ആരാധകരേ മാപ്പ് ! നിങ്ങൾക്കിതല്ലാതെ മറ്റൊരു വഴിയുമില്ല; ആരാധകരോട് മാപ്പപേക്ഷിച്ച് ധർമ പ്രൊഡക്ഷൻസ്

Authored by: ഋതു നായർ|Samayam Malayalam•11 Nov 2025, 2:51 pm

കഴിഞ്ഞ നാൽപ്പത്തിയഞ്ച് വർഷങ്ങളായി ബോളിവുഡ് ഇൻഡസ്ട്രിയുടെ നെടുംതൂണുകളിലൊന്നാണ് ധർമ പ്രൊഡക്ഷൻസ്. യാഷ് ജോഹർ തുടങ്ങി വെച്ച സംരംഭം മകൻ കരൺ ജോഹറിലൂടെ വളർന്ന് ഇന്ത്യൻ സിനിമയിലെ തന്നെ പ്രധാന നിർമാണക്കമ്പനികളിൽ ഒന്നായി മാറി. 1980 ൽ ദോസ്താന എന്ന ചിത്രത്തിലൂടെ വെള്ളിത്തിരയിൽ തേരോട്ടം കുറിച്ച ധർമ പ്രൊഡക്ഷൻസ്, കുച്ച് കുച്ച് ഹോതാ ഹേ, കഭി ഖുശി കഭി ഘം തുടങ്ങിയ എവർഗ്രീൻ ഹിറ്റുകളിലൂടെ ബോളിവുഡിൽ സ്വന്തം സാന്നിധ്യം കുറിച്ചിട്ടു.

മൂന്നു ദിവസങ്ങൾക്ക് മുൻപാണ് ഒരു തമാശ പോസ്റ്റിലൂടെ ധർമ പ്രൊഡക്ഷൻസ് ആരാധകരോട് മാപ്പപേക്ഷിച്ചത്. "ഞങ്ങൾ ധർമ പ്രൊഡക്ഷൻസ് നിങ്ങളോടെല്ലാം ഒരു മാപ്പപേക്ഷ നടത്തുന്നു. ഞങ്ങൾ നിങ്ങളെ കരയിച്ചു, മയക്കി, സ്വന്തം എക്സ് കാമുകന് അല്ലെങ്കിൽ കാമുകിക്ക് ഒന്നോ രണ്ടോ ചിലപ്പോൾ അതിലധികമോ തവണ ടെക്സ്റ്റ് ചെയ്യാൻ പ്രേരിപ്പിച്ചു. അതിനാൽ തന്നെ ഞങ്ങൾ ഹൃദയത്തിന്റെ അടിത്തട്ടിൽ നിന്നും സത്യസന്ധമായും, പൂര്ണഹൃദയത്തോടെയും മാപ്പപേക്ഷിക്കുന്നു."

ALSO READ: അച്ഛന്റെ പിറന്നാൾ ഞാൻ ആഘോഷിക്കാൻ പ്ലാൻ ഇട്ടു! പക്ഷെ അച്ഛന് തിരക്കായി; ഹൃദയം തൊടുന്ന കുറിപ്പുമായി കാവ്യ

"നിങ്ങളുടെ പ്രണയത്തിന്റെ നിലവാരം ഉയർത്തിയതിന്റെ. കീ ഇല്ലാതെ പിയാനോ വായുവിൽ വായിക്കാം എന്ന് പഠിപ്പിച്ചതിന്റെ, യഥാർത്ഥ പ്രണയമെന്നാൽ മികച്ച സൗഹൃദമാണ് എന്ന ചോദ്യം ഉയർന്നു വരാൻ കാരണമായതിന്റെ, പുരുഷന്മാരെ ഷെർവാണി ധരിച്ചു കൊണ്ട് മനോഹരമായി കരയാൻ പഠിപ്പിച്ചതിന്റെ, ഒരു മികച്ച വസ്ത്രധാരണത്തിന് എല്ലാ വേദനകളിൽ നിന്നും മുക്തി നൽകാൻ സാധിക്കുമെന്ന് വിശ്വസിപ്പിച്ചതിന്റെ; ഇവയുടെയെല്ലാം ഉത്തരവാദിത്തം ഞങ്ങൾ ഒറ്റയ്ക്ക് ഏറ്റെടുക്കുന്നു" ധർമ പ്രൊഡക്ഷൻസ് ഇൻസ്റ്റായിൽ കുറിച്ചു.

തങ്ങൾക്ക് പ്രണയത്തെ കുറിച്ചുള്ള വലിയ സങ്കൽപ്പങ്ങൾ പകർന്നത് ധർമ പ്രൊഡക്ഷൻസ് ആണെന്നും ഒരു ആരാധകൻ കുറിച്ചു.