ഇന്നത്തെ കളിക്ക് മുൻപ് ഡെൽഹി ക്യാപിറ്റൽസിന് വലിയ ആശങ്ക; ടീമിന് പുതിയ ക്യാപ്റ്റൻ വരാൻ സാധ്യത

Curated byഗോകുൽ എസ് | Samayam Malayalam | Updated: 5 May 2025, 2:37 pm

2025 സീസൺ ഇന്ത്യൻ പ്രീമിയർ ലീഗിൽ മികച്ച ഫോമിൽ കളിക്കുന്ന ടീമാണ് ഡെൽഹി ക്യാപിറ്റൽസ്. ആദ്യ 10 കളികളിൽ ആറെണ്ണം ജയിച്ച ഡെൽഹി‌ 12 പോയിന്റുമായി ടേബിളിൽ അഞ്ചാം സ്ഥാനത്തുണ്ട്. ശേഷിക്കുന്ന നാല് മത്സരങ്ങളിൽ മൂന്നെണ്ണത്തിൽ വിജയിക്കാനായാൽ ടീമിന് പ്ലേ ഓഫ് യോഗ്യത ഏറെക്കുറെ ഉറപ്പാക്കാം. ഇന്ന് സൺ റൈസേഴ്സ് ഹൈദരാബാദിന് എതിരെയാണ് ഡെൽഹിയുടെ അടുത്ത മത്സരം. എന്നാൽ ഈ പോരാട്ടത്തിന് മുൻപ് ടീമിന് ആശങ്ക സമ്മാനിക്കുന്നത് ടീമിലെ സൂപ്പർ താരത്തി‌ന് കളിക്കാനാകുമോ എന്നതാണ്. ടീമിന്റെ നായകനായ അക്സർ പട്ടേൽ ഇന്നത്തെ നിർണായക ഐപിഎൽ മത്സരത്തിൽ കളിക്കുമോ എന്ന കാര്യത്തിലാണ് ആശങ്കകൾ നിലനിൽക്കുന്നത്. കൊൽക്കത്ത നൈറ്റ് റൈഡേഴ്സിന് എതിരായ കഴിഞ്ഞ മത്സരത്തിൽ കളിക്കുന്നതിനിടെ അക്സർ പട്ടേലിന് പരിക്കേറ്റിരുന്നു. എന്നാൽ പിന്നീട് താരത്തിന്റെ ഫിറ്റ്നസുമായി ബന്ധപ്പെട്ട വിവരങ്ങളൊന്നും ഫ്രാഞ്ചൈസി പങ്കുവെച്ചില്ല. ഇതോടെയാണ് ഇന്നത്തെ കളി അദ്ദേഹത്തിന് നഷ്ടമാകുമോ എന്ന ആശങ്ക ഉയർന്നത്.


അതേ സമയം അക്സർ പട്ടേലിന് ഇന്നത്തെ മത്സരത്തിൽ കളിക്കാനായില്ലെങ്കിൽ ടീമിന് പുതിയ ക്യാപ്റ്റനെത്തും. നിലവിൽ ടീമിന്റെ ഉപനായകനായ ദക്ഷിണാഫ്രിക്കൻ താരം ഫാഫ് ഡു പ്ലെസിസാകും അക്സറില്ലെങ്കിൽ ഡെൽഹിയെ നയിക്കുക. കഴിഞ്ഞ ഐപിഎൽ മെഗാ ലേലത്തിൽ ഡെൽഹി രണ്ട് കോടി രൂപക്ക് സ്വന്തമാക്കിയ താരമാണ് ഫാഫ് ഡു പ്ലെസിസ്.

പ്ലേ ഓഫിലേക്കെത്താൻ ഡൽഹി; സീസണിൽ നിന്ന് പുറത്താകാതെ പിടിച്ചു നിൽക്കാൻ ഹൈദരാബാദ് ; ഇരു ടീമുകളും നേരിടുന്ന വെല്ലുവിളികൾ
ദക്ഷിണാഫ്രിക്കയുടെ മുൻ ക്യാപ്റ്റൻ കൂടിയായിരുന്ന ഫാഫ് ഡു പ്ലെസിസ് കഴിഞ്ഞ മൂന്ന് ഐപിഎൽ സീസണുകളിലും റോയൽ ചലഞ്ചേഴ്സ് ബംഗളൂരുവിന്റെ നായകനായിരുന്നു അദ്ദേഹം. ഫാഫിന് കീഴിൽ 2022 ലും 2024 ലും താരത്തിന് കീഴിൽ ആർസിബി പ്ലേ ഓഫിൽ കടന്നിരുന്നു.

സൂര്യകുമാർ യാദവിൻ്റെ റെക്കോഡ് പഴങ്കഥയാക്കി ആന്ദ്രേ റസ്സൽ; ഈഡൻ ഗാർഡനിൽ പുതിയ നാഴികക്കല്ല് സ്വന്തമാക്കി
അതേ സമയം ഇന്നത്തെ കളിയിൽ ഡെൽഹി ക്യാപിറ്റൽസിന്റെ എതിരാളികളായ സൺ റൈസേഴ്സ് ഹൈദരാബാദ്, 2025 സീസൺ ഐപിഎല്ലിൽ ദയനീയ ഫോമിലുള്ള ടീമാണ്‌. ആദ്യ 10 മത്സരങ്ങളിൽ നിന്ന് മൂന്ന് വിജയങ്ങൾ മാത്രം നേടിയ അവർ ആറ് പോയിന്റുമായി ടേബിളിൽ ഒൻപതാം സ്ഥാനത്താണ്. ഇന്നത്തെ കളിയിൽ പരാജയപ്പെടുകയാണെങ്കിൽ ടീം ഔദ്യോഗികമായി പ്ലേ ഓഫ് സാധ്യതകളിൽ നിന്ന് പുറത്താകും. അതുകൊണ്ടു തന്നെ ഏത് വിധേനയും വിജയം നേടാനാകും ഹൈദരാബാദിന്റെയും ശ്രമം.