ആരാണ് ഓസി ഓസ്ബോൺ: പ്രശസ്തിയ്ക്കൊപ്പം വിവാദങ്ങളും വാരിക്കൂട്ടിയ ​ഗായകൻ, ഭാര്യയെ കൊല്ലാൻ ശ്രമിച്ചതിന് കേസ്, പിന്നെ എന്തൊക്കെ?

Authored by: അശ്വിനി പി|Samayam Malayalam•23 Jul 2025, 5:52 pm

ഇരുട്ടിൻ്റെ രാജകുമാരൻ എന്നറിയപ്പെട്ടിരുന്ന ജോൺ മൈക്കൽ ഓസി ഓസ്ബോൺ എന്ന അമേരിക്കൻ ഗായകന്റെ മരണത്തിന് ശേഷം അദ്ദേഹത്തെ കുറിച്ചുള്ള വാർത്തകളാണ് എങ്ങും. 76 കാരനായ ഓസിയുടെ മരണ കാരണം പുറത്തുവിട്ടിട്ടില്ല. ഏറെക്കാലമായി ആരോഗ്യ പ്രശ്നങ്ങൾ നേരിട്ടുവരികയായിരുന്നു. പാർക്കിൻസൺസ്, നട്ടെല്ലിനേറ്റ പരിക്കുകൾ തുടങ്ങിയവയ്ക്കൊക്കെയും ചികിത്സകൾ നടന്നുകൊണ്ടിരിക്കവെയാണ് മരണം സംഭവിച്ചത്

ഔദ്യോഗിക പത്രക്കുറിപ്പിലൂടെയാണ് കുടുംബം മരണ വാർത്ത അറിയിച്ചത്. പ്രിയപ്പെട്ട ഓസി ഞങ്ങളെ വിട്ടുപോയി, കുടുംബം അദ്ദേഹത്തിനൊപ്പമുണ്ട്. ദയവ് ചെയ്ത് ഈ സമയത്ത് ഞങ്ങളുടെ കുടുംബത്തിന്റെ സ്വകാര്യതയെ മാനിക്കണം- എന്നായിരുന്നു പത്രക്കുറിപ്പിലൂടെ അറിയിച്ചത്.

1948 ൽ ആയിരുന്നു ജോൺ മൈക്കൽ ഓസി ഓസ്ബോണിന്റെ ജനനം. ബാല്യത്തിൽ ദാരിദ്രവും ജയിൽവാസവുമടക്കം പലതും നേരിടേണ്ടി വന്നു. കള്ളനെന്ന പേരും ഉണ്ടായിരുന്നു. ഒന്നിനും കൊള്ളാത്തവനായിരുന്നു ഞാൻ എന്നാണ് ഓസി ഒരിക്കൽ തന്നെ കുറിച്ച് പറഞ്ഞത്.

Also Read: ജിന്നിന് മാത്രം എന്താണ് പ്രത്യേക പരിഗണന; ബിടിഎസ്സിലെ മറ്റുള്ളവരെക്കാൾ തനിക്ക് കിട്ടുന്ന പരസ്യങ്ങളെ കുറിച്ച് താരം പറയുന്നു

ടോണി ഐയോമി, ഗീസർ ബട്ട്‌ലർ, ബിൽ വാർഡ് എന്നിവരുമായി ചേർന്ന് ബ്ലാക്ക് സബ്ബത്ത് രൂപീകരിച്ചതോടെയാണ് ഓസിയുടെ കരിയർ ആരംഭിച്ചത്. 1970-ൽ പുറത്തിറങ്ങിയ അവരുടെ ആദ്യ ആൽബമായ 'ബ്ലാക്ക് സാബത്ത്', 'പാരാനോയിഡ്', 'മാസ്റ്റർ ഓഫ് റിയാലിറ്റി' തുടങ്ങിയ ക്ലാസിക്കുകൾ ഹെവി മെറ്റലിന് ഒരു മാതൃകയായി മാറി

1979 ൽ മയക്ക് മരുന്ന് ഉപയോഗത്തിന്റെ പേരിൽ ബ്ലാക്ക് സബ്ബത്തിൽ നിന്ന് ഓസി പുറത്താക്കപ്പെടുകയും സോളോ കരിയർ ആരംഭിക്കുകയും ചെയ്തു. 1980-ൽ 'ബ്ലിസാർഡ് ഓഫ് ഓസ്' എന്ന ആൽബത്തിലൂടെ ആരംഭിച്ച സോളോ കരിയർ മികച്ച വിജയം നേടി. 2022-ൽ പുറത്തിറങ്ങിയ 'പേഷ്യന്റ് നമ്പർ 9' ആണ് ഏറ്റവും ഒടുവിൽ പുറത്തിറങ്ങിയ ആൽബം.

1982-ൽ ഒരു കച്ചേരിയിൽ വെച്ച് ഒരു വവ്വാലിന്റെ തല കടിച്ചു, റെക്കോർഡ് ലേബൽ മീറ്റിംഗിൽ വെച്ച് രണ്ട് പ്രാവുകളുടെ തല കടിച്ചു എന്നൊക്കെയുള്ള വാർത്തകൾ ഓസി എന്ന ഗായകന്റെ വിചിത്രമായ സ്വഭാവത്തെയാണ് കാണിച്ചു തന്നത്. മയക്ക് മരുന്നിന്റെ സ്വാധീനത്തിൽ ഭാര്യയെ ശ്വാസം മുട്ടിച്ച് കൊല്ലാൻ ശ്രമിച്ചതിന് ഓസി അറസ്റ്റ് ചെയ്യപ്പെട്ടിരുന്നു. എന്നാൽ ഓസിയെ മനസ്സിലാക്കിയ ഷാരോൺ പ്രശ്നങ്ങൾ അവസാനിപ്പിച്ച് ഒന്നിച്ച് ജീവിക്കാൻ തയ്യാറായി.

1982 ൽ ആണ് ഓസി ഷാരോണിനെ വിവാഹം ചെയ്തത്. കെല്ലി, ജാക്ക്, എയ്‌മി എന്നിങ്ങനെ മൂന്ന് മക്കളാണ് ദമ്പതികൾക്ക്. ആദ്യ ഭാര്യ തെൽമയിൽ ജെസീക്ക, ലൂയിസ് എന്നിങ്ങനെ രണ്ട് മക്കൾ കൂടിയുണ്ട്. ഓസിയുടെ കരിയറിൽ ഏറ്റവും അധികം പിന്തുണ നൽകിയ ആളാണ് ഭാര്യ ഷാരോൺ. ഇരുവരും ചേർന്ന് ഓസ്ഫെസ്റ്റ് എന്ന പ്രമുഖ മെറ്റൽ ഫെസ്റ്റിവലിന് 1996-ൽ തുടക്കമിടുകയും വർഷങ്ങളോളം ഈ ഫെസ്റ്റിവൽ വിജയകരമായി നടക്കുകയും ചെയ്തിരുന്നു.