ഈ ഫോട്ടോയില്‍ സിന്ധു എന്നെക്കാള്‍ ഉയര്‍ന്നിരിക്കുന്നതിന് ഒരു കാരണമുണ്ട്; രസകരമായ രഹസ്യം വെളിപ്പെടുത്തി കൃഷ്ണ കുമാര്‍

രസകരമായി കഥകള്‍ പങ്കുവയ്ക്കുന്ന ആളാണ് കൃഷ്ണകുമാര്‍ . കുടുംബത്തിലെ ഓരോ പഴയ കഥകളും ഓര്‍മകളും മക്കളുടെയും ഭാര്യയുടെയും യൂട്യൂബ് ചാനലിലൂടെ കൃഷ്ണകുമാര്‍ പങ്കുവയ്ക്കാറുണ്ട്. അത് കേട്ടിരിക്കാന്‍ വേണ്ടി മാത്രം പ്രത്യേകം ആരാധകരുമുണ്ട്. ഇപ്പോഴിതാ അത്തപമൊരു പഴയ കഥ പങ്കുവയ്ക്കുകയാണ് കൃഷ്ണകുമാര്‍.

പലപ്പോഴായി സോഷ്യല്‍ മീഡിയയില്‍ ശ്രദ്ധ നേടിയിട്ടുള്ള കൃഷ്ണകുമാറിന്റെയും സിന്ധുവിന്റെയും ഒരു ബ്ലാക്ക് ആന്റ് വൈറ്റ് ഫോട്ടോയ്ക്ക് പിന്നിലെ രസകരമായ ഓര്‍മയാണ് ഇന്‍സ്റ്റഗ്രാമിലൂടെ കൃഷ്ണകുമാര്‍ പങ്കുവച്ചിരിയ്ക്കുന്നത്. ചിത്രത്തില്‍ കൃഷ്ണകമാറിനെക്കാള്‍ സിന്ധു ഉയര്‍ന്നിരിക്കുന്നത് കാണാം. അതിന് പിന്നിലൊരു കഥയുണ്ട്.

Also Read: വീട്ടില്‍ സമാധാനം ഉണ്ടെങ്കില്‍ പ്രൊഫഷന്‍ ശ്രദ്ധിക്കാന്‍ പറ്റും, ശോഭിത എന്റെ ഭാഗ്യമാണ് എന്ന് നാഗ ചൈതന്യ!

കൃഷ്ണകുമാറിന്റെ പോസ്റ്റ്

1994- ല്‍ കല്യാണം കഴിഞ്ഞ വര്‍ഷം, എസ്ബിടിയില്‍ ഒരു ജോയിന്റ് അക്കൗണ്ട് തുടങ്ങാന്‍ വേണ്ടി എടുത്ത ഒരു ഫോട്ടോ ആണിത്. ഇടയ്ക്കിടെ ചില സുഹൃത്തുക്കള്‍ ഈ ഫോട്ടോ അയച്ചിട്ട് പറയും ഈ ഫോട്ടോ ഞങ്ങള്‍ക്കിഷ്ടമാണ് എന്ന്. ഈ ഫോട്ടോ എടുത്തപ്പോള്‍ നടന്ന ഒരു ചെറിയ വിഷയം ഞാനും സിന്ധുവും ഓര്‍ക്കും ചിരിക്കും.

പട്ടം പ്ലാമൂട് ഉള്ള ഒരു സ്റ്റുഡിയോയില്‍ ആണ് എടുത്തത്. അവിടെ ഉണ്ടായിരുന്ന ഒരു കുഷന്‍ ഉള്ള ഒരു ബെഞ്ച്. അതില്‍ ഞങ്ങള്‍ രണ്ടുപേരും ഇരുന്നു. ഫോട്ടോ എടുക്കുന്നതിനു മുന്‍പ് ഫോട്ടോഗ്രാഫര്‍ എങ്ങോട്ടോ പോയി ഒരു വലിയ ലെഡ്ജര്‍ പോലത്തെ ഒരു ബുക്ക് കൊണ്ടുവന്നിട്ടു പറഞ്ഞു സിന്ധു ഒന്നു എണീറ്റെ.. എണീറ്റപ്പോള്‍ ബെഞ്ചില്‍ അത് വെച്ചു, എന്നിട്ട് അതിനു മുകളില്‍ ഇരിക്കാന്‍ പറഞ്ഞു. സിന്ധു ചോദിച്ചു അതെന്തിനാ..? അയാള്‍ പറഞ്ഞു ഹൈറ്റ് ഒന്നു അഡ്ജസ്റ്റ് ചെയ്യാനാ. എന്നാലേ മാച്ച് ആകൂ. ഞങ്ങള്‍ അന്യോന്യം നോക്കി ചിരിച്ചു. ഫോട്ടോഗ്രാഫര്‍ ഫോട്ടോ എടുത്തു.

കുറച്ചു ദിവസങ്ങള്‍ക്കു ശേഷം ഫോട്ടോ വാങ്ങാന്‍ പോയി. നോക്കിയപ്പോള്‍ സിന്ധുവിന് എന്നെക്കാള്‍ ഉയരം. അപ്പോഴും ഞങ്ങള്‍ അന്യോന്യം നോക്കി. ചിരിച്ചു. ഉയരം കൂടിയതിനാല്‍ സിന്ധു വളരെ ഹാപ്പി. ഞാനും ഫോട്ടോഗ്രഫറും ഹാപ്പി. ഇന്നും വാട്‌സാപ്പില്‍ ഒരു സുഹൃത്ത് ഈ ഫോട്ടോ ഷെയര്‍ ചെയ്തു. കണ്ടപ്പോള്‍ ഒരു സുഖം തോന്നി. പഴയതാണ്, കളര്‍ അല്ല. പക്ഷെ എന്തോ ഒരിഷ്ടം. ആ സുഖവും സന്തോഷവും നിങ്ങളുമായി ഷെയര്‍ ചെയ്യുന്നു- കൃഷ്ണകുമാര്‍ പറഞ്ഞു