'ഇനി ക്യാപ്റ്റൻ ആ യുവ വിക്കറ്റ് കീപ്പർ, മാറ്റങ്ങൾ സംഭവിക്കും'; ധോണിയുടെ ക്യാപ്റ്റൻസിയെക്കുറിച്ച് പ്രതികരിച്ച് റുതുരാജ് ഗെയ്ക്വാദ്

Edited byഅനുഷ ഗംഗാധരൻ | Samayam Malayalam | Updated: 11 Apr 2025, 9:49 am

Samayam Malayalamറുതുരാജ് ഗെയ്ക്വാദും എംഎസ് ധോണിയും മത്സരത്തിനിടെ (ഫയൽ ചിത്രം)

ചെന്നൈ: ഐപിഎൽ 2025 സീസണിൽ തുടരാൻ റുതുരാജ് ഗെയ്ക്വാദിന് സാധിക്കില്ല എന്ന വാർത്ത ചെന്നൈ ആരാധകരെ നിരാശപ്പെടുത്തിയിരിക്കുകയാണ്. കൈമുട്ടിനേറ്റ പരിക്കിനെ തുടർന്നാണ് ഗെയ്ക്വാദിന് സീസണിൽ നിന്നും പുറത്തുപോകേണ്ടി വന്നത്. ഇതിനുപിന്നാലെ എംഎസ് ധോണിയെ വീണ്ടും നായക സ്ഥാനത്തേക്ക് സിഎസ്കെ തിരികെ കൊണ്ടുവരുകയും ചെയ്‌തു. ഇപ്പോഴിതാ ധോണിയുടെ ക്യാപ്റ്റൻസിയെക്കുറിച്ച് പ്രതികരിച്ചിരിക്കുകയാണ് റുതുരാജ് ഗെയ്ക്വാദ്.തനിയ്ക്ക് ഇനി ഈ സീസണിൽ തുടരാൻ സാധിക്കാത്തതിൽ വിഷമമുണ്ട് എന്നും ഒരു യങ് വിക്കറ്റ് കീപ്പർ ആയിരിക്കും ഇനി ടീമിനെ നയിക്കുക എന്നുമാണ് എക്‌സിൽ പങ്കുവെച്ച വീഡിയോയിൽ റുതുരാജ് പറയുന്നത്. 'ഈ സീസണിലെ മുന്നോട്ടുള്ള മത്സരങ്ങളിൽ കളിക്കാൻ സാധിക്കാത്തതിൽ തീർത്തും വിഷമമുണ്ട്, ഒട്ടും പ്രതീക്ഷിക്കാതെ ഉണ്ടായ കൈമുട്ടിനേറ്റ പരിക്കാണ് ഇതിന് കാരണം. ഇതുവരെയുള്ള നിങ്ങളുടെ പിന്തുണയ്ക്ക് ഒരുപാട് നന്ദി. ഇപ്പോൾ നമ്മൾ സീസണിൽ ബുദ്ധിമുട്ടുകൾ നേരിടുന്നുണ്ട്, അത് നിങ്ങൾക്കും അറിയാം. എന്നാൽ ഇനി ഒരു യങ് വിക്കറ്റ് കീപ്പർ ആയിരിക്കും ടീമിനെ നയിക്കുക, മാറ്റങ്ങൾ സംഭവിക്കുമെന്ന് നമുക്ക് പ്രതീക്ഷികാം. ഞാൻ ടീമിനൊപ്പം ഉണ്ടാകും, പിന്തുണക്കും'റുതുരാജ് ഗെയ്ക്വാദ് പറഞ്ഞു.
എംഎസ് ധോണി സിഎസ്‌കെയെ നയിക്കും; റുതുരാജ് ഗെയ്ക്വാദ് 2025 ഐപിഎല്ലില്‍ നിന്ന് പുറത്ത്
“ടീമിന്റെ നിലവിലെ അവസ്ഥയിൽ നിന്ന് ടീമിനെ പുറത്തുകൊണ്ടുവരാൻ എനിയ്ക്ക് ആഗ്രഹമുണ്ടായിരുന്നു, പക്ഷെ ചില അപ്രതീക്ഷിത കാര്യങ്ങൾ സംഭവിച്ചു. ഞങ്ങൾക്ക് ഒരു മികച്ച സീസൺ മുന്നിലുണ്ട്. ഡഗ് ഔട്ടിൽ ഇരുന്നു ഞാൻ ടീമിനെ പിന്തുണക്കും, നന്ദി" എന്നും ഗെയ്ക്വാദ് കൂട്ടിച്ചേർത്തു.

