ആദ്യ കളിക്ക് മുൻപ് രാജസ്ഥാൻ റോയൽസിന് ഹാപ്പി ന്യൂസ്, ക്യാപ്റ്റൻ സഞ്ജു സാംസൺ അവസാനം ടീമിനൊപ്പം ചേർന്നു

2025 സീസൺ ഐപിഎൽ ആരംഭിക്കാൻ ഏതാനും ദിവസങ്ങൾ മാത്രം ബാക്കി നിൽക്കെ രാജസ്ഥാൻ റോയൽസിന് ആവേശം സമ്മാനിച്ചുകൊണ്ട് ക്യാപ്റ്റൻ സഞ്ജു സാംസണിന്റെ വരവ്.‌ വിരലിൽ നടത്തിയ ശസ്ത്രക്രിയക്ക് ശേഷം വിശ്രമത്തിലായിരുന്ന സഞ്ജു, തിങ്കളാഴ്ചയാ‌ണ് രാജസ്ഥാൻ റോയൽസ് ക്യാമ്പിൽ എത്തിയത്. റീഹാബിലിറ്റേഷന് ശേഷം ബിസിസിഐയുടെ സെന്റർ ഓഫ് എക്സലൻസിൽ നിന്നാണ് ഐപിഎൽ ക്യാമ്പിലേക്കുള്ള സഞ്ജുവിന്റെ വരവ്. ടീം ക്യാമ്പിനെ ആവേശം കൊള്ളിക്കുന്നതാണ് ഇത്.ഈ മാസം 22 ന് ആരംഭിക്കാനിരിക്കുന്ന 2025 സീസൺ ഐപിഎല്ലിൽ രാജസ്ഥാൻ റോയൽസിന്റെ ആദ്യ മത്സരം 23 ന് സൺ റൈസേഴ്സ് ഹൈദരാബാദിന് എതിരെയാണ്. ഈ മത്സരത്തിൽ സഞ്ജു കളിക്കുന്ന കാര്യം ഉറപ്പായിട്ടുണ്ട്. എന്നാൽ വിക്കറ്റ് കീപ്പറാകുന്ന കാര്യം സംശയമാണ്. സഞ്ജുവിന് കീപ്പറാകാൻ സാധിച്ചില്ലെങ്കിൽ ധ്രുവ് ജൂറലാകും കീപ്പിങ് ഗ്ലൗ അണിയുക. ഇത്തവണത്തെ മെഗാ ലേലത്തിന് മുൻപ് രാജസ്ഥാൻ റോയൽസ് 14 കോടി രൂപക്ക് നിലനിർത്തിയ താരമാണ് ധ്രുവ് ജൂറൽ.


2024 സീസൺ ഐപിഎല്ലിൽ ഉജ്ജ്വല പ്രകടനമായിരുന്നു സഞ്ജു സാംസണിന്റേത്. 15 ഇന്നിങ്സുകളിൽ നിന്ന് 48.27 ബാറ്റിങ് ശരാശരിയിൽ 531 റ‌ൺസാണ് ടീം പ്ലേ ഓഫിലെത്തിയ സീസണിൽ സഞ്ജു നേടിയത്. അഞ്ച് അർധസെഞ്ചുറികളും താരത്തിന്റെ ബാറ്റിൽ നിന്ന് പിറന്നു. ഇതിനെ മറികടക്കുന്ന പ്രകടനം ഇത്തവണ സഞ്ജുവിൽ നിന്ന് ആരാധകർ പ്രതീക്ഷിക്കുന്നുണ്ട്. മുൻ സീസണുകളിൽ മൂന്നാം നമ്പരിൽ കളിച്ച സഞ്ജു ഇക്കുറി ടീമിന്റെ ഓപ്പണറാകുമെന്നാണ് സൂചനകൾ. ഇന്ത്യൻ ടി20 ടീമിന്റെ ഓപ്പണിങ് സ്ഥാനത്ത് മികച്ച റെക്കോഡ് സഞ്ജുവിനുണ്ട് എന്നതും ശ്രദ്ധേയം.

Also Read: രാജസ്ഥാൻ റോയൽസിൽ സഞ്ജുവിന്റെ സർപ്രൈസ് ട്രമ്പ് കാർഡാകാൻ ഈ മൂന്ന് താരങ്ങൾ; ഇവർ മിന്നിയാൽ ടീം ഇത്തവണ വേറെലെവലാകും

നേരത്തെ ഇംഗ്ലണ്ടിന് എതിരായ ടി20 പരമ്പരയിലെ അവസാന കളിക്കിടെയാണ് സഞ്ജുവിന് പരിക്കേറ്റത്.‌ ശസ്ത്രക്രിയ വേണ്ടി വന്ന മലയാളി താരത്തിന് ഇത് മൂലം കേരളത്തിന്റെ രഞ്ജി ട്രോഫി സെമിഫൈനൽ, ഫൈനൽ മത്സരങ്ങളും നഷ്ടമായിരുന്നു

Also Read: ഈ സീസണിൽ രാജസ്ഥാൻ റോയൽസിന്റെ ഇമ്പാക്ട് താരം ഈ മൂന്ന് പേരിൽ ഒരാൾ? സഞ്ജുവും ടീമും രണ്ടും കൽപ്പിച്ച്

2025 സീസൺ ഐപിഎല്ലിൽ രാജസ്ഥാൻ റോയൽസിന്റെ സ്ക്വാഡ് ഇങ്ങനെ: സഞ്ജു സാംസൺ ( ക്യാപ്റ്റൻ / വിക്കറ്റ് കീപ്പർ ), ശുഭം ദുബെ, വൈഭവ് സൂര്യവംശി, കുനാൽ റാത്തോർ, ഷിംറോൺ ഹെറ്റ്മെയർ, യശസ്വി ജയ്സ്വാൾ, ധ്രുവ് ജൂറൽ, റിയാൻ പരാഗ്, നിതീഷ് റാണ, യുധ്വിർ സിങ്, മഹീഷ് തീക്ഷണ, വനിന്ദു ഹസരംഗ, ആകാശ് മധ്വാൽ, കുമാർ കാർത്തികേയ, തുഷാർ ദേഷ്പാണ്ടെ, ഫസൽഹഖ് ഫാറൂഖി, ക്വെന മഫാക്ക, അശോക് ശർമ, സന്ദീപ് ശർമ.