരിച്ചെത്തണം. വൈഭവിനെ കുറിച്ച് പറയാൻ എനിക്ക് വാക്കുകളില്ല. അവൻ നേടിയ സെഞ്ചുറി വളരെ മികച്ചതായിരുന്നു. സ്ലോ ബോളുകൾ കവറിന് മുകളിലൂടെ സിക്സർ പറത്താൻ അവന് സാധിക്കും. ഇന്ന് മധ്യ ഓവറുകളിൽ വളരെ മികച്ച രീതിയിൽ അവൻ അവന്റെ ജോലി ചെയ്തു. ഈ ചെറിയ പ്രായത്തിൽ തന്നെ അവന് കളിയെക്കുറിച്ച് മികച്ച അവബോധമുണ്ട്. അത് അഭിനന്ദനീയമാണ്." സഞ്ജു പറഞ്ഞു.

അവസാന കളിക്കിടെ ആ കിടിലൻ ബാറ്റിങ് റെക്കോഡ് സ്വന്തമാക്കി സഞ്ജു സാംസൺ; രാജസ്ഥാൻ റോയൽസിൽ ഈ നേട്ടം കൈവരിക്കുന്ന ആദ്യ ബാറ്റർ
അതേ സമയം ദയനീയ പ്രകടനമായിരുന്നു 2025 സീസൺ ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിന്റേത്. 14 മത്സരങ്ങളിൽ നാല് വിജയം മാത്രം നേടാനയ അവർക്ക് എട്ട് പോയിന്റ് മാത്രമാണുള്ളത്. അഞ്ചോളം മത്സരങ്ങളിൽ നേരിയ മാർജിനിലുള്ള പരാജയമായിരുന്നു റോയൽസിന്റേത് എന്നതാണ് ശ്രദ്ധേയം. നിലവിൽ ചെന്നൈ സൂപ്പർ കിങ്സ് മാത്രമാണ് പോയിന്റ് പട്ടികയിൽ രാജസ്ഥാൻ റോയൽസിന് താഴെയുള്ളത്. സഞ്ജു ഉൾപ്പെടെയുള്ള ചില പ്രധാന കളിക്കാരുടെ പരിക്കുകൾ ഈ സീസണിൽ റോയൽസിന്റെ പ്രകടനത്തെ ബാധിച്ചു.

രാജസ്ഥാൻ റോയൽസ് - ചെന്നൈ സൂപ്പർ കിങ്സ് മത്സരം ഇങ്ങനെ: തങ്ങളുടെ അവസാന ലീഗ് മത്സരത്തിൽ ടോസ് നേടിയ രാജസ്ഥാൻ റോയൽസ്, ചെന്നൈ സൂപ്പർ കിങ്സിനെ ബാറ്റിങ്ങിന് അയക്കുകയായിരുന്നു. 20 ഓവറുകളിൽ 187/8 എന്ന മികച്ച സ്കോറാണ് ചെന്നൈ നേടിയത്. 20 പന്തിൽ 43 റൺസ് നേടിയ ആയുഷ് മാത്രെയായിരുന്നു അവരുടെ ടോപ് സ്കോറർ. 25 പന്തിൽ 42 റൺസ് നേടിയ ഡിവാൾഡ് ബ്രെവിസും തിളങ്ങി. രാജസ്ഥാൻ റോയൽസിന് വേണ്ടി ആകാശ് മധ്വാലും യുധ്വീർ സിങ്ങും മൂന്ന് വിക്കറ്റുകൾ വീതം സ്വന്തമാക്കി.

ആളിക്കത്തി വൈഭവും സഞ്ജുവും; രാജസ്ഥാന്‍ റോയല്‍സിന് വിജയത്തോടെ പടിയിറക്കം
188 റൺസ് വിജയലക്ഷ്യം വെറും 17.1 ഓവറിൽ രാജസ്ഥാൻ റോയൽസ് മറികടന്നു. 33 പന്തിൽ 57 റൺസ് നേടിയ വൈഭവ് സൂര്യവംശിയാണ് റോയൽസിനെ മുന്നിൽ നിന്ന് നയിച്ചത്‌. യശസ്വി ജയ്സ്വാൾ 19 പന്തിൽ 36 റൺസും, സഞ്ജു സാംസൺ 31 പന്തിൽ 41 റൺസും നേടി. 12 പന്തിൽ 31 റൺസെടുത്ത് പുറത്താകാതെ നിന്ന ധ്രുവ് ജൂറൽ ടീമിന്റെ ജയം അനായാസമാക്കി.