അതേസമയം സീസണിൽ ഇനി എം എസ് ധോണി ചെന്നൈ സൂപ്പർ കിങ്സിനെ നയിക്കുമ്പോൾ അത് ടീം മാനേജ്മെന്റിനും സന്തോഷം നൽകുന്ന ഒന്ന് തന്നെയാണ്. കാരണം, ഐപിഎൽ ടേബിൾ നോക്കുകയാണെങ്കിൽ ഒൻപതാം സ്ഥാനത്താണ് ടീം ഇപ്പോഴുള്ളത്. അഞ്ച് മത്സരങ്ങളിൽ ഒരു മത്സരത്തിൽ മാത്രമാണ് റുതുരാജ് ഗെയ്ക്വാദിന്റെ ക്യാപ്റ്റൻസിയിൽ സിഎസ്കെയ്ക്ക് ജയിക്കാൻ സാധിച്ചത്. ഇനിയുള്ള സീസണിലെ ബാക്കി മത്സരങ്ങളിൽ ക്യാപ്റ്റൻസിയിൽ ഏറ്റവും കൂടുതൽ മികവ് തെളിയിച്ചിട്ടുള്ള ധോണി എത്തുമ്പോൾ ആരാധകർക്കും അത് പുതിയ പ്രതീക്ഷ നൽകുന്നതാണ്.


5 ഐപിഎൽ കിരീടങ്ങളാണ് സിഎസ്കെ ധോണിയുടെ ക്യാപ്റ്റൻസി കാലഘട്ടത്തിൽ സ്വന്തമാക്കിയിരിക്കുന്നത്. അതിൽ ഏറ്റവും അവസാനം കിരീടം സ്വന്തമാക്കിയത് 2023 ൽ ഗുജറാത്ത് ടൈറ്റൻസിനെ തോൽച്ചുകൊണ്ടായിരുന്നു. 2024ലും ധോണി തന്നെ ക്യാപ്റ്റൻ സ്ഥാനത്ത് തുടരും എന്ന പ്രതീക്ഷയിലിരിക്കെയാണ് മാനേജ്‌മന്റ് റുതുരാജ് ഗെയ്ക്വാദിനെ നായക സ്ഥാനം നൽകുന്നത്. ആ സീസണിൽ പ്ലേ ഓഫ് എൻട്രി നഷ്ടമാകുന്നത് നെറ്റ് റൺ റേറ്റിലെ നേരിയ ഇടിവ് ആണ്.

നാല് മല്‍സരങ്ങളും ജയിച്ച് ഡല്‍ഹി ക്യാപിറ്റല്‍സ്, ഇത്തവണ രാഹുല്‍ താരം; ആര്‍സിബിക്ക് ആറ് വിക്കറ്റ് തോല്‍വി
അതേസമയം റുതുരാജ് ഇറങ്ങിയിരുന്ന മൂന്നാം നമ്പറിൽ സിഎസ്കെ ഇനി ആരെ ഇറക്കും എന്നതാണ് ടീം നേരിടുന്ന അടുത്ത പ്രശ്നം. ഇന്ന് രാത്രിയാണ് സിഎസ്കെയുടെ സീസണിലെ ആറാമത്തെ മാച്ച് നടക്കുന്നത്. ഇതിനുമുന്പേ സർപ്രൈസ് താരം ആരാകുമെന്ന് അറിയാൻ ആരാധകരും കാത്തിരിക്കുകയാണ്.