ആർസിബി ഇനി ഡബിൾ സ്ട്രോങ്; സൂപ്പർതാരം തിരിച്ചെത്തുന്നു, നിർണായക അപ്ഡേറ്റ് നൽകി ബെംഗളൂരു

Authored by: അനുഷ ഗംഗാധരൻ|Samayam Malayalam•23 May 2025, 5:37 pm

ഐപിഎൽ 2025 സീസണിൽ ഏവരെയും ഞെട്ടിച്ച ടീമുകളിൽ മുൻപന്തിയിലാണ് റോയൽ ചലഞ്ചേഴ്‌സ് ബെംഗളൂരു ( ആർസിബി ). ബെഞ്ചിൽ ഇരിക്കുന്നവർ പോലും കിടിലൻ പ്രകടനം കാഴ്ചവെക്കുന്ന താരങ്ങൾ ആണ്. എന്നാൽ അതേസമയം പരിക്കിനെ തുടർന്നും ഐപിഎൽ താത്കാലികമായി നിർത്തിവെച്ചതിനെ തുടർന്നും ആർസിബിയ്ക്ക് ചില താരങ്ങളെ നഷ്ടമായിട്ടുണ്ട്. എന്നാൽ ഇപ്പോഴിതാ പരിക്കിൽ നിന്ന് മുക്തനായ ആർസിബിയുടെ സ്റ്റാർ പ്ലേയർ തിരിച്ചെത്തുകയാണ് എന്ന റിപ്പോർട്ട് എത്തിയിരിക്കുകയാണ്.
വൈഭവ് സൂര്യവംശിക്ക് രാജകീയ വരവേല്‍പ്, ഇനി താരത്തിന്റെ കളി ഇന്ത്യന്‍ ജേഴ്‌സിയില്‍
ഓസ്‌ട്രേലിയൻ ഫാസ്റ്റ് ബൗളർ ജോഷ് ഹേസൽവുഡ് ആണ് ആർസിബി ക്യാമ്പിലേക്ക് തിരിച്ചെത്തുന്ന താരം. ഷോൾഡർ ഇഞ്ചുറി മാറിയതോടെയാണ് താരം ടീമിൽ തിരിച്ചെത്തുന്നത്. ഇതോടെ ആർസിബിയുടെ നിർണായക പ്ലേ ഓഫ് മത്സരങ്ങൾ കളിയ്ക്കാൻ ഹേസൽവുഡും ഉണ്ടാകുമെന്നാണ് ലഭിക്കുന്ന വിവരം. ഏപ്രിൽ 27ന് ഡൽഹി ക്യാപിറ്റേഴ്‌സുമായി നടന്ന മത്സരത്തിലാണ് ആർസിബിയ്ക്കായി താരം അവസാനമായി കളിക്കുന്നത്.

ക്രിക്കറ്റ് ഓസ്ട്രേലിയ താരത്തിന്റെ ആരോഗ്യ നില നിരീക്ഷിക്കുകയാണ് എന്നും ആർസിബി മാനേജ്‌മെന്റുമായി അക്കാര്യങ്ങൾ സംസാരിക്കുന്നുണ്ട് എന്നുമാണ് റിപ്പോർട്ടിൽ പറയുന്നത്. ' ഞങ്ങളുടെ മെഡിക്കൽ ടീമും ക്രിക്കറ്റ് ഓസ്‌ട്രേലിയയുടെ മെഡിക്കൽ ടീമും അദ്ദേഹത്തിന്റെ ആരോഗ്യ നില പരിശോധിക്കുന്നുണ്ട്. ഓരോ ദിവസം കഴിയുതോറും അദ്ദേഹം കൂടുതൽ മെച്ചപ്പെട്ടുവരുകയാണ്' എന്ന് ആർ‌സി‌ബി ക്രിക്കറ്റ് ഡയറക്ടർ മോ ബോബട്ട് പറഞ്ഞു. ആർസിബിയുടെ നോക്ക് ഔട്ട് മത്സരത്തിന് മുൻപ് ഹസൽവുഡ് ടീമിലെത്തുമെന്ന് തന്നെ പ്രതീക്ഷിക്കാമെന്നും അദ്ദേഹം പറഞ്ഞു. നിലവിൽ ഐപിഎൽ 2025 പോയിന്റ് ടേബിളിൽ രണ്ടാം സ്ഥാനത്താണ് ആർസിബിയുടെ സ്ഥാനം. ഇനി ബാക്കിയുള്ള ഗ്രൂപ്പ് മത്സരങ്ങൾ കഴിയുന്നതോടെ ടേബിളിലെ ആദ്യ രണ്ട് സ്ഥാനങ്ങയിൽ ഒന്ന് ഉറപ്പിക്കുക എന്നതാണ് ആർസിബിയുടെ ലക്ഷ്യം. അതേസമയം 2016 ന് ശേഷമാണ് ആർസിബി രണ്ടാം സ്ഥാനത്തെത്തി പ്ലേ ഓഫിലേക്ക് കടക്കുന്നത്.

ഗ്രൂപ്പ് ഘട്ടത്തിൽ ഇനി രണ്ട് മത്സരങ്ങളാണ് ആർസിബിയ്ക്ക് ബാക്കിയുള്ളത്. അതിൽ ഒന്ന് ഇന്ന് സൺറൈസേഴ്‌സ് ഹൈദരാബാദുമായി നടക്കും. ആർസിബിയുടെ അവസാന ഗ്രൂപ്പ് മത്സരം മെയ് 27ന് ലക്‌നൗ സൂപ്പർ ജെയ്ന്റ്‌സിനെതിരെ നടക്കും. ഈ രണ്ട് മത്സരങ്ങളിലും ജയിച്ചാൽ പോയിന്റ് പട്ടികയിൽ ഒന്നാമതെത്താൻ കോഹ്‌ലിയുടെ ആർസിബിയ്ക്ക് സാധിക്കും.

ഗ്രൂപ്പ് ഘട്ടങ്ങളിലെ ഈ മത്സരങ്ങൾക്ക് ശേഷം ഹേസൽവുഡ് ടീമിലെത്തുകയും കൂടി ചെയ്താൽ പിന്നെ ആരാലും തകർക്കാൻ കഴിയാത്ത ശക്തിയായി ആർസിബി മാറും.