ആശയക്കുഴപ്പം പരിഹരിച്ച് ഐസിസി; ട്വന്റി20 മത്സരം 5 ഓവറായി വെട്ടിച്ചുരുക്കിയാൽ പവർപ്ലേ വെറും 9 പന്തു മാത്രം, 6 ഓവറെങ്കിൽ 11 പന്ത്!

ദുബായ് ∙ 5 ഓവറായി വെട്ടിച്ചുരുക്കേണ്ടി വരുന്ന ട്വന്റി20 മത്സരത്തിൽ പവർപ്ലേയുടെ ദൈർഘ്യം ഇനി 9 പന്തുകൾ മാത്രം. 6 ഓവർ മാത്രമാണ് മത്സരമെങ്കിൽ പവർപ്ലേ 11 പന്തുകൾ മാത്രം. മഴ ഉൾപ്പെടെയുള്ള കാരണങ്ങളാൽ ട്വന്റി20 മത്സരങ്ങളിൽ ഓവർ വെട്ടിക്കുറയ്ക്കുമ്പോൾ പവർപ്ലേ ഓവറുകൾ നിർണയിക്കുന്നതിലെ ആശയക്കുഴപ്പം പരിഹരിക്കുന്നതിനാണ് ഐസിസി ഈന നിയമഭേദഗതി നടപ്പാക്കുന്നത്.

ഫീൽഡിങ് നിയന്ത്രണമുള്ള പവർപ്ലേയുടെ ദൈർഘ്യം സംബന്ധിച്ച ഭേദഗതി അടുത്തമാസം പ്രാബല്യത്തിലാകും. ഓവറുകൾ ചുരുക്കുന്നതിന് ആനുപാതികമായി നിലവിൽ പവർപ്ലേ ഓവറുകളും കുറയ്ക്കാറുണ്ട്. എന്നാൽ പന്തുകളുടെ അടിസ്ഥാനത്തിൽ പവർപ്ലേയുടെ ദൈർഘ്യം കുറയുന്നത് ഇതാദ്യമാണ്.

10 ഓവർ മത്സരം നടന്നാൽ 3 ഓവർ, 12 ഓവറിൽ 3.4 ഓവർ, 15 ഓവറിൽ 4.3 ഓവർ, 19 ഓവറായി മത്സരം ചുരുങ്ങിയാൽ 5.4 ഓവർ എന്നിങ്ങനെയാണ് ഇനി പവർപ്ലേയുടെ ദൈർഘ്യം. ഈ സമയത്തു 2 ഫീൽഡർമാരെ മാത്രമേ സർക്കിളിനു പുറത്ത് അനുവദിക്കൂ.