ആ പ്രവൃത്തി വരുൺ ചക്രവർത്തിക്ക് തിരിച്ചടി നൽകി; ശിക്ഷ വിധിച്ച് ബിസിസിഐ, കാരണം ഇങ്ങനെ...

Curated byഗോകുൽ എസ് | Samayam Malayalam | Updated: 8 May 2025, 3:02 pm

ഐപിഎല്ലിൽ ഇന്നലെ നടന്ന ത്രില്ലർ പോരാട്ടത്തിൽ കൊൽക്കത്ത നൈറ്റ് റൈഡേഴ്സ്, ചെന്നൈ സൂപ്പർ കിങ്സിനോട് തോൽവി ഏറ്റുവാങ്ങിയിരുന്നു‌‌. ആവേശം അവസാന ഓവറിലേക്ക് നീണ്ട കളിയിലായിരുന്നു കെകെആർ വീണത്. ടീമിന്റെ പ്ലേ ഓഫ് പ്രതീക്ഷകൾക്ക് കനത്ത തിരിച്ചടി നൽകുന്ന മത്സരഫലമായിരുന്നു ഇത്‌.അതേ സമയം ചെന്നൈ സൂപ്പർ കിങ്സിന് എതിരായ കളിയിലെ പരാജയത്തിന് ശേഷം കൊൽക്കത്ത നൈറ്റ് റൈഡേഴ്സ് താരം വരുൺ ചക്രവർത്തിക്ക് മറ്റൊരു കനത്ത തിരിച്ചടി കൂടി നേരിടേണ്ടി വന്നു. കളിക്കിടെ ഐപിഎൽ പെരുമാറ്റ ചട്ടം ലംഘിച്ച താരത്തിന് മാച്ച് ഫീയുടെ 25 ശതമാനം തുക പിഴയും ഒരു ഡീമെറിറ്റ് പോയിന്റുമാണ് ബിസിസിഐ ശിക്ഷ വിധിച്ചത്.


ഈ കളിയിൽ ചെന്നൈ സൂപ്പർ കിങ്സിന്റെ സ്റ്റാർ ബാറ്റർ ഡിവാൾഡ് ബ്രെവിസിനെ പുറത്താക്കിയതിന് ശേഷം അദ്ദേഹത്തോട് മൈതാനം വിട്ടുപോകാൻ വരുൺ ചക്രവർത്തി ആംഗ്യം കാണിച്ചിരുന്നു. ഇതാണ് താരത്തിന് എതിരായ നടപടിക്ക് കാരണമെന്നാണ് കരുതപ്പെടുന്നത്‌. 25 പന്തിൽ 52 റൺസ് നേടിയ ബ്രെവിസിന്റെ വിക്കറ്റ് കെകെആറിന് ഈ കളിയിൽ വളരെ പ്രധാനമായിരുന്നു. എന്നാൽ താരത്തെ പുറത്താക്കിയെങ്കിലും വിജയത്തിലേക്ക് എത്താൻ കെകെആറിന് കഴിഞ്ഞില്ല.

സ്റ്റമ്പുകള്‍ക്ക് പിന്നില്‍ ധോണിക്ക് ചരിത്രനേട്ടം; ആശ്വാസ ജയവുമായി സിഎസ്‌കെ, കെകെആറിന് വന്‍ പ്രഹരം
അതേ സമയം ഈ കളിയിൽ കിടിലൻ പ്രകടനമായിരുന്നു വരുൺ ചക്രവർത്തി കാഴ്ച വെച്ചത്‌. നാല് ഓവറുകളിൽ 18 റൺസ് മാത്രം വിട്ടുകൊടുത്ത് രണ്ട് വിക്കറ്റുകളായിരുന്നു താരം നേടിയത്‌. ഈ സീസണിൽ കെകെആറിന്റെ ഉയർന്ന വിക്കറ്റ് വേട്ടക്കാരനും വരുൺ ചക്രവർത്തി തന്നെ. 12 കളികളിൽ 17 വിക്കറ്റുകളാണ് താരം നേടിയത്.

'രോഹിത് ശർമയുടെ വിരമിക്കലിന് പ്രധാനകാരണം അത്'; പെട്ടന്നുള്ള വിരമിക്കൽ തീരുമാനത്തിന്റെ കാരണം വെളിപ്പെടുത്തി രോഹിതിന്റെ പരിശീലകൻ
നിലവിൽ ഐപിഎൽ പോയിന്റ് പട്ടികയിൽ ആറാം സ്ഥാനത്താണ് അജിങ്ക്യ രഹാനെ നയിക്കുന്ന കൊൽക്കത്ത നൈറ്റ് റൈഡേഴ്സ്. 12 കളികളിൽ 11 പോയിന്റാണ് അവരുടെ സമ്പാദ്യം. അഞ്ച് കളികളിൽ ജയിച്ച അവർ ആറ് കളികളിൽ പരാജയപ്പെട്ടു. ഒരു മത്സരം മഴകൊണ്ടുപോയി‌. ശേഷിക്കുന്ന രണ്ട് മത്സരങ്ങളിലും ജയം നേടുകയും കുറച്ച് മത്സരഫലങ്ങൾ അനുകൂലമാവുകയും ചെയ്താലാണ് കെകെആറിന് ഇനി പ്ലേ ഓഫിലേക്ക് സാധ്യതകളുള്ളത്. ഈ മാസം 10 ന് സൺ റൈസേഴ്സ് ഹൈദരാബാദിന് എതിരെയും, 17 ന് ആർസിബിക്ക് എതിരെയുമാണ് ടീമിന്റെ ഇനിയുള്ള കളികൾ.