ഇതായിരുന്നില്ല ആദ്യം ഉദ്ദേശിച്ച ക്ലൈമാക്സ്, സ്ക്വിഡ് ​ഗെയിം 3 യുടെ ക്ലൈമാക്സ് ഇത്രയും ക്രൂരമാക്കണമായിരുന്നോ എന്ന ചോദ്യത്തിനുള്ള മറുപടി

Authored by: അശ്വിനി പി|Samayam Malayalam•1 Jul 2025, 5:29 pm

നെറ്റ്ഫ്ളിക്സിലൂടെ പുറത്തിറങ്ങിയ സ്ക്വിഡ് ഗെയിം സീസൺ 3 യുടെ അവസാന ഭാഗവും പുറത്ത് വന്നതിന് ശേഷം, സോഷ്യൽ മീഡിയയിൽ നിറഞ്ഞു നിൽക്കുകയാണ് ഈ സൗത്ത് കൊറിയൻ സർവൈവൽ ത്രില്ലർ ആയ സീരീസ്. ജൂൺ 27 നാണ് ലീ ജങ്ക് ജെ-യെ കേന്ദ്ര കഥാപാത്രമാക്കി ഹ്വാങ് ഡോങ് ഹ്യൂക് തിരക്കഥ എഴുതി സംവിധാനം ചെയ്ത സ്ക്വിഡ് ഗെയിം സീസൺ 3 യുടെ അവസാന ഭാഗം പുറത്തിറങ്ങിയത്. അതോടെ സോഷ്യൽ മീഡിയയിൽ പല തരത്തിലുള്ള ചർച്ചകൾക്കും വഴിയൊരുങ്ങി. ഇങ്ങനെ ഒരു ക്ലൈമാക്സ് വേണമായിരുന്നോ എന്നാണ് പലരുടെയും ചോദ്യം.

ഇതിന് ബദലായി ഒരു ശുഭപര്യവസാനം ആയിരുന്നു താൻ ആദ്യം പ്ലാൻ ചെയ്തിരുന്നത് എന്ന് റിലീസിന് ശേഷം നൽകിയ ഒരു അഭിമുഖത്തിൽ സംസാരിക്കവെ സംവിധായകൻ ഹ്വാങ് ഡോങ് ഹ്യൂക് വെളിപ്പെടുത്തി.

Also Read: ഗർഭിണിയായപ്പോൾ പോലും എന്നെ വെറുതെ വിട്ടില്ല എന്ന് രംഭ, അത് ഞാൻ അവളെ സന്തോഷിപ്പിച്ചതാണ് എന്ന് കല മാസ്റ്റർ; ഇരുവരുടെയും ബന്ധം

അവസാന ഗെയിമിൽ, ലീ ജംഗ് ജേയുടെ കഥാപാത്രമായ സോങ് ഗി ഹുൻ ഒരു ഉയർന്ന പ്ലാറ്റ്‌ഫോമിൽ നിന്ന് ചാടി ആത്മഹത്യ ചെയ്യുന്ന രംഗത്തോടെയാണ് സീരീസ് അവസാനിക്കുന്നത്. സമ്പന്നർക്കും ശക്തർക്കും വിനോദത്തിനായി നടത്തുന്ന കളികളിലെ വെറും കരുക്കൾ മാത്രമല്ല ദരിദ്രരും പാവപ്പെട്ടവരും എന്ന് കാണിക്കാൻ വേണ്ടിയാണ് അയാൾ സ്വയം ബലിയർപ്പിച്ചത്. അതോടെ, കിം ജുൻ ഹിയുടെ (ജോ യൂറി) മൂന്ന് ദിവസം മാത്രം പ്രായമുള്ള മകളും പുതിയ പ്ലെയർ 222-ഉം ഷോയുടെ വിജയിയായി മാറുകയും ചെയ്യുന്നു.


എന്നാൽ ആദ്യ ഘട്ടത്തിൽ ഗി ഹുൻ ഗെയിം ഇല്ലാതാക്കി യുഎസിലുള്ള മകളുമായി വീണ്ടും സോങ് ഗി ഹൂൻ ഒന്നിക്കുന്നതായിട്ടാണ് പ്ലാൻ ചെയ്തിരുന്നത് എന്നാണ് ഇപ്പോൾ സംവിധായകൻ തുറന്ന് പറഞ്ഞിരിയ്ക്കുന്നത്. എന്നാൽ എഴുത്ത് മുന്നോട്ട് പോകുമ്പോൾ ഡ്രാമയിലൂടെ ഞാൻ നൽകാൻ ആഗ്രഹിക്കുന്ന സന്ദേശം അല്ല എന്ന സംശയം വന്നതിലൂടെയാണ് നായകന്റെ ആത്മഹത്യയിലേക്ക് എത്തിയത്. ഞാൻ സീസൺ 1 സംവിധാനം ചെയ്തതിനെക്കാൾ മോശം അവസ്ഥയിലാണ് ഇന്ന് ലോകം എന്നും ഹ്വാങ് ഡോങ് ഹ്യൂക് പറയുന്നു.