ഇല്ല, വൊസീഞ്ഞ അങ്ങനെ കാലുമാറില്ല! കോളോ കോളോയിൽ തന്നെ കളിക്കും; ചിലെയിൽ ഗംഭീര വരവേൽപ്

സാന്തിയാഗോ (ചിലെ) ∙ ഫിഫ ലോകകപ്പിലെ സൂപ്പർ താരമായ കാബോ വെർദെ ഗോൾകീപ്പർ വൊസീഞ്ഞയ്ക്ക് ചിലെയിൽ ഗംഭീര വരവേൽപ്. ചിലെയിലെ കോളോ കോളോ ഫുട്ബോൾ ക്ലബ് അംഗമായ വൊസീഞ്ഞയുടെ പേരെഴുതിയ പോസ്റ്ററുകളുമായി ആയിരക്കണക്കിന് ആരാധകർ സാന്തിയാഗോ വിമാനത്താവളത്തിൽ താരത്തെ സ്വീകരിക്കാനെത്തി.

ലോകകപ്പിലെ മിന്നും പ്രകടനത്തിനു പിന്നാലെയാണ് നാൽപതുകാരൻ വൊസീഞ്ഞയെ കോളോ കോളോ ടീമിലെത്തിച്ചത്. മെഡിക്കൽ പരിശോധനകൾക്കു ശേഷം വൊസീഞ്ഞയെ ആരാധകർക്ക് മുൻപിൽ ഔദ്യോഗികമായി അവതരിപ്പിക്കാനാണ് ക്ലബ്ബിന്റെ നീക്കം. നേരത്തെ, കോളോ കോളോയുടെ ഓഫർ നിരസിച്ച്, മൊറോക്കോയിലെ ആര്‍എസ് ബെർക്കേന ക്ലബിലേക്ക് മാറാൻ വൊസീഞ്ഞ തീരുമാനിച്ചതായി റിപ്പോർട്ടുകളുണ്ടായിരുന്നു. എന്നാൽ അഭ്യൂഹങ്ങൾ കാറ്റിൽപറത്തി താരം കോളോ കോളോയിൽ തന്നെ ചേരുകയായിരുന്നു.

കോളോ കോളോയ്ക്കായി കിരീടങ്ങൾ നേടാൻ ആവേശത്തോടെ കാത്തിരിക്കുന്നതായി വൊസീഞ്ഞ പറഞ്ഞു. പോർച്ചുഗൽ രണ്ടാം ഡിവിഷൻ ടീമായ ഷാവേസിലായിരുന്നു കഴിഞ്ഞ 2 വർഷമായി വൊസീഞ്ഞ. 18 മാസത്തേക്കാണു ചിലെ ക്ലബ്ബുമായി പുതിയ കരാർ. പ്രതിമാസം 45,000 ഡോളർ വരെയാണ് താരത്തിന് ഓഫർ എന്നാണ് വിവരം.