ആർസിബിയ്ക്ക് 'വിസിൽപോട്ട്' ധോണിയുടെ മഞ്ഞപ്പട; ഫാൻ ഫൈറ്റുകൾ മാറ്റിനിർത്തി ആഘോഷം; വൈറലായി സിഎസ്കെ പോസ്റ്റ്

Authored by: അനുഷ ഗംഗാധരൻ|Samayam Malayalam•4 Jun 2025, 11:47 am

ഇന്ത്യൻ പ്രീമിയർ ലീഗ് ആരംഭിച്ചത് മുതൽ ചിരവൈരികളായ ടീമുകളാണ് ചെന്നൈ സൂപ്പർ കിങ്‌സും (സിഎസ്കെ) റോയൽ ചലഞ്ചേഴ്‌സ് ബെംഗളൂരുവും(ആർസിബി). ഓരോ സീസണുകളിൽ ആരാധകർ തമ്മിൽ ഫാൻ ഫൈറ്റുകളും സ്ഥിരം കാഴ്ചയാണ്. സിഎസ്കെയും ആർസിബിയും ഏറ്റുമുട്ടുന്ന ഗ്ലാമർ മത്സരം കാണാൻ കോടിക്കണക്കിന് ആരാധകർ കാത്തിരിക്കുന്ന കാഴ്ചയും പതിവാണ്. ട്രോളന്മാർക്കും ആർസിബിയുടെ മറുപടി; ഇത് പൊളിച്ചു എന്ന് ആരാധകർ; സോഷ്യൽ മീഡിയ തൂക്കി കോഹ്‌ലിയുടെ ചുവന്ന പട
ചെന്നൈയുടെ ഹോം ഗ്രൗണ്ടായ ചെപ്പോക്കിൽ ആർസിബി ജയിക്കുന്നതും ബെംഗളുരുവിന്റെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തിൽ സിഎസ്കെ ജയിക്കുന്നതും രാജകീയ അനുഭവമാണ് ആരാധകർക്ക് നൽകുന്നത്. ഐപിഎല്ലിൽ ഇതുവരെ അഞ്ച് കിരീടങ്ങൾ സ്വന്തമാക്കിയ ടീം ആണ് ചെന്നൈ. എന്നാൽ ഈ സീസണിൽ പത്താം സ്ഥാനത്ത് ഫിനിഷ് ചെയ്യാനാണ് ചെന്നൈയ്ക്ക് സാധിച്ചത്.

ഇപ്പോഴിതാ ആർസിബിയുടെ സന്തോഷത്തിൽ പങ്കുചേരുകയാണ് ചെന്നൈ സൂപ്പർ കിങ്‌സ്. ഐപിഎൽ 2025 ൽ തങ്ങളുടെ കന്നി കിരീടം സ്വന്തമാക്കിയ ആർസിബിയെ പ്രശംസിക്കുന്ന തിരക്കിലാണ് ഏവരും. പ്രമുഖ സ്പോർട്സ് താരങ്ങളും സിനിമ താരങ്ങളും എല്ലാം ആ കൂട്ടത്തിലുണ്ട്.

നെഞ്ചിടിപ്പ് ഉയർത്തുന്ന മത്സരമായിരുന്നു കഴിഞ്ഞ ദിവസം നരേന്ദ്ര മോദി സ്റ്റേഡിയത്തിൽ നടന്നത്. ടോസ് നേടിയത് മുതൽ കളിയുടെ ഒരു ഘട്ടത്തിൽ വരെ പഞ്ചാബ് കിങ്സിനായിരുന്നു ആധിപത്യം. എന്നാൽ ആർസിബി ബൗളർ കൃണാൽ പാണ്ഡ്യ കളിയുടെ ഗതി പതിയെ തിരിച്ചുപിടിച്ചു. ഡോട്ട് ബോളുകൾ എറിയാനാണ് കൃണാൽ ശ്രമിച്ചത്. ആ ശ്രമം വിജയിക്കുകയും ചെയ്‌തു. ഒപ്പം 2 വിക്കറ്റുകൾ കൂടി സ്വന്തമാക്കിയതോടെ മത്സരം ആർസിബിയുടെ കൈകളിൽ ഒതുങ്ങി.

ഇന്നിപ്പോൾ ചരിത്രപരമായ വിജയത്തെ പ്രശംസിച്ച് രംഗത്തെത്തിയിരിക്കുകയാണ് എംഎസ് ധോണി നയിക്കുന്ന ചെന്നൈ സൂപ്പർ കിങ്‌സ്. പോഡിയത്തിൽ കപ്പ് ഉയർത്തി നിൽക്കുന്ന ആർസിബി താരങ്ങളുടെ ഫോട്ടോ പങ്കുവെച്ചാണ് ചെന്നൈ ആശംസ അറിയിക്കുന്നത്. 'ആദ്യ കിരീടം നേടുന്ന ആർസിബിയ്ക്ക് അഭിനന്ദനങ്ങൾ #വിസിൽപോഡ്' എന്നായിരുന്നു ചെന്നൈയുടെ പോസ്റ്റ്.

നിമിഷം നേരംകൊണ്ടാണ് പോസ്റ്റ് ആരാധകർ ഏറ്റെടുത്തത്. ഐപിഎൽ ആരംഭിച്ചതിന് ശേഷം ആദ്യമായി ബെംഗളൂരു ചെന്നൈയെ രണ്ട് തവണ പരാജയപ്പെടുത്തിയ സീസൺ ആണ് ഇത് എന്ന പ്രത്യേകതയും ഉണ്ട്. അതിൽ തന്നെ ചെന്നൈയുടെ ഹോം ഗ്രൗണ്ടിൽ ആർസിബി വർഷങ്ങൾക്കു ശേഷം ജയം സ്വന്തമാക്കിയത് ചെന്നൈ ആരാധകരെ നന്നേ ഞെട്ടിച്ചിരുന്നു.

ചെന്നൈയുടെ ഹോം ഗ്രൗണ്ടിൽ മാത്രമല്ല, ഇത്തവണ ഒരു എവേ മത്സരത്തിൽ പോലും പരാജയപെടാതെയാണ് ആർസിബി തങ്ങളുടെ സീസൺ അവസാനിപ്പിച്ചിരിക്കുന്നത് എന്ന പ്രത്യേകതയും ഉണ്ട്. നിലവിൽ കന്നി കിരീടം നേടിയ ആഘോഷത്തിലാണ് ആർസിബിയും ആർസിബിയുടെ ആരാധകരും.