എന്റെ ജീവിതമാണ് മകളുടെ പേര്, മക്കളെ അവരുടെ ഇഷ്ടങ്ങൾക്കെല്ലാം സമ്മതിച്ചവരാണ് ഞാനും സുചിയും; അഭിമാനത്തോടെ മോഹൻലാൽ

Authored by: അശ്വിനി പി|Samayam Malayalam•30 Oct 2025, 11:08 am

അങ്ങനെ ഇന്ത്യകണ്ട ഏറ്റവും പ്രകത്ഭ നടന്മാരിൽ ഒരാളായ സാക്ഷാൽ മോഹൻലാലിന്റെ മകൾ വിസ്മയ മോഹൻലാലും സിനിമയിലേക്ക് എത്തി. ജൂഡ് ആന്റണി ജോസഫ് സംവിധാനം ചെയ്യുന്ന തുടക്കം എന്ന ചിത്രത്തിലൂടെ വിസ്മയ മോഹൻലാൽ സിനിമയിലേക്ക് വരുന്നു എന്ന വാർത്ത നേരത്തെ പുറത്ത് വന്നതാണ്. സോഷ്യൽ മീഡിയയിലും വലിയ സ്വീകരണം ലഭിച്ച വാർത്തയായിരുന്നു അത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിയ്ക്കുന്ന ചിത്രത്തിൽ, ആന്റണി പെരുമ്പാവൂരിന്റെ മകൻ ആശിഷും അഭിനയിക്കുന്നുണ്ട്.

ചിത്രത്തിന്റെ പൂജ ചടങ്ങ് കഴിഞ്ഞു. ദിലീപ്, ജോഷി, മേജർ രവി, തരുൺ മൂർത്തി, വൈശാഖ് എന്നിങ്ങനെ പ്രമുഖ താരങ്ങൾ അടക്കം പലരും ചടങ്ങിൽ പങ്കെടുത്തു. മകൾ പറഞ്ഞ ആഗ്രഹത്തിനൊപ്പം നിന്നതിനെ കുറിച്ച് മോഹൻലാലും സുചിത്രയും വളരെ അഭിമാനത്തോടെയാണ് സംസാരിക്കുന്നത്.

ഞാൻ ഒരിക്കലും വിചാരിച്ചില്ല എന്റെ കുട്ടികൾ സിനിമയിൽ അഭിനയിക്കുമെന്ന്. അവർക്ക് അവരുടേതായിട്ടുള്ള പ്രൈവസിയുണ്ട്, അവരുടേതായ കാഴ്ചപ്പാടുകളുണ്ട്. അവരെ അവരുടെ ഇഷ്ടങ്ങൾക്ക് എല്ലാം സമ്മതിച്ചവരാണ് ഞാനും സുചിയും. ആന്റണിയുടെ വലിയൊരു ആഗ്രഹമായിരുന്നു അപ്പുവും മായയും സിനിമയിലേക്ക് വരണം എന്നത്. അതൊക്കെ അവരുടെ ഇഷ്ടമാണ്, ഞാൻ ഒരാളെ സിനിമയിൽ കൊണ്ടു വരുന്നതിന് എനിക്ക് എന്റേതായ ലിമിറ്റേഷൻസ് ഉണ്ട് എന്നാണ് ഞാൻ അദ്ദേഹത്തോട് പറഞ്ഞത്.

Also Read: ദിലീപിന്റെ നായിക അന്നും ഇന്നും; സ്വയം വിലയിരുത്തുന്നത് വളരെ നല്ലതാണെന്ന് ചാർമി കൗർ

മക്കൾക്ക് അവരുടെ കഴിവ് തെളിയിച്ച് മുന്നോട്ട് പോകാനുള്ള ഒരു ഊർജ്ജം നൽകാൻ മാത്രമേ എനിക്ക് സാധിക്കുകയുള്ളൂ. മായ സ്കൂളിൽ പഠിക്കുന്ന കാലത്ത് ഒരുപാട് നാടകങ്ങളിലൊക്കെ അഭിനയിച്ചിട്ടുള്ള കുട്ടിയാണ്. പക്ഷേ അഭിനയത്തിലേക്ക് വരും എന്ന് കരുതിയിരുന്നില്ല. എല്ലാം ഒരു ഡെസ്റ്റിനിയായിരിക്കാം. ഞാനും സിനിമയിൽ വരണം എന്ന് ആഗ്രഹിച്ച ഒരാളല്ല. എങ്ങനെയൊക്കെയോ അത് സംഭവിച്ചതാണ്. എന്റെ ജീവിതത്തിൽ സംഭവിച്ചതെല്ലാം വിസ്മയങ്ങളാണ്, ഞാൻ എന്റെ മകൾക്ക് പേരിട്ടതും വിസ്മയ എന്നാണ്.

കുട്ടി ഒരുപാട് കാര്യങ്ങൾ പഠിച്ചതാണ്, ഒരു സിനിമയിൽ അഭിനയിക്കണം എന്ന ആഗ്രഹം പറഞ്ഞപ്പോൾ, അത് ഒരുക്കി കൊടുക്കാനുള്ള എല്ലാ സൗകര്യങ്ങളും നമുക്കുണ്ട്. ഒരു കമ്പനിയുണ്ട്, പ്രൊഡക്ഷൻ ഹൗസുണ്ട്, ആന്റണി പെരുമ്പാവൂരുണ്ട്, അതിനൊപ്പം നല്ല ഒരു സ്ക്രിപ്റ്റ് കിട്ടിയപ്പോൾ കുട്ടി അഭിനയിക്കാൻ പോകുകയാണ്. അതിന്റെ പേര് തന്നെ തുടക്കം എന്നാണ്. സിനിമയിൽ അഭിനയിക്കുക അത്ര എളുപ്പമുള്ള ഒന്നല്ല, അതിന് ഭാഗ്യം കൂടെ വേണം. ഭാഗ്യം എന്നത്, നമുക്കൊപ്പം ഉള്ളവരും സപ്പോർട്ടീവായ നല്ല ആൾക്കാരായിരിക്കണം. വലിയൊരു സംഘത്തിനൊപ്പം സഞ്ചരിച്ചാണ് ഞാൻ മുന്നോട്ടു വന്നത്, അല്ലാതെ നമുക്ക് ഒറ്റയ്ക്ക് ഒന്നും നേടാൻ കഴിയില്ല. അതുപോലൊരു ചുറ്റുപാട് വിസ്മയയ്ക്കും ഉണ്ടാവട്ടെ- മോഹൻലാൽ പറഞ്ഞു
വിസ്മയയ്ക്കൊപ്പം ആന്റണിയുടെ മകൻ ആശിഷിനെയും വേദിയിലേക്ക് ക്ഷണിച്ച മോഹൻലാൽ, അദ്ദേഹത്തെയും പ്രശംസിക്കുകയും ആശംസിക്കുകയും ചെയ്തു. നേരത്തെ എമ്പുരാൻ എന്ന ചിത്രത്തിലും ആശിഷ് ചെറിയ ഒരു വേഷം ചെയ്തിരുന്നു