ഈഗോ കെട്ടിപ്പിടിച്ചു നിന്നാല്‍ ദാമ്പത്യം നല്ല രീതിയില്‍ പോകില്ല; കാജോളുമൊത്തുള്ള ദാമ്പത്യ ജീവിതത്തെ കുറിച്ച് അജയ് ദേവ്ഗണ്‍

Authored by: അശ്വിനി പി|Samayam Malayalam•3 Dec 2025, 7:01 pm

ബോളിവുഡ് സിനിമാ ലോകത്തെ മാതൃകാ ദമ്പതികളാണ് കാജോളും അജയ് ദേവ്ഗണും. എങ്ങനെയായിരുന്നു ജാകോളുമായുള്ള പ്രണയവും വിവാഹവും, ഇത്ര വര്‍ഷം കഴിഞ്ഞും എങ്ങനെ അത് വിജയകരമായി മുന്നോട്ടു പോകുന്ന എന്ന ചോദ്യത്തിന് അജയ് ദേവ്ഗണ്‍ മറുപടി നല്‍രുന്നു.

എങ്ങനെയാണ് അത് സംഭവിച്ചത് എന്ന് എനിക്ക് അറിയില്ല, ഞങ്ങള്‍ പരസ്പരം ഒരുപാട് മനസ്സിലാക്കിയിരുന്നു. പ്രപ്പോസ് ചെയ്യുന്നതിന് മുന്‍പേ ഞങ്ങള്‍ക്കിടയില്‍ ആ ബന്ധം ഉണ്ടായിരുന്നു. പതിയെ പതിയെ, എന്തും ടേക്കണ്‍ ഫോര്‍ ഗ്രാന്റഡ് എന്ന ഘട്ടത്തില്‍ എത്തിയപ്പോഴാണ് വിവാഹത്തിലേക്ക് കടന്നത്. ഞങ്ങളുടെ ചിന്തകള്‍ സമാനമായിരുന്നു, കാഴ്ചപ്പാടുകളും ധാര്‍മികതയും എല്ലാം ഒരുപോലെയായിരുന്നു. അതുകൊണ്ടുതന്നെ എല്ലാം ആ ഒഴിക്കിനനുസരിച്ച് അങ്ങ് പോകുകയായിരുന്നു.

എങ്ങനെ അത് നിലനില്‍ക്കുന്നു എന്ന് ചോദിച്ചാല്‍, വളരെ നന്നായി നിലനിന്നു പോകുന്നു. എല്ലാ വിവാഹ ബന്ധത്തിലും ഉയര്‍ച്ച - താഴ്ചകള്‍ ഉണ്ടാവും. എതിരഭിപ്രായങ്ങള്‍ ഉണ്ടാവും. പക്ഷേ അതെല്ലാം മാനേജ് ചെയ്യാന്‍ പരസ്പരം രണ്ടു പേര്‍ക്കും സാധിക്കണം. മക്കളും ഉണ്ടാവുമ്പോള്‍, അവരുടെ കാര്യത്തിലുള്ള ഉത്തരവാദിത്വവുമുണ്ട്. എതിരഭിപ്രായങ്ങളുണ്ടാവുമ്പോള്‍ പരസ്പരം സംസാരിക്കും, ശരിതെറ്റുകള്‍ അംഗീകരിക്കും.

Also Read: ഇപ്പോഴാണോ ഇക്കാര്യം പുറത്ത് വരുന്നത്! മൂന്ന് മണിക്കൂറിലേറെ ദൈര്‍ഘ്യമുള്ള പ്രഭാസ് ചിത്രം

