ആ തെറ്റ് അംഗീകരിക്കാൻ തയ്യാറാകാതെ രാജസ്ഥാൻ റോയൽസ് കോച്ച്; സർപ്രൈസ് പ്രതികരണം ഇങ്ങനെ, ആരാധകർ പക്ഷേ കലിപ്പിൽ

Curated byഗോകുൽ എസ് | Samayam Malayalam | Updated: 3 May 2025, 12:31 am

2025 സീസൺ ഇന്ത്യൻ പ്രീമിയർ ലീഗിൽ പ്ലേ ഓഫിലെത്താതെ പുറത്തായിരിക്കുകയാണ് രാജസ്ഥാൻ റോയൽസ് ( Rajasthan Royals ). ആദ്യ 11 മത്സരങ്ങളിൽ എട്ടെണ്ണത്തിലും പരാജയപ്പെട്ടതോടെയാണ് ടീമിന് പുറത്തേക്കുള്ള വഴി തുറന്നത്. രാജസ്ഥാൻ റോയൽസ് ഇക്കുറി ഐപിഎല്ലിൽ ദയനീയമാകുമ്പോൾ അതിന്റെ പ്രധാന കാരണങ്ങളിലൊന്ന് ടീമിന്റെ പാളിയ ലേലവും റിട്ടൻഷൻ തീരുമാനങ്ങളുമാണ്. കഴിഞ്ഞ മൂന്ന് സീസണുകളിൽ ഐപിഎല്ലിലെ ഏറ്റവും മികച്ച സ്ക്വാഡുകളിലൊന്ന് ഒപ്പമുണ്ടായിരുന്ന റോയൽസ് ഒരൊറ്റ മെഗാ ലേലം കൊണ്ട് ടൂർണമെന്റിലെ ഏറ്റവും മോശം സ്ക്വാഡുകളിലൊന്നായി മാറി. മെഗാ ലേലത്തിന് മു‌ൻപ് സൂപ്പർ താരങ്ങളായ ജോസ് ബട്ലർ, ട്രെന്റ് ബോൾട്ട്, യുസ്വേന്ദ്ര ചഹൽ എന്നിവരെ റിലീസ് ചെയ്യാനുള്ള റോയൽസിന്റെ തീരുമാനം അവരെ ദുർബലമാക്കി. അന്താരാഷ്ട്ര ക്രിക്കറ്റിലും ഐപിഎല്ലിലും പയറ്റി തെളിഞ്ഞ ഈ സൂപ്പർ താരങ്ങളെ ഒഴിവാക്കിയ രാജസ്ഥാന്റെ തീരുമാനത്തെ മണ്ടത്തരമെന്ന് തന്നെയാണ് ആരാധകരും ചൂണ്ടിക്കാട്ടുന്നത്. എന്നാൽ മെഗാ ലേലവുമായി ബന്ധപ്പെട്ട് ടീമിന് തെറ്റുപറ്റിയെന്ന് സമ്മതിക്കാൻ തയ്യാറല്ല രാജസ്ഥാൻ റോയൽസിന്റെ ഫീൽഡിങ് പരിശീലകനായ ദിഷാന്ത് യാഗ്നിക്.‌


ടീമിന്റെ ഇപ്പോളത്തെ സ്ക്വാഡിൽ സന്തുഷ്ടനാണെന്ന് ചൂണ്ടിക്കാട്ടുന്ന അദ്ദേഹം, സൂപ്പർ താരങ്ങളെ വാങ്ങുന്ന ടീമല്ല, സൂപ്പർ താരങ്ങളെ സൃഷ്ടിക്കുന്ന ടീമാണ് രാജസ്ഥാൻ റോയൽസെന്നും പറയുന്നു. ടീമിന്റെ മികച്ച താരങ്ങളെ ഒഴിവാക്കി പുതിയ താരങ്ങളെയെത്തിച്ച രാജസ്ഥാൻ റോയൽസിന്റെ ഓക്ഷൻ നീക്കം വൻ അബദ്ധമായി മാറിയെങ്കിലും ഇതിൽ തെല്ലും നിരാശ രാജസ്ഥാൻ പരിശീലകനില്ല.

വൈഭവിൻ്റെ പുറത്താകൽ; നിരാശ മറയ്ക്കാനാകാതെ രാഹുൽ ദ്രാവിഡ്; ഹോം വർക്ക് ചെയുന്ന കോച്ചിനെ ഇനി ഡഗ്‌ ഔട്ടിൽ കാണാനാകില്ലെന്ന് സോഷ്യൽ മീഡിയ
"അവർ ഞങ്ങളുടെ ഫ്രാഞ്ചൈസിയിലാണ് താരങ്ങളായത്. ഇപ്പോളത്തെ കളിക്കാരും സൂപ്പർ താരങ്ങളാകുമെന്ന് ഞങ്ങൾക്ക് വിശ്വാസമുണ്ട്. ഞങ്ങൾ സൂപ്പർ താരങ്ങളെ വാങ്ങാറില്ല, മറിച്ച് സൂപ്പർ താരങ്ങളെ സൃഷ്ടിക്കുകയാണ് ചെയ്യുന്നത്. അതാണ് ഞങ്ങളുടെ ടാഗ് ലൈൻ." ദിഷാന്ത് യാഗ്നിക് പറഞ്ഞു.

അതേ സമയം ജോസ് ബട്ലർ, ട്രെന്റ് ബോൾട്ട്, യുസ്വേന്ദ്ര ചഹൽ എന്നീ സൂപ്പർ താരങ്ങളെ ഒഴിവാക്കിയ രാജസ്ഥാൻ റോയൽസ് പകരം ഷിംറോൺ ഹെറ്റ്മെയർ, ധ്രുവ് ജൂറൽ, സന്ദീപ് ശർമ എന്നിവരെയാണ് വൻ തുകക്ക് നിലനിർത്തിയത്. റോയൽസ് റിലീസ് ചെയ്ത താരങ്ങളെല്ലാം പുതിയ ടീമിൽ മികച്ച ഫോമിലേക്ക് ഉയർന്നപ്പോൾ, ടീം റിട്ടെയിൻ ചെയ്ത പകുതി താരങ്ങളും വൻ ഫ്ലോപ്പായി.

എന്തൊരു പതനം...! രാജസ്ഥാന്‍ റോയല്‍സ് നാണംകെട്ടു; റെക്കോഡ് തോല്‍വിയുമായി ഐപിഎല്ലില്‍ നിന്ന് പുറത്ത്
ബട്ലർ 9 കളികളിൽ 406 റൺസ് നേടിയപ്പോൾ, ചഹൽ 10 കളികളിൽ 13 വിക്കറ്റുകളും ട്രെന്റ് ബോൾട്ട് 11 കളികളിൽ 16 വിക്കറ്റുകളും നേടി. 14 കോടിക്ക് റിട്ടെയിൻ ചെയ്യപ്പെട്ട ധ്രുവ് ജൂറൽ 11 കളികളിൽ 249 റൺസും, 11 കോടിക്ക് നിലനിർത്തിയ ഹെറ്റ്മെയർ 11 കളികളിൽ 187 റൺസുമാണ് ഇക്കുറി നേടിയത്. വൻ തുകക്ക് നിലനിർത്തിയ റിയാൻ പരാഗും ഇത്തവണ വൻ പരാജയമാണ്‌. 11 കളികളിൽ 282 റൺസ് മാത്രമാണ് താരത്തിന് നേടാനായത്.