അവസാന കളിയിലും റെക്കോഡ്, വീണ്ടും ഞെട്ടിച്ച് വൈഭവ് സൂര്യവംശി; രാജസ്ഥാൻ റോയൽസ് താരത്തിന്റെ നേട്ടം ഇങ്ങനെ

Curated by: ഗോകുൽ എസ്|Samayam Malayalam•21 May 2025, 2:06 am

2025 സീസൺ ഐപിഎല്ലിലെ താരോദയമാണ് രാജസ്ഥാൻ റോയൽസിന്റെ കൗമാര ഓപ്പണറായ വൈഭവ് സൂര്യവംശി. ക്യാപ്റ്റൻ സഞ്ജു സാംസണിന് പരിക്കേറ്റ സാഹചര്യത്തിൽ ഐപിഎല്ലിൽ അരങ്ങേറ്റത്തിന് അവസരം ലഭിച്ച വൈഭവ് സീസൺ അവസാനിക്കുമ്പോൾ ടീമിന്റെ അവിഭാജ്യ ഘടകങ്ങളിൽ ഒരാളാണ്. ഗുജറാത്ത് ടൈറ്റൻസിന് എതിരായ കളിയിൽ വെറും 35 പന്തിൽ സെഞ്ചുറി നേടിയ വൈഭവ് സൂര്യവംശി ക്രിക്കറ്റ് പ്രേമികളെ ത്രസിപ്പിക്കുന്ന ഒരുപറ്റം കിടിലൻ ഇന്നിങ്സുകൾ ഇത്തവണ കാഴ്ച വെച്ചു. ചെന്നൈ സൂപ്പർ കിങ്സിന് എതിരായ അവസാന കളിയിലും ഉജ്ജ്വല ബാറ്റിങ് പ്രകടനമായിരുന്നു ഈ പതിനാലുകാരൻ കാഴ്ച വെച്ചത്. ഈ മത്സരത്തിനിടെ ഒരു കിടിലൻ ഐപിഎൽ റെക്കോഡും താരം സ്വന്തമാക്കി.


ചെന്നൈ സൂപ്പർ കിങ്സിന് എതിരായ മത്സരത്തിൽ തകർപ്പൻ അർധസെഞ്ചുറിയാണ് വൈഭവ് സൂര്യവംശി നേടിയത്. 33 പന്തിൽ നാല് വീതം ഫോറുകളും സിക്സറുകളും സഹിതം 57 റൺസാണ് താരത്തിന്റെ ബാറ്റിൽ നിന്ന് പിറന്നത്. ഈ സീസണിൽ ഇത് രണ്ടാമത്തെ തവണയാണ് സൂര്യവംശി 50 റൺസിന് മുകളിൽ സ്കോർ ചെയ്യുന്നത്. ഇതോടെ ഐപിഎല്ലിൽ 18 വയസ് തികയുന്നതിന് മുൻപ് രണ്ട് 50+ സ്കോറുകൾ നേടുന്ന ആദ്യ ബാറ്ററെന്ന റെക്കോഡ് വൈഭവ് സൂര്യവംശി സ്വന്തമാക്കി.

അവസാന കളിക്ക് ശേഷം അക്കാര്യം തുറന്ന് സമ്മതിച്ച് സഞ്ജു സാംസൺ; രാജസ്ഥാൻ റോയൽസ് നായകൻ പറഞ്ഞത് ഇങ്ങനെ
18 വയസാകുന്നതിന് മുന്നേ ഐപിഎല്ലിൽ കൂടുതൽ റൺസ് നേടുന്ന ബാറ്ററെന്ന നേട്ടവും ഇതിനൊപ്പം വൈഭവ് സൂര്യവംശിയുടെ പേരിലായി. ചെന്നൈ സൂപ്പർ കിങ്സ് താരം ആയുഷ് മാത്രെയെയാണ് ഇക്കാര്യത്തിൽ വൈഭവ് പിന്നിലാക്കിയത്. പതിനാലുകാരനായ വൈഭവ് 252 റൺസാണ് ഐപിഎല്ലിൽ നേടിയിട്ടുള്ളത്. 206 റൺസാണ് ഈ ലിസ്റ്റിൽ രണ്ടാമതുള്ള ആയുഷ് മാത്രെക്കുള്ളത്. റിയാൻ പരാഗ് 160 റൺസോടെ ലിസ്റ്റിൽ മൂന്നാമതുണ്ട്.

വൈഭവിനായി സഞ്ജു ചെയ്തത് ഏറ്റെടുത്ത് ആരാധകർ; ഇതാണ് ക്യാപ്റ്റൻ എന്ന് വാഴ്ത്തിപ്പാടി സോഷ്യൽ മീഡിയ
അതേ സമയം കന്നി ഐപിഎൽ സീസണിൽ ഏഴ് മത്സരങ്ങളാണ് വൈഭവ് സൂര്യവംശി കളിച്ചത്‌. ലക്നൗ സൂപ്പർ ജയന്റ്സിന് എതിരെയായിരുന്നു അരങ്ങേറ്റം. 34 റൺസാണ് ഈ കളിയിൽ താരം നേടിയത്. തന്റെ മൂന്നാമത്തെ കളിയിൽ ഗുജറാത്ത് ടൈറ്റൻസിന് എതിരെ 35 പന്തിൽ സെഞ്ചുറി നേടി വൈഭവ് ഞെട്ടിച്ചു. ഇതിന് ശേഷം കളിച്ച രണ്ട് മത്സരങ്ങളിൽ നിരാശപ്പെടുത്തിയ വൈഭവ്, സീസണിലെ അവസാന രണ്ട് കളികളിൽ വീണ്ടും വെടിക്കെട്ടുമായി തിളങ്ങി. പഞ്ചാബ് കിങ്സിന് എതിരെ 40 റൺസും, ചെന്നൈ സൂപ്പർ കിങ്സിന് എതിരെ 57 റൺസുമാണ് ഈ പതിനാലുകാരന്റെ ബാറ്റിൽ നിന്ന് പിറന്നത്.