പുരുഷത്വ ബോധവും ഫെമിനിസവും എല്ലാം എല്ലായിടത്തും ഉണ്ടാവും, അത് മൈന്റില്‍ ഉണ്ടാവണം. അങ്ങനെയുള്ള ചിന്ത വരുമ്പോള്‍ അടുത്തു നില്‍ക്കുന്ന ആളുടെ കാഴ്ചപ്പാടില്‍ കൂടെ കാര്യങ്ങള്‍ കാണാന്‍ സാധിക്കണം. നമ്മള്‍ തെറ്റ് ചെയ്തു എന്ന് ഉറപ്പുണ്ടെങ്കില്‍ അത് തുറന്ന് പറയണം, അത് അവിടെ തീരും. ഈഗോയും പിടിച്ചു നിന്നാല്‍ ഒരിക്കലും ദാമ്പത്യം നല്ല രീതിയില്‍ പോകില്ല. അത് വളരെ പ്രധാനമാണ്.

വിവാഹ ബന്ധം എന്നല്ല, ഏതൊരു സൗഹൃദ ബന്ധത്തില്‍ ആണെങ്കിലും, എന്റെ കാഴ്ചപ്പാടില്‍ നിങ്ങള്‍ ചെയ്തത് തെറ്റാണ് എന്ന് തോന്നുകയാണെങ്കില്‍, എന്തുകൊണ്ട് നിങ്ങളത് ചെയ്തു എന്ന് നിങ്ങളുടെ കാഴ്ചപ്പാടിലൂടെ നോക്കി കാണാനും എനിക്ക് സാധിക്കണം. അത് എന്താണ് എന്ന് കണ്ടെത്താന്‍ സാധിച്ചാല്‍ ആരോഗ്യപരമായ തര്‍ക്കങ്ങള്‍ മാത്രമേ നടക്കുകയുള്ളൂ.

സിനിമകളില്‍ കാണുന്നത് പോലൊരു കാമുകനോ ഭര്‍ത്താവോ അല്ല ഞാന്‍, എന്റെ സ്‌നേഹം ഞാന്‍ അവരെ കെയര്‍ ചെയ്തുകൊണ്ടാണ് അറിയിക്കുന്നത് എന്ന് അജയ് ദേവ്ഗണ്‍ ചിരിച്ചുകൊണ്ട് പറയുന്നു. വിവാഹത്തിന ശേഷം പ്രണയം പാര്‍ട്ണര്‍ഷിപ്പും ഉത്തരവാദിത്വവും കെയറിങും ആയി മാറും. അത് പ്രണയത്തെക്കാള്‍ ശക്തമാണ് എന്ന് ഞാന്‍ വിശ്വസിക്കുന്നു. പ്രണയം മാത്രമാണെങ്കില്‍ ഒരു ഘട്ടം എത്തുമ്പോള്‍ അത് നഷ്ടപ്പെട്ടു പോകും.


ഇരുപതുകളില്‍ പ്രണയത്തോട് തോന്നുന്നതാവില്ല, മുപ്പതുകളിലും നാല്‍പതുകളിലും അന്‍പതുകളിലും ഉണ്ടാവുന്നത്. ഇരുപതുകളിലൊക്കെ ഒന്നും നമ്മള്‍ ശ്രദ്ധിക്കുന്നതേയില്ല, വരുന്നത് വരുന്നിടത്ത് വച്ച് കാണാം എന്ന അറ്റിറ്റിയൂഡ് ആണ്. പക്ഷേ പ്രായവും ഉതത്രവാദിത്വവും കൂടുമ്പോള്‍ അങ്ങനെയല്ല. നമ്മള്‍ കൂടുതല്‍ ശ്രദ്ധിക്കും. ഞാനൊരു റഷ് ഡ്രൈവര്‍ ആണ്. പക്ഷേ ഇപ്പോള്‍ കുടുംബത്തിനൊപ്പം പോകുമ്പോള്‍ ഒക്കെ ഒരുപാട് ശ്രദ്ധിക്കും, ഒറ്റയ്ക്ക് പോകുമ്പോള്‍ ആണെങ്കിലും കരുതലും ശ്രദ്ധയും ഉണ്ടാവും- അജയ് ദേവ്ഗണ്‍ പറഞ്ഞു