അവസാനം കെനിഷാ ഫ്രാൻസിസും പ്രതികരിച്ചു; എത്രമാത്രം വേദന അനുഭവിക്കുന്നു എന്ന് പറയേണ്ടി വരുന്നത് വല്ലാത്ത അവസ്ഥയാണ്!

Authored by: അശ്വിനി പി|Samayam Malayalam•15 May 2025, 6:09 pm

രവി മോഹൻ - ആർതി രവി വിവാഹ മോചനം തമിഴ് സിനിമയിൽ സമീപകാലത്തെങ്ങും കണ്ടിട്ടില്ലാത്ത വിധം പരസ്പരം കുറ്റപ്പെടുത്തലുകളായി മാറുകയാണ്. രവി മോഹൻ ഒരു വിവാഹത്തിൽ തന്റെ സുഹൃത്തും തെറാപ്പിസ്റ്റുമായ കെനിഷാ ഫ്രാൻസിസിനൊപ്പം പങ്കെടുത്തതിന് പിന്നാലെ ആർതി രവി പങ്കുവച്ച പത്രക്കുറിപ്പാണ് ഏറെ ചർച്ചയായത്. തന്നെയും മക്കളെയും പൂർണമായും അവഗണിക്കുന്നു എന്ന് പറഞ്ഞായിരുന്നു ആർതിയുടെ പോസ്റ്റ്.

പിന്നാലെ രവി മോഹനും കെനിഷാ ഫ്രാൻസിസിനും വ്യാപകമായ സൈബർ അറ്റാക്കുകൾ നേരിടേണ്ടി വന്നു. ഒരാഴ്ചയോളമായി ഈ വിവാദങ്ങളോടൊന്നും ഇരുവരും പ്രതികരിച്ചിരുന്നില്ല. അവസാനം രവി മോഹൻ നീണ്ട മൂന്ന് പേജുള്ള ഒരു സ്റ്റേറ്റ്മെന്റിലൂടെ ആർതിയുമായുള്ള ജീവിതത്തിൽ താൻ എത്രത്തോളം വേദനകൾ അനുഭവിച്ചു എന്ന് തുറന്നെഴുതി. പൊന്മുട്ടയിടുന്ന താറാവിനെ പോലെയായിരുന്നു ആർതിയ്ക്കും കുടുംബത്തിനും ഞാൻ, എന്റെ വീട്ടിലേക്ക് പോലും സമ്പാദിക്കുന്ന പണം അയച്ചു കൊടുക്കാൻ അനുവദിക്കാതെ, ഒരു കൂട്ടിലിട്ട് വളർത്തുകയായിരുന്നു എന്നൊക്കെയാണ് രവി മോഹൻ തുറന്നെഴുതിയത്.

Also Read: ചേച്ചി എല്ലാവർക്കും മാതൃക, 37 കാരി ശാമിലി എന്താ വിവാഹം കഴിക്കാത്തത്? സ്വാതന്ത്ര്യത്തിനും നിയന്ത്രണത്തിനും ഇടയിലാണെന്ന് നടി

തന്റെ കഴിഞ്ഞ കാല ജീവിതത്തെ പൂർണമായും ഒഴിവാക്കിയാണ് ആ വീട്ടിൽ നിന്നും ഇറങ്ങിയത്. മുൻ ഭാര്യയെ ഒഴിവാക്കുന്നു എന്നല്ലാതെ, എന്റെ മക്കളെ ഒരിക്കലും അകറ്റി നിർത്തില്ല. അവർ രണ്ട് പേരും തന്നെയാണ് എന്നും എന്റെ ആദ്യത്തെ പ്രയോരിറ്റി. ഇപ്പോൾ ഇമോഷണൽ പബ്ലിസിറ്റിയ്ക്ക് വേണ്ടി എന്റെ മക്കളെ ഉപയോഗിക്കുന്നത് തനിക്ക് സഹിക്കാൻ പറ്റുന്നില്ല എന്നൊക്കെ രവി മോഹൻ വ്യക്തമാക്കുന്നു.

തന്റെ തീർത്തും സ്വകാര്യമായ ഈ വിഷയത്തിലേക്ക്, ഇത്രയും വേദന നിറഞ്ഞ അവസ്ഥയിൽ തന്നെ സഹായിച്ച സുഹൃത്തിന്റെ പേര് തെറ്റായി വലിച്ചിഴച്ചതിന് കെനിഷാ ഫ്രാൻസിസിനോട് രവി മോഹൻ ക്ഷമാപണം നടത്തുന്നുണ്ട്. ഈ പോസ്റ്റ് ഇൻസ്റ്റഗ്രാം സ്റ്റോറിയായി ഷെയർ ചെയ്താണ് ഇപ്പോൾ കെനിഷാ പ്രതികരിച്ചിരിയ്ക്കുന്നത്.

'ഒരു മനുഷ്യൻ അനുഭവിച്ചുകൊണ്ടികിയ്ക്കുന്ന വേദനകൾ വീണ്ടും വീണ്ടും പറയേണ്ടി വരിക എന്നത് വല്ലാത്ത അവസ്ഥയാണ്. എന്താണ് യഥാർത്ഥത്തിൽ സംഭവിച്ചത് എന്നറിയാതെ ജനങ്ങൾ പെട്ടന്ന് കമന്റുകൾ എഴുതും. ഇത് നേരത്തെയും സംഭവിച്ചിട്ടുണ്ട്, ഇപ്പോഴും ആവർത്തിക്കുന്നു. പക്ഷേ നിങ്ങളൊരു നിലപാടിലെത്തുന്നതിന് മുൻപ് എന്താണ് സത്യം എന്ന് നിങ്ങൾ തിരിച്ചറിഞ്ഞു എന്ന് ഉറപ്പുവരുത്തുക. രവി മോഹൻ താൻ കംഫർട്ട് ആണ് എന്ന് ഉറപ്പുവരുത്തുന്നതിന് മുൻപേ തനിക്കൊപ്പമുള്ളവരെ കംഫർട്ട് ആക്കുന്ന മനുഷ്യനാണ് എന്നും. ജെനുവിൻ ഹാർട്ടുള്ള നല്ല മനുഷ്യൻ. ഈ അവസ്ഥയും കടന്ന് പോകും. വെറുക്കുന്നവരെ ദൈവം അനുഗ്രഹിക്കട്ടെ' എന്നാണ് കെനിഷാ ഫ്രാൻസിസിന്റെ പ്രതികരണം