ഉലകനായകന്‍ കമല്‍ ഹാസന്റെ മകള്‍ ആയിട്ടും ശ്രുതി ഹാസന്‍ ജീവിതത്തില്‍ നേരിട്ടത് സാമ്പത്തികവും മാനസികവുമായ പ്രശ്‌നങ്ങള്‍!

ഇന്ന് ഉലകനായകന്‍ കമല്‍ ഹാസന്റെ മകള്‍ ശ്രുതി ഹാസന്റെ ജന്മദിനമാണ്. അച്ഛന്റെയും അമ്മയുടെയും വിവാഹം കാണാന്‍ ഭാഗ്യം ചെയ്ത മകളാണ് ശ്രുതി. ആ കല്യാണത്തിന് സാക്ഷിയായതിനെ കുറിച്ച് ശ്രുതി പലപ്പോഴും സന്തോഷത്തോടെ സംസാരിച്ചിട്ടുണ്ട്. അതേ താന്‍ അച്ഛനും അമ്മയും വേര്‍പിരിയുന്നതിനും സാക്ഷിയായി എന്ന് ശ്രുതി പറഞ്ഞിട്ടുണ്ട്. പക്ഷേ അതിന് ശേഷം ജീവിതം ആകെ തലകീഴായി മറിഞ്ഞുവത്രെ.

അച്ഛനും അമ്മയും വേര്‍പിരിയാന്‍ എടുത്ത തീരുമാനം ഏറ്റവും നല്ലതാണെന്ന അഭിപ്രായമാണ് ശ്രുതി ഹാസന്‍ . ഒരുമിച്ച് ജീവിച്ചിരുന്നപ്പോള്‍ അവര്‍ ഏറ്റവും മികച്ച ഭാര്യാ - ഭര്‍ത്താക്കന്മാരായിരുന്നു. അവര്‍ വേര്‍പിരിഞ്ഞതിന് ശേഷവും ഏറ്റവും മികച്ച ഡിവോഴ്‌സ് കപ്പിളും അവരാണെന്നാണ് ശ്രുതി പറഞ്ഞത്. ആ തീരുമാനം ശരിക്കും നല്ലതായിരുന്നു എന്ന് പിന്നീട് തോന്നിയിട്ടുണ്ടത്രെ.

Also Read: വലിയൊരു കാരണങ്ങളുണ്ട്! ശ്രീനിവാസന്റെ അന്ത്യകര്‍മങ്ങള്‍ക്ക് വരാതിരുന്നതിനെ കുറിച്ച് ജയറാം

ചെറുപ്പത്തില്‍ അച്ഛന്റെ സ്റ്റാര്‍ഡമായിരുന്നു ശ്രുതിയുടെ പ്രശ്‌നം. ചെന്നൈയില്‍ എവിടെ ചെന്നാലും കമല്‍ ഹാസന്റെ മകള്‍ എന്ന ലേബല്‍. ആ അവസ്ഥയില്‍ അച്ഛന്റെ പേര് പോലും ശ്രുതി ഹാസന്‍ മാറ്റി പറഞ്ഞിരുന്നുവത്രെ. വിവാഹ മോചനത്തിന് ശേഷം അമ്മ സരികയ്‌ക്കൊപ്പം ശ്രുതിയും അക്ഷരയും മുംബൈയിലേക്ക് മാറി. അച്ഛന്റെ സ്റ്റാര്‍ഡമോ, നിഴലോ ഇല്ലാത്ത ജീവിതം. സാമ്പത്തിക പ്രശ്‌നങ്ങള്‍ വേറെയും. അതിനോടെല്ലാം പൊരുതി നില്‍ക്കുക എന്നത് ചെറിയ കാര്യമായിരുന്നില്ല.

തുടര്‍ പഠനത്തിനായി വിദേശത്ത് പോയപ്പോള്‍, അവിടെ വരുമാനത്തിനായി ശ്രുതി ഹാസന്‍ പല ജോലികളും ചെയ്തുവത്രെ. ആദ്യത്തെ ഒരു സംഗീത ഉപകരണം വാങ്ങുന്നതിന് കാശില്ലാതായ അവസ്ഥ ശ്രുതി ഹാസന്‍ ഒരിക്കല്‍ തുറന്ന് പറഞ്ഞിട്ടുണ്ട്. മോഡലിങ് രംഗത്തേക്ക് ഇറങ്ങിയപ്പോള്‍ മെലിഞ്ഞ ശരീരത്തിന്റെ പേരിലുള്ള ബോഡി ഷെയിമിങ് കമന്റുകളാണ് ശ്രുതി ഹാസന് നേരിടേണ്ടി വന്നത്. കൃത്യമായ വ്യായമവും ഡയറ്റുമെല്ലാം നോക്കിയും, ചില ട്രീറ്റ്‌മെന്റുകളും എടുത്താണ് ഈ കാണുന്ന രൂപത്തിലേക്കുള്ള ശ്രുതി ഹാസന്റെ മാറ്റം.

തുടക്കകാലത്ത് റിജക്ഷനും ശ്രുതി ഹാസന്‍ ഒരുപാട് നേരിട്ടിരുന്നു. പ്രണയത്തിലെ ബ്രേക്കപ് തനിക്ക് മാനസിക ബുദ്ധിമുട്ടുകള്‍ ഉണ്ടാക്കിയതായും ശ്രുതി ഹാസന്‍ പറഞ്ഞിട്ടുണ്ട്. പക്ഷേ അപ്പോഴൊക്കെയും സ്വയം അതിനോടെല്ലാം പോരാടി, അതിജീവിച്ചു മുന്നോട്ടു വരികയായിരുന്നു. കമല്‍ ഹാസന്റെ മകള്‍ എന്ന ലേബല്‍ അല്ലാതെ, കരിയറില്‍ നേടിയ നേട്ടങ്ങള്‍ എല്ലാം താന്‍ ഒറ്റയ്ക്ക് കഷ്ടപ്പെട്ട് ഉണ്ടാക്കിയതാണ് എന്ന് ശ്രുതി ഹാസന് തലകുനിക്കാതെ പറയാം