ഈ മോതിരം സ്‌പെഷ്യലാണെന്ന് രശ്മിക മന്ദാന; വിജയ് ദേവരകൊണ്ടയുമായുള്ള വിവാഹം എപ്പോള്‍?

Authored by: അശ്വിനി പി|Samayam Malayalam•7 Nov 2025, 2:14 pm

രശ്മിക മന്ദാന - വിജയ് ദേവരകൊണ്ട പ്രണയവും വിവാഹവും ഇപ്പോഴും സോഷ്യല്‍ മീഡിയയില്‍ വലിയ ചര്‍ച്ചയാണ്. ഇരുവരുടെയും വിവാഹ നിശ്ചയം കഴിഞ്ഞു എന്ന വാര്‍ത്തയും വളരെ അധികം സോഷ്യല്‍ മീഡിയ ശ്രദ്ധ ലഭിച്ചതാണ്. എന്നാല്‍ ഇതുവരെ രശ്മിക മന്ദാനയോ വിജയ് ദേവരകൊണ്ടയോ വിവാഹ നിശ്ചയ വാര്‍ത്തകളോട് പ്രതികരിച്ചിട്ടില്ല, അതിനിടയില്‍ രശ്മിക മന്ദാന കഴിഞ്ഞ ദിവസം നല്‍കിയ ഒരു അഭിമുഖം വൈറലാവുന്നു.

ജഗപതി ബാബുവിന് നല്‍കിയ അഭിമുഖത്തില്‍ കൈയ്യിലെ മോതിരത്തെ കുറിച്ച് രശ്മിക സംസാരിക്കുന്നുണ്ട്. ഇത് വളരെ സ്‌പെഷ്യല്‍ ഒരു മോതിരം ആണെന്നാണ് രശ്മിക പറയുന്നത്. അപ്പോഴേക്കും സദസ്സില്‍ നിന്ന് ആര്‍പ്പു വിളികള്‍ ഉയര്‍ന്നു, അത് എന്താണ് എന്ന് കൃത്യമായി പറയാത്തതുകൊണ്ടാണ് ഇത്തരം ആര്‍പ്പുവിളികള്‍ എന്ന് ജഗപതി ബാബു പറഞ്ഞപ്പോള്‍, ഞാനത് ആസ്വദിക്കുന്നു എന്നായിരുന്നു രശ്മികയുടെ പ്രതികരണം.

Also Read: എന്റെ ശരീരഭാരം അറിഞ്ഞിട്ട് നിങ്ങള്‍ക്കെന്താണ്; ബോഡി ഷെയിമിങ് കമന്റിനെതിരെ പ്രതികരിച്ച് ഗൗരി കിഷന്‍

എന്നാലിപ്പോഴിതാ വിജയ് ദേവരകൊണ്ടയുമായുള്ള രശ്മിക മന്ദാനയുടെ വിവാഹ തിയ്യതിയും പുറത്തുവരുന്നു. 2026 ഫെബ്രുവരി 26 ന് ആയിരിക്കും വിവാഹം . രാജസ്ഥാനിലെ ഉദയ്പൂറില്‍ വച്ച് രാജകീയമായ ഒരു വിവാഹം ആയിരിക്കും എന്നൊക്കെയുള്ള റിപ്പോര്‍ട്ടുകളും പുറത്തുവരുന്നുണ്ട്. വിവാഹ നിശ്ചയം മറച്ചുവച്ചത് പോലെയായിരിക്കില്ല, വിവാഹവും അതിനോടനുബന്ധിച്ച ചടങ്ങുകളുമെല്ലാം ആഘോഷമായി തന്നെ നടത്തിയേക്കും. പാന്‍ ഇന്ത്യന്‍ താരം എന്ന നിലയില്‍ രശ്മികയുടെ വിവാഹത്തിന് ബോളിവുഡ്, കോളിവുഡ്, സാന്റവുഡ്, ടോളിവുഡ് ഇന്റസ്ട്രിയിലെ എല്ലാ താരങ്ങളും പങ്കെടുത്തേക്കും എന്നൊക്കെയാണ് റിപ്പോര്‍ട്ടുകള്‍.

ഒക്ടോബര്‍ 3 ന് രശ്മികയുടെയും വിജയ് ദേവരകൊണ്ടയുടെയും വിവാഹ നിശ്ചയം കഴിഞ്ഞു എന്നാണ് റിപ്പോര്‍ട്ടുകള്‍. ഹൈദരബാദിലെ വിജയ് ദേവരകൊണ്ടയുടെ വീട്ടില്‍ വച്ച് വളരെ സ്വകാര്യമായിട്ടാണ് ചടങ്ങ് നടന്നത്. അടുത്ത ബന്ധുക്കള്‍ മാത്രമാണ് ചടങ്ങില്‍ പങ്കെടുത്തത്. ഒരു ഫോട്ടോ പോലും ഇതുമായി ബന്ധപ്പെട്ട് പുറത്തുവന്നിരുന്നില്ല.


പ്രണയ ഗോസിപ്പുകള്‍ പല കോണില്‍ നിന്നും വന്നിട്ടും ഇരുവരും അതിനെ കുറിച്ചും പ്രതികരിക്കാന്‍ നിന്നിട്ടില്ല. നേരത്തെ രശ്മിക മന്ദാനയുടെ വിവാഹം നിശ്ചയിച്ചുറപ്പിച്ചതിന് ശേഷം മുടങ്ങിപ്പോയതിന്റെ പേരില്‍ നടിയ്ക്ക് പലതും കേള്‍ക്കേണ്ടി വന്നിരുന്നു. അതുകൊണ്ടു തന്നെയാണ് വിവാഹം വരെ ഈ ബന്ധത്തെ കുറിച്ച് രഹസ്യമാക്കുന്നത് എന്നാണ് റിപ്പോര്‍ട്ടുകള്‍