ഇത് വമ്പൻ റെക്കോഡ്, ഐപിഎല്ലിൽ ആദ്യം; ആർസിബി സ്വന്തമാക്കിയത് ഒരു ടീമിനുമില്ലാത്ത കിടിലൻ നേട്ടം

Curated by: ഗോകുൽ എസ്|Samayam Malayalam•28 May 2025, 3:05 am

2026 സീസൺ ഇന്ത്യൻ പ്രീമിയർ ലീഗിൽ ഉജ്ജ്വല ഫോമിലുള്ള റോയൽ ചലഞ്ചേഴ്സ് ബംഗളൂരു, അവസാന ലീഗ് മത്സരത്തിൽ ലക്നൗ സൂപ്പർ ജയന്റ്സിനെ ആറ് വിക്കറ്റിന് തകർത്തിരിക്കുകയാണ്. ഈ മത്സരത്തിൽ ജയിച്ചതോടെ ലീഗ് ഘട്ടത്തിൽ രണ്ടാം സ്ഥാനത്ത് ഫിനിഷ് ചെയ്യാൻ അവർക്കായി. ഇതോടെ ക്വാളിഫയർ ഒന്നിലേക്കാണ് ടീം യോഗ്യത നേടിയത്. ഫൈനലിൽ എത്താൻ അവർക്ക് രണ്ട് അവസരങ്ങൾ ഇതോടെ ലഭിക്കും. അതേ സമയം ലക്നൗ സൂപ്പർ ജയന്റ്സി‌ന്റെ ഹോം ഗ്രൗണ്ടായ ഏകാന സ്റ്റേഡിയത്തിലായിരുന്നു അവസാന ലീഗ് മത്സരം ആർസിബി ജയിച്ചത്. ഈ വിജയത്തോടെ ഐപിഎല്ലിലെ ഒരു വമ്പൻ റെക്കോഡും ആർസിബിക്ക് സ്വന്തമാക്കാനായി. 2025 സീസൺ ഐപിഎല്ലിലെ എല്ലാ എവേ മത്സരങ്ങളിലും വിജയമെന്ന അപൂർവ നേട്ടം ആർസിബിക്ക് സ്വന്തമായി. ഒരു‌സീസണിലെ മുഴുവൻ എവേ മത്സരങ്ങളിലും വിജയം നേടുന്ന ആദ്യ ടീമെന്ന റെക്കോഡും ഇതോടെ ആർസിബിയുടെ പേരിലായി.


ഒരു ഐപിഎൽ സീസണിൽ ഏറ്റവും കൂടുതൽ എവേ വിജയങ്ങളെന്ന നേട്ടത്തിൽ ആർസിബിക്ക് ഒപ്പം മറ്റ് രണ്ട് ടീമുകൾ കൂടിയുണ്ട്. കൊൽക്കത്ത നൈറ്റ് റൈഡേഴ്സും, മുംബൈ ഇന്ത്യൻസുമാണ് ഇത്. 2012 ൽ ഇരു ടീമുകളും ഏഴ് എവേ മത്സരങ്ങളിൽ വിജയം നേടിയിരുന്നു. എന്നാൽ ഒരു കളി വീതം ഇവർ പരാജയപ്പെടുകയും ചെയ്തു.

Also Read: കളിക്ക് മുൻപ് ജിതേഷിന് പറ്റിയത് വമ്പൻ പിഴവ്, നിർണായക മത്സരത്തിൽ ആർസിബി രക്ഷപ്പെട്ടത് ഇങ്ങനെ.

ഇക്കുറി എവേ മത്സരങ്ങളിൽ റോയൽ ചലഞ്ചേഴ്സ് ബംഗളൂരുവിന്റെ വിജയശതമാനം‌ 100 ആണ്. ഈ നേട്ടം കൈവരിക്കുന്ന ഐപിഎൽ ചരിത്രത്തിലെ ആദ്യ ടീമാണ് ആർസിബി.

2025 സീസൺ ഐപിഎല്ലിൽ ആർസിബിയുടെ എവേ മത്സരങ്ങൾ ഇങ്ങനെ:

1. കൊൽക്കത്ത നൈറ്റ് റൈഡേഴ്സിനെ ഏഴ് വിക്കറ്റിന് തോൽപ്പിച്ചു
2. ചെന്നൈ‌സൂപ്പർ കിങ്സിനെ 50 റൺസിന് വീഴ്ത്തി
3. മുംബൈ ഇന്ത്യൻസിനെ 12 റൺസിന് കീഴടക്കി
4. രാജസ്ഥാൻ റോയൽസിനെ ഒൻപത് വിക്കറ്റിന് തകർത്തു
5. പഞ്ചാബ് കിങ്സിനെ ഏഴ് വിക്കറ്റിന് മറികടന്നു
6. ഡെൽഹി ക്യാപിറ്റൽസിനെ ആറ് വിക്കറ്റിന് തോല്പിച്ചു
7. ലക്നൗ സൂപ്പർ ജയന്റ്സിനെ ആറ് വിക്കറ്റിന് കീഴടക്കി.

Also Read: ഐപിഎല്‍ 2025 പോയിന്റ് പട്ടികയില്‍ രണ്ടാം സ്ഥാനത്ത് ഫിനിഷ് ചെയ്ത് ആര്‍സിബി.

അതേ സമയം 2025 സീസൺ ഇന്ത്യൻ പ്രീമിയർ ലീഗിന്റെ ലീഗ് ഘട്ടത്തിൽ 14 മത്സരങ്ങളിൽ നിന്ന് 19 പോയിന്റാണ് റോയൽ ചലഞ്ചേഴ്സ് ബംഗളൂരുവിന്റെ സമ്പാദ്യം. ഒൻപത് കളികളിൽ വിജയിച്ച അവർ നാല് കളികളിൽ പരാജയപ്പെട്ടു. ഒരു മത്സരം മഴ മുടക്കി. പോയിന്റ് പട്ടികയിൽ രണ്ടാം സ്ഥാനത്ത് ഫിനിഷ് ചെയ്ത ടീം ഒന്നാം ക്വാളിഫയറിലേക്കാണ് എത്തിയത്. ഈ മാസം 29 നാണ് ആദ്യ ക്വാളിഫയർ നടക്കുക. പഞ്ചാബ് കിങ്സാണ് എതിരാളികൾ.